ബ്രിട്ടനിലെ കടകളിലെ വിലക്കയറ്റം രണ്ടുവർഷത്തെ ഉയർന്ന നിലയിൽ; കുടുംബ ബജറ്റിന് വീണ്ടും തിരിച്ചടി

ലണ്ടൻ : ബ്രിട്ടനിലെ റീട്ടെയിൽ കടകളിലെ വിലക്കയറ്റം ഓഗസ്റ്റിൽ രണ്ടുവർഷത്തിനിടയിലെ ഏറ്റവും ഉയർന്ന നിലയിലെത്തി. ബ്രിട്ടീഷ് റീട്ടെയിൽ കൺസോർട്ടിയത്തിനായി NIQ നടത്തിയ പഠനമനുസരിച്ച്, കടകളിലെ വിലകൾ ഓഗസ്റ്റിൽ വാർഷികാടിസ്ഥാനത്തിൽ 1.5 ശതമാനം ഉയർന്നു. ജൂലൈയിൽ ഇത് 0.9 ശതമാനമായിരുന്നു. ടിന്നിലടച്ചതും പാക്ക് ചെയ്തതുമായ ഭക്ഷ്യവസ്തുക്കളുടെ വിലയാണ് പ്രധാനമായും ഉയർന്നത്. ഈ വിഭാഗത്തിലെ വിലക്കയറ്റം ജൂലൈയിലെ 1.1 ശതമാനത്തിൽ നിന്ന് ഓഗസ്റ്റിൽ 2.5 ശതമാനമായി വർധിച്ചു.

ചൂടും വരൾച്ചയും കൃഷിയെയും വിളവിനെയും ബാധിച്ചതിനൊപ്പം ഉയർന്ന ഇന്ധന, ഊർജ ചെലവുകളും ഭക്ഷ്യവില വർധനയ്ക്ക് കാരണമാകുന്നു. പഴങ്ങളും പച്ചക്കറികളും ഉൾപ്പെടെയുള്ള ഫ്രഷ് ഉൽപ്പന്നങ്ങളുടെ വിലക്കയറ്റം ഓഗസ്റ്റിൽ 3 ശതമാനമായി. ഉയർന്ന ഊർജ, ഉൽപ്പാദന, ഗതാഗത ചെലവുകളുടെ പ്രതിഫലനം ഇപ്പോൾ ഉൽപ്പന്നവിലകളിൽ കൂടുതൽ പ്രകടമാകുകയാണെന്ന് ബ്രിട്ടീഷ് റീട്ടെയിൽ കൺസോർട്ടിയം ചീഫ് എക്സിക്യൂട്ടീവ് ഹെലൻ ഡിക്കിൻസൺ പറഞ്ഞു. പ്രത്യേകിച്ച് ഇറക്കുമതി ചെയ്ത് സംസ്‌കരിക്കുന്ന ഭക്ഷ്യവസ്തുക്കളെയാണ് ചെലവേറിയത് കൂടുതലായി ബാധിക്കുന്നതെന്നും അവർ വ്യക്തമാക്കി. അതേസമയം, എഐ മേഖലയിലെ വൻ ഡിമാൻഡ് മെമ്മറി ചിപ്പുകളുടെയും ഡാറ്റ സ്റ്റോറേജിന്റെയും വില ഉയർത്തിയതോടെ ഇലക്ട്രിക്കൽ ഉൽപ്പന്നങ്ങൾക്കും വില വർധിച്ചു.

വരുന്ന മാസങ്ങളിൽ കുടുംബങ്ങൾക്ക് സാമ്പത്തിക സമ്മർദം കൂടുതൽ ശക്തമാകാനാണ് സാധ്യതയെന്നാണ് മുന്നറിയിപ്പ്. ഉയർന്ന ഊർജ ബില്ലുകൾ പ്രതീക്ഷിച്ച് ഉപഭോക്താക്കൾ ചെലവുകളിൽ കൂടുതൽ ജാഗ്രത പുലർത്തുന്നതിനാൽ ശരത്കാല മാസങ്ങളിൽ റീട്ടെയിലർമാർ തമ്മിലുള്ള വിലമത്സരം ശക്തമാകുമെന്ന് NIQ റീട്ടെയിലർ ഇൻസൈറ്റ് വിഭാഗം മേധാവി മൈക്ക് വാട്കിൻസ് പറഞ്ഞു. ഇതിനിടെ, ചൂടും വരൾച്ചയും ഗോതമ്പ്, ബാർലി തുടങ്ങിയ ധാന്യങ്ങളുടെ ഉൽപ്പാദനത്തെയും ബാധിച്ചതായി റിപ്പോർട്ടുണ്ട്. രാജ്യത്തെ മൊത്തത്തിലുള്ള ഉപഭോക്തൃ വിലക്കയറ്റവും ജൂലൈയിൽ 2.9 ശതമാനമായി ഉയർന്നിരുന്നു. ഗ്യാസ്, വൈദ്യുതി വില വർധനയ്ക്കൊപ്പം അന്താരാഷ്ട്ര ഊർജവിലയിലെ ഉയർച്ചയും ഇതിന് കാരണമായി.