യുകെ യൂറോപ്യൻ യൂണിയനിലേയ്ക്ക് മടങ്ങണമെന്ന വെസ് സ്ട്രീറ്റിങ്ങിന്റെ നിലപാട് ലേബർ പാർട്ടിയുടെ ഭാവി തകർക്കുമെന്ന് മുന്നറിയിപ്പ്
യൂറോപ്യൻ യൂണിയനിലേക്ക് രാജ്യം വീണ്ടും ചേരണമെന്ന വെസ് സ്ട്രീറ്റിംഗിന്റെ നിലപാട് ലേബർ പാർട്ടിയുടെ ഭാവി പൂർണ്ണമായും തകർക്കുമെന്ന് മുന്നറിയിപ്പ്. ലേബർ പാർട്ടിയിലെ മുതിർന്ന അംഗവും പ്രമുഖ രാഷ്ട്രീയ നിരീക്ഷകനുമായ ലോർഡ് ഗ്ലാസ്മാൻ ആണ് മുൻ ആരോഗ്യ സെക്രട്ടറി കൂടിയായ സ്ട്രീറ്റിംഗിനെതിരെ കടുത്ത വിമർശനവുമായി രംഗത്തെത്തിയത്. സ്ട്രീറ്റിംഗ് ഒരു പുരോഗമനപരമായ യൂറോപ്യൻ യൂണിയൻ മരീചികയിലാണ് ജീവിക്കുന്നതെന്നും ഇത്തരം നിലപാടുകളുമായി മുന്നോട്ട് പോയാൽ അടുത്ത പൊതുതിരഞ്ഞെടുപ്പിൽ പാർട്ടിക്ക് കനത്ത തിരിച്ചടി നേരിടേണ്ടി വരുമെന്നും അദ്ദേഹം വ്യക്തമാക്കി. ലേബർ പാർട്ടി നേതൃത്വത്തിലേക്ക് മത്സരിക്കാൻ ഒരുങ്ങുന്ന സ്ട്രീറ്റിംഗ് പാർലമെന്റിൽ തന്റെ രാജി പ്രസംഗം നടത്തുന്നതിന് തൊട്ടുമുമ്പാണ് ഈ പ്രതികരണങ്ങൾ പുറത്തുവന്നത്.
പാർട്ടി നേതൃമാറ്റത്തെച്ചൊല്ലിയുള്ള തർക്കങ്ങളും പുതിയ സാമ്പത്തിക നയങ്ങളും ലേബർ പാർട്ടിക്കുള്ളിൽ വലിയ പ്രതിസന്ധിയാണ് സൃഷ്ടിക്കുന്നത്. മറ്റൊരു പ്രമുഖ നേതാവായ ആൻഡി ബേൺഹാമിന്റെ സാമ്പത്തിക പദ്ധതികൾ രാജ്യത്ത് നികുതി വർദ്ധനവിന് കാരണമാകുമെന്നും അത് കടുത്ത സാമ്പത്തിക തിരിച്ചടിയുണ്ടാക്കുമെന്നും സാമ്പത്തിക വിദഗ്ദ്ധർ മുന്നറിയിപ്പ് നൽകിയിട്ടുണ്ട്. ബേൺഹാം സ്വന്തം താല്പര്യങ്ങൾക്ക് മാത്രമാണ് മുൻഗണന നൽകുന്നതെന്ന വിമർശനവുമായി റിഫോം യുകെയും രംഗത്തെത്തിക്കഴിഞ്ഞു. പ്രാദേശിക തിരഞ്ഞെടുപ്പിലുണ്ടായ കനത്ത പരാജയത്തിന് പിന്നാലെ പാർട്ടിയിലെ നൂറോളം എംപിമാർ പ്രധാനമന്ത്രി കീർ സ്റ്റാർമറുടെ രാജി ആവശ്യപ്പെട്ടിരിക്കുകയാണ്.
അതേസമയം പ്രാദേശിക തിരഞ്ഞെടുപ്പിലെ തിരിച്ചടികൾക്ക് ശേഷം പ്രധാനമന്ത്രി കീർ സ്റ്റാർമർ ഇന്ന് പാർലമെന്റിൽ ആദ്യമായി പ്രതിപക്ഷത്തെ നേരിടും. ടോറി നേതാവ് കെമി ബാഡെനോക്കുമായുള്ള സഭയിലെ വാദപ്രതിവാദങ്ങൾ സ്റ്റാർമറുടെ രാഷ്ട്രീയ ഭാവിയെ സംബന്ധിച്ച് നിർണ്ണായകമാകും. ഇറാൻ യുദ്ധത്തിന്റെ പശ്ചാത്തലത്തിൽ റഷ്യൻ എണ്ണയ്ക്കെതിരെയുള്ള ഉപരോധങ്ങളിൽ ഇളവ് വരുത്തിയ സർക്കാർ നടപടിയും പ്രധാനമന്ത്രിക്കെതിരെ പ്രതിപക്ഷം ആയുധമാക്കുമെന്നാണ് സൂചനകൾ. പാർട്ടിയിലെ ആഭ്യന്തര കലഹങ്ങളും നേതൃത്വത്തിനായുള്ള നേതാക്കളുടെ മത്സരങ്ങളും ലേബർ പാർട്ടിയെ ചരിത്രത്തിലെ ഏറ്റവും വലിയ രാഷ്ട്രീയ പ്രതിസന്ധിയിലേക്കാണ് നയിക്കുന്നത്.
