ഭിന്നശേഷിക്കാരായ യുവാക്കൾക്ക് സർക്കാർ സഹായത്തോടെ ജോലി; ‘ഫ്ലെക്സി ജോബ്സ്’ നിർദേശവുമായി മിൽബേൺ റിപ്പോർട്ട്
ഭിന്നശേഷിക്കാരായ യുവാക്കൾക്ക് സർക്കാർ പിന്തുണയുള്ള ഫ്ലെക്സി ജോബ്സും തൊഴിൽപരിശീലനവും മിൽബേൺ റിപ്പോർട്ട് ശുപാർശ ചെയ്തേക്കും.
ലണ്ടൻ : ഭിന്നശേഷിക്കാരും ദീർഘകാല ആരോഗ്യപ്രശ്നങ്ങൾ നേരിടുന്നവരുമായ യുവാക്കൾക്ക് ശമ്പളത്തോടെയുള്ള തൊഴിലവസരങ്ങൾ സൃഷ്ടിക്കാൻ സർക്കാർ ഇടപെടണമെന്ന് അലൻ മിൽബേണിന്റെ യുവജന തൊഴിൽ അവലോകന റിപ്പോർട്ട് ശുപാർശ ചെയ്യും. ഈ മാസം പ്രസിദ്ധീകരിക്കാനിരിക്കുന്ന റിപ്പോർട്ടിൽ, 16 മുതൽ 24 വയസ്സുവരെയുള്ളവർക്ക് അനുയോജ്യമായ ‘ഫ്ലെക്സി ജോബ്സ്’, തൊഴിൽ സബ്സിഡി, നൈപുണ്യപരിശീലനം എന്നിവ നിർദേശിക്കുമെന്നാണ് വിവരം. യുകെയിൽ വിദ്യാഭ്യാസത്തിലോ ജോലിയിലോ പരിശീലനത്തിലോ ഉൾപ്പെടാത്ത പത്തുലക്ഷത്തോളം യുവാക്കളിൽ 45 ശതമാനം പേർ ഭിന്നശേഷിക്കാരോ ആരോഗ്യപ്രശ്നങ്ങളുള്ളവരോ ആണ്. മറ്റ് യുവാക്കളെ അപേക്ഷിച്ച് ഈ വിഭാഗം വിദ്യാഭ്യാസ–തൊഴിൽ–പരിശീലന മേഖലകൾക്ക് പുറത്താകാനുള്ള സാധ്യത മൂന്നിരട്ടിയാണെന്നും കണക്കുകൾ വ്യക്തമാക്കുന്നു.
ഡെൻമാർക്ക് മാതൃകയിലുള്ള ഫ്ലെക്സി ജോബ് സംവിധാനത്തിലൂടെ വ്യക്തിയുടെ ആരോഗ്യസ്ഥിതിക്കും ശേഷിക്കും അനുയോജ്യമായ ജോലിസമയം അനുവദിക്കുകയും ശമ്പളത്തിന് സർക്കാർ അധിക സഹായം നൽകുകയും ചെയ്യാനാണ് നിർദേശം. ചിലർക്ക് ആഴ്ചയിൽ നാലുമണിക്കൂർ ജോലിയിൽനിന്ന് ആരംഭിക്കാനാകും. ഒരു ജോലിയിലെ വ്യത്യസ്ത ചുമതലകൾ വേർതിരിച്ച് വിവിധ വ്യക്തികൾക്ക് അനുയോജ്യമായ അവസരങ്ങളാക്കുന്ന ‘ജോബ് കാർവിങ്’ രീതിയും റിപ്പോർട്ട് മുന്നോട്ടുവയ്ക്കും. കടകളിൽ സാധനങ്ങൾ അടുക്കിവയ്ക്കൽ, ബില്ലിങ്, കട അടയ്ക്കൽ തുടങ്ങിയ ചുമതലകൾ വ്യത്യസ്ത തൊഴിലവസരങ്ങളാക്കുന്നത് ഇതിന് ഉദാഹരണമാണ്. പിന്തുണയോടെയുള്ള ഇന്റേൺഷിപ്പുകൾ, തൊഴിൽപരിശീലനം, വ്യക്തിഗത മാർഗനിർദേശം, ജോലിസ്ഥലത്തെ ആവശ്യമായ ക്രമീകരണങ്ങൾ എന്നിവയും വിപുലപ്പെടുത്താൻ ശുപാർശയുണ്ടാകും.
ഭിന്നശേഷിക്കാരായ യുവാക്കളെ നിയമിക്കുന്നതിന് വലിയ സ്ഥാപനങ്ങൾ സ്വമേധയാ ലക്ഷ്യങ്ങൾ നിശ്ചയിക്കണമെന്നും റിപ്പോർട്ട് ആവശ്യപ്പെടും; നിർബന്ധിത നിയമന ക്വോട്ട നിർദേശിക്കാനിടയില്ല. യുവാക്കൾക്ക് ജോലി ചെയ്യാൻ താൽപര്യമില്ലെന്ന വാദം തള്ളുന്ന മിൽബേൺ, ആവശ്യമായ പിന്തുണയും അവസരങ്ങളും ഒരുക്കേണ്ടത് സർക്കാരിന്റെയും തൊഴിലുടമകളുടെയും ഉത്തരവാദിത്വമാണെന്ന് ചൂണ്ടിക്കാട്ടുന്നു. യുവാക്കളുടെ ഭിന്നശേഷി ആനുകൂല്യങ്ങൾക്കായി വർഷം ചെലവിടുന്ന 400 കോടി പൗണ്ടിൽ ഒരു ഭാഗം തൊഴിൽ–പരിശീലന സഹായത്തിലേക്ക് മാറ്റാമെന്ന അദ്ദേഹത്തിന്റെ നിലപാട് എതിർപ്പിനിടയാക്കിയേക്കും. ആനുകൂല്യങ്ങൾ വെട്ടിക്കുറച്ച് തൊഴിൽപിന്തുണയ്ക്ക് പണം കണ്ടെത്തുന്നത് ദാരിദ്ര്യം വർധിപ്പിക്കാമെന്നാണ് വിമർശകരുടെ ആശങ്ക. റിപ്പോർട്ടിലെ ശുപാർശകൾ സർക്കാർ അംഗീകരിച്ച് നടപ്പാക്കിയ പദ്ധതികളല്ല.
English Summary: The Milburn review will recommend government-backed flexible jobs and expanded employment support for disabled young people.
