ഇംഗ്ലണ്ടിലെ പ്രസവചികിത്സാ രംഗത്ത് ആശങ്ക; മരണനിരക്ക് ഉയരുന്നു

ലണ്ടൻ : ഇംഗ്ലണ്ടിലെ പ്രസവചികിത്സാ സേവനങ്ങളിൽ ഗുരുതരമായ വീഴ്ചകൾ സംഭവിക്കുന്നതായി എൻഎച്ച്എസ് ചീഫ് മിഡ്‌വൈഫ് കേറ്റ് ബ്രിന്റ്‌വർത്ത് സമ്മതിച്ചു. കഴിഞ്ഞ കുറച്ചു വർഷങ്ങളായി ഗർഭകാലത്തോ പ്രസവത്തിന് തൊട്ടുപിന്നാലെയോ മരണപ്പെടുന്ന സ്ത്രീകളുടെ എണ്ണത്തിൽ വർധനവുണ്ടാകുന്നത് രാജ്യത്ത് വലിയ ആശങ്കയ്ക്ക് കാരണമായിട്ടുണ്ട്. ഔദ്യോഗിക കണക്കുകൾ പ്രകാരം 2022 മുതൽ 2024 വരെയുള്ള കാലയളവിൽ 252 മാതൃമരണങ്ങളാണ് റിപ്പോർട്ട് ചെയ്തത്. ഇത് 2009-2011 കാലഘട്ടത്തെ അപേക്ഷിച്ച് 20 ശതമാനം കൂടുതലാണ്. ഓരോ ഒരു ലക്ഷം പ്രസവത്തിലും ശരാശരി 12.8 മരണങ്ങൾ നടക്കുന്നു എന്നത് ആരോഗ്യരംഗത്തെ നിലവിലെ അപര്യാപ്തതകളിലേക്കാണ് വിരൽചൂണ്ടുന്നത്.

മാതൃമരണങ്ങൾ കുറയ്ക്കുന്നതിനായി പ്രസവചികിത്സാ മാനദണ്ഡങ്ങളിൽ അടിമുടി മാറ്റം വരുത്താൻ എൻഎച്ച്എസ് ഇംഗ്ലണ്ട് തീരുമാനിച്ചു. മരണങ്ങളുടെ പ്രധാന കാരണമായ വീനസ് ത്രോംബോ എംബോളിസം അഥവാ രക്തം കട്ടപിടിക്കുന്ന അവസ്ഥ മുൻകൂട്ടി തിരിച്ചറിയാൻ ഗർഭിണികൾക്ക് നേരത്തെ തന്നെ റിസ്ക് അസസ്‌മെന്റ് പരിശോധനകൾ ഉറപ്പാക്കും. കൂടാതെ അപസ്മാരം ബാധിച്ചവർക്ക് പ്രത്യേക ചികിത്സാ പ്ലാനുകൾ, പ്രസവാനന്തര മാനസികാരോഗ്യം മെച്ചപ്പെടുത്തുന്നതിനുള്ള പരിശോധനകൾ, അമിത രക്തസ്രാവം തടയാൻ വിദഗ്ധ ഡോക്ടർമാരുടെ സേവനം എന്നിവയും പുതിയ പദ്ധതിയുടെ ഭാഗമാണ്. 2027 മാർച്ചോടെ ഈ പരിഷ്കാരങ്ങൾ പൂർണ്ണമായും നടപ്പിലാക്കാനാണ് ലക്ഷ്യമിടുന്നത്.

ആരോഗ്യവകുപ്പിന്റെ പ്രഖ്യാപനങ്ങളെ സ്വാഗതം ചെയ്യുമ്പോഴും മെല്ലെപ്പോക്കിനെതിരെ കടുത്ത വിമർശനവുമായി ക്യാംപയിൻ ഗ്രൂപ്പുകൾ രംഗത്തെത്തിയിട്ടുണ്ട്. മെഡിക്കൽ രംഗത്തെ സ്ത്രീവിരുദ്ധ മനോഭാവവും വംശീയമായ വേർതിരിവുകളും മാറ്റിയെടുത്താൽ മാത്രമേ ഇത്തരം മരണങ്ങൾ പൂർണ്ണമായി ഒഴിവാക്കാൻ സാധിക്കൂ എന്ന് ആരോഗ്യ സെക്രട്ടറി വെസ് സ്ട്രീറ്റിംഗ് അഭിപ്രായപ്പെട്ടു. പ്രസവാനന്തരമുള്ള ആത്മഹത്യകൾ, സെപ്‌സിസ്, ഹൃദ്രോഗങ്ങൾ എന്നിവ മൂലമുള്ള മരണങ്ങൾ 52 ശതമാനത്തോളം കുറയ്ക്കാൻ പുതിയ നീക്കങ്ങൾ സഹായിക്കുമെന്നാണ് എൻഎച്ച്എസ് പ്രതീക്ഷിക്കുന്നത്. വരും മാസങ്ങളിൽ കൂടുതൽ കർശനമായ നടപടികൾ ഉണ്ടാകുമെന്ന് ചീഫ് മിഡ്‌വൈഫ് വ്യക്തമാക്കി.

The NHS has announced major reforms to maternity care in England following a 20% rise in maternal deaths over recent years.