ഇംഗ്ലീഷ് ചാനൽ വഴിയുള്ള അനധികൃത കുടിയേറ്റം തടയാൻ ബ്രിട്ടനും ഫ്രാൻസും തമ്മിൽ 662 ദശലക്ഷം പൗണ്ടിന്റെ പുതിയ കരാർ

ലണ്ടൻ : ഇംഗ്ലീഷ് ചാനൽ വഴി ചെറിയ ബോട്ടുകളിൽ ബ്രിട്ടനിലേക്ക് എത്തുന്ന കുടിയേറ്റക്കാരെ തടയാൻ ഫ്രാൻസുമായി ചേർന്ന് 662 ദശലക്ഷം പൗണ്ടിന്റെ നിർണ്ണായക കരാറിൽ ബ്രിട്ടൻ ഒപ്പുവെക്കുന്നു. പുതിയ മൂന്ന് വർഷത്തെ കരാറിന്റെ ഭാഗമായി കടൽതീരങ്ങളിൽ സുരക്ഷ ശക്തമാക്കാൻ കലാപ നിയന്ത്രണത്തിൽ വൈദഗ്ധ്യമുള്ള പോലീസുകാരെ വിന്യസിക്കാനാണ് തീരുമാനം. ഹോം സെക്രട്ടറി ഷബാന മഹ്മൂദ് വ്യാഴാഴ്ച ഫ്രാൻസുമായി ഈ കരാറിൽ ഒപ്പുവെക്കും. കുടിയേറ്റക്കാരെ തടയുന്നതിൽ ഫ്രഞ്ച് അധികൃതർ പരാജയപ്പെട്ടാൽ കരാറിലെ 100 ദശലക്ഷം പൗണ്ട് വരെ പിൻവലിക്കുമെന്ന കർശന ഉപാധിയും ഇത്തവണ ബ്രിട്ടൻ മുന്നോട്ടുവെച്ചിട്ടുണ്ട്.

കരാർ പ്രകാരം ഡ്രോണുകൾ, രണ്ട് ഹെലികോപ്റ്ററുകൾ, അത്യാധുനിക ക്യാമറ സംവിധാനങ്ങൾ എന്നിവ ഉപയോഗിച്ച് അനധികൃത കടത്തുകാരെ കണ്ടെത്താനാണ് ഫ്രാൻസ് ലക്ഷ്യമിടുന്നത്. മുൻ വർഷങ്ങളിൽ നൽകിയ തുകയേക്കാൾ കൂടുതൽ ഫണ്ട് ഇത്തവണ അനുവദിക്കുന്നുണ്ട്. ഏകദേശം 1100 സുരക്ഷാ ഉദ്യോഗസ്ഥരെ ഇതിനായി നിയോഗിക്കും. മനുഷ്യക്കടത്ത് സംഘങ്ങളുടെ പ്രവർത്തനങ്ങൾ തകർക്കാനും കടൽമാർഗമുള്ള അപകടകരമായ യാത്രകൾ അവസാനിപ്പിക്കാനും ഈ നീക്കം അനിവാര്യമാണെന്ന് ഹോം സെക്രട്ടറി വ്യക്തമാക്കി.

അതേസമയം, നിബന്ധനകളില്ലാതെ വൻതുക ഫ്രാൻസിന് നൽകുന്നതിനെതിരെ ബ്രിട്ടനിലെ പ്രതിപക്ഷ പാർട്ടികൾ രംഗത്തെത്തിയിട്ടുണ്ട്. ഫ്രാൻസിന്റെ ഭാഗത്തുനിന്നുണ്ടാകുന്ന വീഴ്ചകൾ പരിഹരിക്കാൻ ഈ പണം കൊണ്ട് സാധിക്കില്ലെന്നാണ് കൺസർവേറ്റീവ് പാർട്ടിയും റിഫോം യുകെയും ആരോപിക്കുന്നത്. 2026-ന്റെ തുടക്കം മുതൽ ഇതുവരെ ആറായിരത്തിലധികം കുടിയേറ്റക്കാർ ചെറിയ ബോട്ടുകൾ വഴി ബ്രിട്ടനിൽ എത്തിയ സാഹചര്യത്തിലാണ് പുതിയ സുരക്ഷാ നടപടികൾക്ക് സർക്കാർ തുടക്കം കുറിക്കുന്നത്.

The UK and France have signed a £662m deal to deploy riot police and advanced technology to curb small boat crossings across the English Channel.