യുകെയിൽ 42,000 അഭയാർത്ഥികൾ അപ്പീൽ കാത്തിരിപ്പിൽ: അഭയ സങ്കീർണത വർദ്ധിക്കുന്നു
ലണ്ടൻ: യുകെയിൽ അഭയം തേടിയെത്തിയ ഏകദേശം 42,000 പേർ തങ്ങളുടെ പ്രാഥമിക അപേക്ഷകൾ ഹോം ഓഫീസ് തള്ളിയതിനെതിരെ അപ്പീൽ ഹിയറിങിനായി കാത്തിരിക്കുന്നതായി ഔദ്യോഗിക കണക്കുകളുടെ വിശകലനം വ്യക്തമാക്കുന്നു. രണ്ട് വർഷത്തിനിടെ അഞ്ച് മടങ്ങ് വർദ്ധനവാണ് ഈ എണ്ണത്തിൽ രേഖപ്പെടുത്തിയിരിക്കുന്നതെന്ന് റഫ്യൂജി കൗൺസിൽ ചൂണ്ടിക്കാട്ടി. അഭയ പ്രതിസന്ധി സമ്പ്രദായത്തിന്റെ ഒരു ഭാഗത്ത് നിന്ന് മറ്റൊരിടത്തേക്ക് മാറ്റുക മാത്രമാണ് സർക്കാർ ചെയ്യുന്നതെന്നും, ഇപ്പോഴും ഏകദേശം 40,000 അഭയാർത്ഥികൾ ഹോട്ടലുകളിൽ താമസിക്കുന്നുണ്ടെന്നും സംഘടന ആരോപിച്ചു.
അഭയാർത്ഥികളുടെ പ്രാഥമിക അപേക്ഷകളിൽ തീരുമാനമെടുക്കുന്നവരുടെ എണ്ണം ഇരട്ടിയാക്കിയതായും കൂടുതൽ കോടതി സിറ്റിങ് ദിനങ്ങൾക്കായി ധനസഹായം നൽകിയതായും ഹോം ഓഫീസ് അവകാശപ്പെട്ടു. അഭയ ഹോട്ടലുകളുടെ ഉപയോഗം ഘട്ടംഘട്ടമായി അവസാനിപ്പിക്കാനും “അസ്വീകാര്യമായ” താമസ ചെലവ് കുറയ്ക്കാനും സർക്കാർ ദൃഢനിശ്ചയത്തിലാണെന്ന് ഒരു വക്താവ് പറഞ്ഞു. എന്നാൽ, മുൻ കൺസർവേറ്റീവ് സർക്കാർ കൊണ്ടുവന്ന നിയമനിർമാണം യഥാർത്ഥ അഭയാർത്ഥി പദവി തെളിയിക്കുന്നത് ദുഷ്കരമാക്കിയതാണ് കൂടുതൽ അപേക്ഷകൾ നിരസിക്കപ്പെടാൻ കാരണമെന്ന് റഫ്യൂജി കൗൺസിൽ വിമർശിച്ചു.
നാഷണാലിറ്റി ആൻഡ് ബോർഡേഴ്സ് ആക്ട് നടപ്പിലാക്കിയതിന് ശേഷം, കഴിഞ്ഞ വർഷത്തിന്റെ രണ്ടാം പകുതിയിൽ അഫ്ഗാനിസ്ഥാനിൽ നിന്നുള്ളവരിൽ 40 ശതമാനം പേർക്ക് മാത്രമാണ് താമസാനുമതി ലഭിച്ചത്. മുമ്പ്, അഭയം തേടിയെത്തിയ മിക്കവാറും എല്ലാ അഫ്ഗാനികൾക്കും അനുമതി ലഭിച്ചിരുന്നു. നിരസിക്കപ്പെട്ടവരിൽ ഭൂരിഭാഗവും അപ്പീലിന് ശ്രമിക്കുന്നുണ്ടെന്നാണ് കരുതപ്പെടുന്നത്. നിലവിൽ, ഹോട്ടലുകളിൽ താമസിക്കുന്നവരിലും കഴിഞ്ഞ രണ്ട് വർഷത്തിനിടെ ചെറുകടല്വഞ്ചികളിൽ എത്തിയവരിലും അഫ്ഗാനികളാണ് ഏറ്റവും കൂടുതൽ.
നീതിന്യായ മന്ത്രാലയത്തിന്റെ കണക്കുകൾ പ്രകാരം, 2024 അവസാനത്തോടെ കോടതിയിൽ 41,987 അഭയ അപ്പീലുകൾ ബാക്ക്ലോഗിൽ ഉണ്ടായിരുന്നു. 2023 തുടക്കത്തിൽ ഇത് 7,173 ആയിരുന്നു. കഴിഞ്ഞ വർഷം ലോഡ്ജ് ചെയ്ത അഭയ അപ്പീലുകളുടെ ആകെ എണ്ണം 2023നെ അപേക്ഷിച്ച് 71 ശതമാനം വർദ്ധിച്ചതായി റഫ്യൂജി കൗൺസിലിന്റെ വിശകലനം സൂചിപ്പിക്കുന്നു.
