മിനിമം വേതനം നിർത്തലാക്കാൻ ബാഡെനോക് ശ്രമിക്കുന്നു: ആഞ്ഞടിച്ച് ബ്രിഡ്ജറ്റ് ഫിലിപ്പ്സൺ
Labour party chair Bridget Phillipson has accused Conservative leader Kemi Badenoch of targeting the poorest workers and wanting to scrap the UK's minimum wage.
ലണ്ടൻ : യുകെയിലെ കൺസർവേറ്റീവ് പാർട്ടി നേതാവ് കെമി ബാഡെനോക് രാജ്യത്തെ ഏറ്റവും ദരിദ്രരായ ജനവിഭാഗങ്ങളെ ദ്രോഹിക്കാനും മിനിമം വേതന വ്യവസ്ഥ നിർത്തലാക്കാനും ശ്രമിക്കുകയാണെന്ന് ലേബർ പാർട്ടി ചെയർപേഴ്സൺ ബ്രിഡ്ജറ്റ് ഫിലിപ്പ്സൺ ആരോപിച്ചു. കൺസർവേറ്റീവ് പാർട്ടിയുടെ പുതിയ സാമ്പത്തിക നയരേഖയിലെ വിപണി കേന്ദ്രീകൃത നിർദേശങ്ങളെയും വേതന നിയന്ത്രണങ്ങൾക്കെതിരായ നിലപാടുകളെയും ചൂണ്ടിക്കാട്ടിയാണ് ഫിലിപ്പ്സൺ കടുത്ത വിമർശനവുമായി രംഗത്തെത്തിയത്.
വേതനം സർക്കാർ നിശ്ചയിക്കുന്ന രീതി ഒഴിവാക്കണമെന്ന തരത്തിലുള്ള ടോറി നയങ്ങൾ തൊഴിലാളികളുടെ സുരക്ഷിതത്വം ഇല്ലാതാക്കുമെന്നും കൺസർവേറ്റീവ് പാർട്ടി ഒരിക്കലും പാഠം പഠിക്കില്ലെന്നും ഫിലിപ്പ്സൺ പറഞ്ഞു. തൊഴിലാളികൾക്ക് ജീവിക്കാനുള്ള ന്യായമായ വേതനം ഉറപ്പാക്കേണ്ട സർക്കാർ സംവിധാനങ്ങളെ ഇല്ലാതാക്കുന്നത് സമ്പദ്‌വ്യവസ്ഥയെയും സാധാരണക്കാരായ ജനങ്ങളുടെ ജീവിതത്തെയും കൂടുതൽ പ്രതിസന്ധിയിലാക്കുമെന്നും അവർ ഓർമ്മിപ്പിച്ചു.
പാർലമെന്റിലും പൊതുവേദിയിലും ഇരുനേതാക്കളും തമ്മിൽ നിലനിൽക്കുന്ന രാഷ്ട്രീയ ഭിന്നതകൾക്ക് പുതിയ മാനങ്ങൾ നൽകുന്നതാണ് ഈ തർക്കം. ലേബർ സർക്കാരിന്റെ തൊഴിൽ സംരക്ഷണ നിയമങ്ങളെയും സാമ്പത്തിക പരിഷ്കാരങ്ങളെയും ബിസിനസ് വിരുദ്ധമെന്ന് ബാഡെനോക് വിശേഷിപ്പിച്ചപ്പോൾ, പാവപ്പെട്ട തൊഴിലാളികളുടെ അവകാശങ്ങൾ ഇല്ലാതാക്കാനാണ് കൺസർവേറ്റീവുകൾ ശ്രമിക്കുന്നതെന്ന് തിരിച്ചടിച്ച് ഫിലിപ്പ്സൺ തർക്കം കൂടുതൽ രൂക്ഷമാക്കി.
