തുർക്കി പൗരന്മാരുടെ ഐഎൽആർ അനുമതിയിൽ 78% ഇടിവ്; ‘വിൻഡ്രഷ് ആവർത്തന’മെന്ന വിമർശനം
തുർക്കി ഇസിഎഎ വിസക്കാരുടെ സ്ഥിരതാമസ അനുമതികൾ കുത്തനെ കുറഞ്ഞതിനെതിരെ വിമർശനം; സമീപനത്തിൽ മാറ്റമില്ലെന്ന് ഹോം ഓഫീസ്.
ലണ്ടൻ : യുകെയിൽ ബിസിനസ് ആരംഭിച്ച് താമസിക്കുന്ന തുർക്കി പൗരന്മാരുടെ സ്ഥിരതാമസ അപേക്ഷകൾ നിരസിക്കുന്നത് വർധിച്ചതോടെ ഹോം ഓഫീസിനെതിരെ വിമർശനം. യൂറോപ്യൻ കമ്യൂണിറ്റി അസോസിയേഷൻ എഗ്രിമെന്റ് (ഇസിഎഎ) വിസയിലുള്ളവരുടെ അപേക്ഷകളിലെ തീരുമാനങ്ങളിൽ ഗുരുതര പിഴവുകളും ചട്ടങ്ങളിലില്ലാത്ത നിബന്ധനകളും കണ്ടെത്തിയതായാണ് റിപ്പോർട്ട്. 2025 ജനുവരി മുതൽ ജൂൺവരെ ഈ വിഭാഗത്തിൽ 3,378 പേർക്ക് സ്ഥിരതാമസാനുമതിയായ ഐഎൽആർ ലഭിച്ചപ്പോൾ 2026ലെ ഇതേ കാലയളവിൽ എണ്ണം 745 ആയി കുറഞ്ഞു—78 ശതമാനം ഇടിവ്. അപേക്ഷകൾ നിരസിക്കപ്പെട്ട ചില കുടുംബങ്ങൾക്ക് രാജ്യം വിടാനുള്ള നിർദേശവും ലഭിച്ചിട്ടുണ്ട്. നിയമങ്ങൾ പാലിച്ച് ജീവിതം കെട്ടിപ്പടുത്തവരുടെ അനുഭവങ്ങൾ വിൻഡ്രഷ് വിവാദത്തെ ഓർമിപ്പിക്കുന്നുവെന്ന് മുൻ വിദേശകാര്യ സെക്രട്ടറി ഡേവിഡ് ലാമി പ്രതികരിച്ചു.
കാൻസർ ചികിത്സയ്ക്കായി തുർക്കിയിൽ തുടരേണ്ടിവന്ന സ്ത്രീയുടെ അപേക്ഷ, അവിടെ ചികിത്സ തേടിയത് സ്വന്തം തീരുമാനമാണെന്ന കാരണത്താൽ നിരസിച്ചതായി റിപ്പോർട്ടിൽ പറയുന്നു. ചികിത്സ യുകെയിലേക്ക് മാറ്റുന്നത് ഗുരുതര അപകടസാധ്യതയുണ്ടാക്കുമെന്ന് ഡോക്ടർമാർ അറിയിച്ചിട്ടും ഇവരോടും മൂന്ന് കുട്ടികളോടും രാജ്യം വിടാൻ നിർദേശിച്ചു. മറ്റൊരു അപേക്ഷകന്റെ ജനൽശുചീകരണ ബിസിനസിന് വെബ്സൈറ്റോ സമൂഹമാധ്യമ സാന്നിധ്യമോ ഇല്ലെന്നത് നിരസിക്കാനുള്ള കാരണമായി ചൂണ്ടിക്കാട്ടി; ഇത്തരമൊരു നിബന്ധന ചട്ടങ്ങളിലില്ല. പിന്നീട് ഈ തീരുമാനം തിരുത്തി. രാജ്യത്തിന് പുറത്തു കഴിഞ്ഞ ദിവസങ്ങൾ തെറ്റായി കണക്കാക്കിയ സംഭവങ്ങളും റിപ്പോർട്ടിലുണ്ട്. നിരസിച്ച അപേക്ഷകൾ പുനഃപരിശോധിക്കുന്ന അഡ്മിനിസ്ട്രേറ്റീവ് റിവ്യൂ നടപടിയിലുള്ള കേസുകൾ 2025ലെ 145ൽനിന്ന് 2026 ജനുവരി മുതൽ ഓഗസ്റ്റ് പകുതിവരെയുള്ള കാലത്ത് 395 ആയി ഉയർന്നു.
2025 സെപ്റ്റംബർ മുതൽ സമർപ്പിച്ച അപേക്ഷകളിലാണ് കൂടുതൽ കർശന സമീപനവും പതിവ് ആറുമാസത്തിലേറെയുള്ള കാലതാമസവും കാണുന്നതെന്ന് അഭിഭാഷകർ പറയുന്നു. ദുർബല സാഹചര്യങ്ങളിലുള്ള അപേക്ഷകരോട് കരുതൽ പുലർത്തുക, തെളിവുകൾ വിലയിരുത്തുന്നതിൽ വ്യക്തത ഉറപ്പാക്കുക, അപേക്ഷകരുമായി നേരിട്ട് ബന്ധപ്പെടുക തുടങ്ങിയ വിൻഡ്രഷ് അവലോകനത്തിലെ ശുപാർശകൾ ഹോം ഓഫീസ് പാലിക്കുന്നില്ലെന്നാണ് വിമർശനം. ബ്രിട്ടനിൽ താമസിക്കാൻ അവകാശമുണ്ടായിരുന്നവരെ തെറ്റായി തടങ്കലിലാക്കുകയും നാടുകടത്തുകയും സേവനങ്ങൾ നിഷേധിക്കുകയും ചെയ്ത സംഭവങ്ങളായിരുന്നു വിൻഡ്രഷ് വിവാദം. എന്നാൽ ഇസിഎഎ സ്ഥിരതാമസ അപേക്ഷകൾ പരിഗണിക്കുന്ന രീതിയിൽ മാറ്റമില്ലെന്നും ഓരോ അപേക്ഷയും പ്രസിദ്ധീകരിച്ച ചട്ടങ്ങളും മാർഗനിർദേശങ്ങളും അനുസരിച്ച് വ്യക്തിഗത സാഹചര്യങ്ങൾ വിലയിരുത്തിയാണ് തീരുമാനിക്കുന്നതെന്നും ഹോം ഓഫീസ് വ്യക്തമാക്കി.
English Summary: A sharp fall in settlement approvals for Turkish ECAA visa holders has prompted Windrush comparisons, while the Home Office denies changing its approach.
