എ&ഇയിൽ റിസപ്ഷനിസ്റ്റുകൾക്ക് പകരം ഐപാഡ് ചെക്ക് ഇൻ; പുതിയ പരിഷ്കാരവുമായി എൻഎച്ച്എസ്

ലണ്ടൻ : യുകെയിലെ എൻഎച്ച്എസ് ആശുപത്രികളിലെ എ&ഇ വിഭാഗങ്ങളിൽ എത്തുന്ന രോഗികൾക്കായി പുതിയ ഡിജിറ്റൽ ചെക്ക് ഇൻ സംവിധാനം വരുന്നു. ഇനി മുതൽ എ&ഇയിൽ എത്തുമ്പോൾ റിസപ്ഷനിസ്റ്റിനെ സമീപിക്കുന്നതിന് പകരം ഐപാഡ് മാതൃകയിലുള്ള സ്ക്രീനുകളിലൂടെയോ ടാബ്ലറ്റുകളിലൂടെയോ രോഗികൾ നേരിട്ട് വിവരങ്ങൾ രേഖപ്പെടുത്തണം. രോഗലക്ഷണങ്ങൾ, ആരോഗ്യചരിത്രം തുടങ്ങിയവ ഓൺലൈൻ ചോദ്യാവലിയിലൂടെ പൂരിപ്പിച്ചു നൽകുന്ന ‘ഡിജിറ്റൽ ട്രയേജ്’ സംവിധാനം വരാനിരിക്കുന്ന ശൈത്യകാലത്തിന് മുമ്പായി കൂടുതൽ ആശുപത്രികളിൽ നടപ്പാക്കാനാണ് എൻഎച്ച്എസ് ലക്ഷ്യമിടുന്നത്. അടിയന്തര ചികിത്സ ആവശ്യമുള്ളവരെ വേഗത്തിൽ കണ്ടെത്താനും, മറ്റുള്ളവരെ ഫാർമസി, ജിപി സേവനങ്ങൾ അല്ലെങ്കിൽ പിന്നീട് ലഭ്യമാകുന്ന അപ്പോയിന്റ്മെന്റുകൾ എന്നിവയിലേക്ക് തിരിച്ചുവിടാനും ഇതിലൂടെ സാധിക്കും.

അടിയന്തര ചികിത്സാ വിഭാഗങ്ങളിൽ കൂടുതൽ ക്രമവും നിയന്ത്രണവും കൊണ്ടുവരുന്നതിന്റെ ഭാഗമായാണ് ഈ പുതിയ നീക്കമെന്ന് എൻഎച്ച്എസ് ഇംഗ്ലണ്ട് മേധാവി സർ ജിം മാക്കി വ്യക്തമാക്കി. എന്നാൽ ആംബുലൻസുകളിൽ എത്തുന്നവരെയോ അടിയന്തരമായി ജീവൻ രക്ഷാ ചികിത്സ ആവശ്യമുള്ളവരെയോ ഈ ഡിജിറ്റൽ സംവിധാനത്തിലൂടെ കടത്തിവിടില്ല, അവർക്ക് നേരിട്ട് തന്നെ ക്ലിനിക്കൽ പരിചരണം ഉറപ്പാക്കും. നിലവിൽ 18 ആശുപത്രികളിൽ ഈ മാതൃക വിജയകരമായി ഉപയോഗിക്കുന്നുണ്ട്. ഈസ്റ്റ് ലങ്കാഷയർ ടീച്ചിംഗ് ഹോസ്പിറ്റൽസിൽ നടത്തിയ പരീക്ഷണാടിസ്ഥാനത്തിലുള്ള ഉപയോഗത്തിൽ എ&ഇയിലെ കാത്തിരിപ്പ് സമയം ഏകദേശം പകുതിയായി കുറയ്ക്കാൻ കഴിഞ്ഞതായും എൻഎച്ച്എസ് അധികൃതർ ചൂണ്ടിക്കാട്ടുന്നു.

അതേസമയം, രോഗി സംഘടനകൾ ഈ പുതിയ പരിഷ്കാരത്തിനെതിരെ ശക്തമായ ആശങ്ക പ്രകടിപ്പിച്ചിട്ടുണ്ട്. പ്രായമായവർ, ഭിന്നശേഷിക്കാർ, ഡിജിറ്റൽ സാങ്കേതികവിദ്യ കൈകാര്യം ചെയ്യാൻ ബുദ്ധിമുട്ടുന്നവർ എന്നിവർക്ക് ഈ പുതിയ മാറ്റം വലിയ തിരിച്ചടിയായേക്കാം എന്നാണ് ഇവരുടെ മുന്നറിയിപ്പ്. രോഗലക്ഷണങ്ങൾ കൃത്യമായി വിശദീകരിക്കാൻ കഴിയാത്തവർക്ക് നേരിട്ട് ജീവനക്കാരുടെ സഹായം ആവശ്യമായി വരുമെന്നും, തെറ്റായ വിലയിരുത്തലുകൾ കാരണം അർഹരായ രോഗികൾ എ&ഇയിൽ നിന്ന് തിരിച്ചുവിടപ്പെടാൻ സാധ്യതയുണ്ടെന്നും അവർ ആശങ്കപ്പെടുന്നു. എന്നാൽ സാങ്കേതികവിദ്യ ഉപയോഗിക്കാൻ ബുദ്ധിമുട്ടുള്ള രോഗികളെ സഹായിക്കാൻ ജീവനക്കാരുടെ സേവനം ലഭ്യമായിരിക്കുമെന്നും, ഓരോ രോഗിയുടെയും കാര്യത്തിൽ അന്തിമ തീരുമാനം എൻഎച്ച്എസ് ജീവനക്കാർ തന്നെയായിരിക്കും കൈക്കൊള്ളുകയെന്നും അധികൃതർ അറിയിച്ചു.

English Summary: The NHS is rolling out iPad-style digital check-ins at A&E departments to streamline patient triage, despite concerns from patient groups about accessibility for the elderly and disabled.