എൻഎംസി രജിസ്റ്ററിലേക്കുള്ള പുതിയ നഴ്‌സുമാരുടെ വരവ് കുറഞ്ഞു; യുകെയിൽ നഴ്‌സിംഗ് റിക്രൂട്ട്മെന്റിൽ ആശങ്ക

ലണ്ടൻ : യുകെയിലെ നഴ്‌സിംഗ് ആൻഡ് മിഡ്‌വൈഫറി കൗൺസിൽ രജിസ്റ്ററിലുള്ള പ്രൊഫഷണലുകളുടെ എണ്ണം റെക്കോർഡ് ഉയരത്തിലെത്തിയെങ്കിലും പുതിയ നഴ്‌സുമാരുടെയും മിഡ്‌വൈഫുമാരുടെയും രജിസ്ട്രേഷൻ വളർച്ച ഗണ്യമായി മന്ദഗതിയിലായതായി എൻഎംസിയുടെ വാർഷിക കണക്കുകൾ. 2026 മാർച്ച് 31 വരെ രജിസ്റ്ററിൽ 8,67,935 നഴ്‌സുമാരും മിഡ്‌വൈഫുമാരും നഴ്‌സിംഗ് അസോസിയേറ്റുമാരുമാണുള്ളത്. കഴിഞ്ഞ ഒരു വർഷത്തിനിടെ 41,542 പേർ പുതുതായി രജിസ്റ്റർ ചെയ്തപ്പോൾ 30,323 പേർ രജിസ്റ്റർ വിട്ടു. എന്നിരുന്നാലും രജിസ്റ്ററിന്റെ വളർച്ചാ നിരക്ക് മുൻവർഷത്തെ 3.3 ശതമാനത്തിൽ നിന്ന് 1.7 ശതമാനമായി കുറഞ്ഞു.

വിദേശത്ത് പരിശീലനം നേടിയ നഴ്‌സുമാരുടെ വരവിൽ ഉണ്ടായ ഇടിവാണ് വളർച്ച മന്ദഗതിയിലാകാൻ പ്രധാന കാരണമായി ചൂണ്ടിക്കാട്ടുന്നത്. അതേസമയം യുകെയിൽ പരിശീലനം നേടിയ പുതിയ പ്രൊഫഷണലുകളുടെ രജിസ്ട്രേഷനും കുറഞ്ഞു. 2026 മാർച്ച് വരെയുള്ള ഒരു വർഷത്തിൽ യുകെയിൽ പരിശീലനം നേടിയ 30,151 പേരാണ് രജിസ്റ്ററിൽ ചേർന്നത്; മുൻവർഷം ഇത് 32,164 ആയിരുന്നു. കഴിഞ്ഞ അഞ്ച് വർഷത്തിനിടെ യുകെയിൽ പഠനവും പരിശീലനവും പൂർത്തിയാക്കിയവരുടെ പുതിയ രജിസ്ട്രേഷൻ കുറയുന്നത് ഇതാദ്യമായാണെന്ന് റോയൽ കോളേജ് ഓഫ് നഴ്‌സിംഗ് ചൂണ്ടിക്കാട്ടി.

രജിസ്റ്റർ വിട്ട പ്രൊഫഷണലുകളുടെ എണ്ണം മുൻവർഷത്തേക്കാൾ 5.3 ശതമാനം ഉയർന്നതും ആശങ്ക വർധിപ്പിക്കുന്നു. രജിസ്റ്റർ വിട്ട 30,323 പേരിൽ 25,094 പേർ യുകെയിൽ പഠനവും പരിശീലനവും പൂർത്തിയാക്കിയവരാണ്. അതേസമയം വിദേശത്ത് പരിശീലനം നേടിയ പ്രൊഫഷണലുകൾ രജിസ്റ്റർ വിടുന്നതിലെ വർധന 0.9 ശതമാനം മാത്രമാണ്. പുതിയ നഴ്‌സുമാരുടെ വരവ് കുറയുകയും മേഖല വിടുന്നവരുടെ എണ്ണം ഉയരുകയും ചെയ്യുന്ന സാഹചര്യം ആരോഗ്യ-സാമൂഹിക പരിചരണ മേഖലയിലെ ജീവനക്കാരുടെ ക്ഷാമം കൂടുതൽ രൂക്ഷമാക്കുമെന്ന ആശങ്കയാണ് ഉയരുന്നത്.

English summary: Growth in the NMC register slowed sharply as fewer UK-trained and internationally educated professionals joined during 2025–26.