കെയർ വർക്കർമാരുടെ വിസ നിയമമാറ്റം ക്രൂരത; യുകെ സർക്കാരിനെതിരെ ആഞ്ചല റെയ്‌നർ

ലണ്ടൻ : യുകെയിൽ നിലവിൽ ജോലി ചെയ്യുന്ന വിദേശ കെയർ വർക്കർമാരുടെ സ്ഥിരതാമസ നിയമങ്ങളിൽ ഭേദഗതി വരുത്താനുള്ള സർക്കാരിന്റെ നീക്കം കടുത്ത അനീതിയാണെന്ന് മുൻ ഡെപ്യൂട്ടി പ്രധാനമന്ത്രി ആഞ്ചല റെയ്‌നർ വ്യക്തമാക്കി. അഞ്ച് വർഷത്തെ സേവനത്തിന് ശേഷം സ്ഥിരതാമസാവകാശത്തിന് അപേക്ഷിക്കാൻ അർഹതയുണ്ടായിരുന്ന കെയർ ജീവനക്കാരെ പുതിയ നിയമപ്രകാരം 15 വർഷം വരെ കാത്തിരിപ്പാൻ നിർബന്ധിക്കുന്നത് ബ്രിട്ടീഷ് മൂല്യങ്ങൾക്ക് നിരക്കാത്ത നടപടിയാണെന്ന് ബിബിസിക്ക് നൽകിയ അഭിമുഖത്തിൽ അവർ വിമർശിച്ചു. അതിർത്തി നിയന്ത്രണങ്ങൾ ആവശ്യമാണെങ്കിലും, നിലവിലുള്ള നിയമങ്ങൾ പാലിച്ച് യുകെയിൽ ജീവിതം ആരംഭിച്ചവരോട് പകുതിവഴിയിൽ വെച്ച് നിയമങ്ങൾ മാറ്റിപ്പണിയുന്നത് നീതീകരിക്കാനാകില്ലെന്ന് റെയ്‌നർ കൂട്ടിച്ചേർത്തു.

മിക്ക കുടിയേറ്റക്കാരുടെയും സ്ഥിരതാമസത്തിനുള്ള യോഗ്യതാ കാലാവധി 5 വർഷത്തിൽ നിന്ന് 10 വർഷമായി ഉയർത്താനാണ് യുകെ സർക്കാർ ആലോചിക്കുന്നത്. എന്നാൽ ആരോഗ്യ-സാമൂഹിക പരിചരണ വിസയിൽ എത്തിയ സാധാരണ ജീവനക്കാർക്ക് ഇത് 15 വർഷമായി ദീർഘിപ്പിക്കാനാണ് പുതിയ നിർദേശം മുന്നോട്ട് വെച്ചിരിക്കുന്നത്. കോവിഡ് പ്രതിസന്ധിയുടെ കഠിനമായ കാലഘട്ടത്തിൽ പോലും സ്വന്തം ജീവൻ പണയപ്പെടുത്തി രാജ്യത്തെ പരിചരണ മേഖലയെ താങ്ങിനിർത്തിയവരോടാണ് ഈ ക്രൂരതയെന്ന് യൂണിസൺ ട്രേഡ് യൂണിയൻ സംഘടിപ്പിച്ച പ്രതിഷേധ റാലിയിൽ റെയ്‌നർ തുറന്നടിച്ചു. കൃത്യമായി നികുതിയടച്ച് സമൂഹത്തിന് വലിയ സംഭാവന നൽകുന്നവരോട് കളി തുടങ്ങി പകുതിയാകുമ്പോൾ നിയമങ്ങൾ മാറ്റുന്ന രീതി ശരിയല്ലെന്നും അവർ വ്യക്തമാക്കി.

അതേസമയം, കുടിയേറ്റ നിരക്ക് റെക്കോർഡ് ഉയരത്തിലാണെന്നും സ്ഥിരതാമസം എന്നത് സ്വാഭാവിക അവകാശമല്ല മറിച്ച് സമ്പാദിച്ചെടുക്കേണ്ടതാണെന്നുമാണ് യുകെ സർക്കാർ വക്താവിന്റെ നിലപാട്. ആഭ്യന്തര സെക്രട്ടറി ഷബാന മഹ്മൂദ് ഉൾപ്പെടെയുള്ളവർ ഈ പരിഷ്കാരങ്ങളെ ശക്തമായി ന്യായീകരിക്കുന്നുണ്ട്. എന്നാൽ മുൻകാല അപേക്ഷകർക്ക് പോലും പുതിയ നിയമം ബാധകമാക്കുന്നതിനെതിരെ ലേബർ പാർട്ടിയിലെ ഭൂരിഭാഗം എംപിമാരും ഇപ്പോൾ രംഗത്തെത്തിയിട്ടുണ്ട്. കെയർ ജീവനക്കാരുടെ വേതനം വർദ്ധിപ്പിക്കണമെന്നും, വിസകൾ ഒരൊറ്റ തൊഴിലുടമയുമായി മാത്രം ബന്ധിപ്പിക്കുന്ന നിലവിലെ ചൂഷണ വ്യവസ്ഥ അവസാനിപ്പിക്കണമെന്നും റെയ്‌നർ സർക്കാരിനോട് ആവശ്യപ്പെട്ടു.

Former Deputy Prime Minister Angela Rayner has strongly criticised the UK government's proposed visa changes, calling the move to extend the permanent residency waiting period for existing care workers to 15 years un-British and unfair.