വെള്ളവും ഊർജവും പൊതുനിയന്ത്രണത്തിലേക്ക്: പ്രധാനമന്ത്രി സ്ഥാനത്തെത്തിയാൽ വൻ പരിഷ്കാരങ്ങൾക്ക് ആൻഡി ബേൺഹാം

ലണ്ടൻ : ബ്രിട്ടനിലെ വെള്ളം, ഊർജം തുടങ്ങിയ അടിസ്ഥാന സേവനങ്ങൾ പൊതുനിയന്ത്രണത്തിലേക്ക് കൊണ്ടുവരാനുള്ള ദീർഘകാല പദ്ധതി ഗ്രേറ്റർ മാഞ്ചസ്റ്റർ മേയർ ആൻഡി ബേൺഹാമിന്റെ പ്രധാന രാഷ്ട്രീയ അജണ്ടയാകുമെന്ന് റിപ്പോർട്ട്. ഭാവിയിൽ ലേബർ പാർട്ടിയുടെ നേതൃത്വത്തിലൂടെ പ്രധാനമന്ത്രി സ്ഥാനത്തെത്തിയാൽ, ജനങ്ങളുടെ ജീവിതവുമായി നേരിട്ട് ബന്ധപ്പെട്ട സേവനങ്ങൾ സ്വകാര്യ ലാഭത്തിന് പകരം പൊതുതാൽപര്യം മുൻനിർത്തി പ്രവർത്തിക്കണമെന്ന നിലപാട് ശക്തമായി മുന്നോട്ടുവയ്ക്കാനാണ് അദ്ദേഹം ആലോചിക്കുന്നത്. കോർപ്പറേറ്റ് ലാഭക്കൊതിക്ക് ജനങ്ങളെ വിട്ടുകൊടുക്കില്ലെന്ന ബേൺഹാമിന്റെ പ്രഖ്യാപനങ്ങളുടെ തുടർച്ചയായാണ് ഈ നീക്കങ്ങൾ വിലയിരുത്തപ്പെടുന്നത്.

ആദ്യ ഘട്ടത്തിൽ കടുത്ത സാമ്പത്തിക പ്രതിസന്ധിയിലായ തെംസ് വാട്ടർ പോലുള്ള കമ്പനികളെ പ്രത്യേക ഭരണത്തിന് കീഴിലാക്കി പിന്നീട് പൂർണ്ണമായും പൊതുനിയന്ത്രണത്തിൽ കൊണ്ടുവരാനാണ് പദ്ധതി തയ്യാറാക്കുന്നത്. തുടർന്ന് മറ്റ് വെള്ളക്കമ്പനികൾ പ്രതിസന്ധിയിലാകുകയോ അവരുടെ കരാർ കാലാവധി അവസാനിക്കുകയോ ചെയ്യുന്ന സാഹചര്യങ്ങളിൽ ക്രമേണ അവയെ പൊതുമേഖലാ മാതൃകയിലേക്ക് മാറ്റും. ബെർലിൻ, പാരീസ് തുടങ്ങിയ യൂറോപ്യൻ നഗരങ്ങളിലെ വിജയകരമായ മാതൃക പിൻപറ്റി പ്രാദേശിക ഭരണകൂടങ്ങൾക്കും തൊഴിലാളികൾക്കും ഉപഭോക്താക്കൾക്കും ഒരുപോലെ പങ്കാളിത്തം നൽകുന്ന ജനകീയ സംവിധാനമാണ് ബേൺഹാമിനോട് അടുത്ത വൃത്തങ്ങൾ ഇതിനായി ചൂണ്ടിക്കാട്ടുന്നത്.

അതേസമയം, ഇത്തരമൊരു ദേശീയവത്കരണ നീക്കം നികുതിദായകരുടെ മേൽ വലിയ സാമ്പത്തിക ബാധ്യത വരുത്തിവയ്ക്കുമെന്നാണ് വിമർശകരുടെ മുന്നറിയിപ്പ്. ജലവിതരണത്തിന് പുറമെ വൈദ്യുതി ഗ്രിഡ്, മറ്റ് വിതരണ ശൃംഖലകൾ എന്നിവയും പൊതുനിയന്ത്രണത്തിലേക്ക് കൊണ്ടുവരാനും ജീവിതച്ചെലവ് കുറയ്ക്കുന്നതിന്റെ ഭാഗമായി വീട്ടുവാടക മരവിപ്പിക്കൽ, ബസ് നിരക്ക് നിയന്ത്രണം തുടങ്ങിയ ജനക്ഷേമ പദ്ധതികളും ബേൺഹാം പക്ഷം ചർച്ച ചെയ്യുന്നുണ്ട്. എന്നാൽ കൂടുതൽ കടമെടുക്കില്ലെന്നും പ്രധാന നികുതികൾ വർദ്ധിപ്പിക്കില്ലെന്നും പ്രഖ്യാപിച്ചിട്ടുള്ള സാഹചര്യത്തിൽ, ഇത്തരം വൻകിട പദ്ധതികൾക്ക് ആവശ്യമായ പണം കണ്ടെത്തുന്നത് ബേൺഹാമിന് ഭാവിയിൽ വലിയ രാഷ്ട്രീയ വെല്ലുവിളിയായേക്കും.

Andy Burnham plans to bring UK water and energy sectors under public control if he becomes Prime Minister.