ചാൾസ് രാജാവും കാമില റാണിയും: രണ്ട് പതിറ്റാണ്ടിന്റെ ദാമ്പത്യ ദൃഢത

ലണ്ടൻ: ബ്രിട്ടനിലെ ചാൾസ് രാജാവിന്റെയും കാമില റാണിയുടെയും വിവാഹജീവിതം രണ്ട് പതിറ്റാണ്ടിലേക്ക് കടക്കുകയാണ്. ഇരുവരുടെയും ദൃഢമായ ബന്ധവും അതിന്റെ സ്ഥിരതയും വിളിച്ചോതുന്ന കഥയാണ് കൊട്ടാരത്തിലെ ഒരു ജീവനക്കാരൻ പങ്കുവെക്കുന്നത്. ഈ ദമ്പതികളുടെ ബന്ധത്തെ കൂടുതൽ ശക്തമാക്കുന്ന ഘടകങ്ങൾ എന്തൊക്കെയാണെന്ന് അവർ വ്യക്തമാക്കുന്നു.

കാമിലയ്ക്ക് വിൽറ്റ്ഷറിൽ സ്വന്തമായി ഒരു മനോഹര വീടുണ്ട്. ആദ്യ ഭർത്താവായ ആൻഡ്രൂ പാർക്കർ ബൗൾസുമായുള്ള വിവാഹമോചനത്തിനു ശേഷം അവർ വാങ്ങിയതാണ് ഈ ബ്രിട്ടിഷ് ക്ലാസിക്കൽ ശൈലിയിൽ പണിതീർത്ത വസതി. രാജകീയ ജീവിതത്തിന്റെ തിരക്കുകൾക്കിടയിൽ ഇടവേള ആവശ്യമായി വരുമ്പോൾ കാമില ഈ വീട്ടിലേക്ക് മടങ്ങാറുണ്ട്. അതേസമയം, ചാൾസ് രാജാവിന് ബ്രിട്ടനിലുടനീളം നിരവധി വീടുകൾ സ്വന്തമായുണ്ട്. ഒരിക്കൽ വിൽറ്റ്ഷറിൽ കാമിലയുടെ വീടിനു സമീപം ഒരു കല്യാണ ഓഡിറ്റോറിയം നിർമിക്കാൻ പദ്ധതിയുണ്ടായിരുന്നു. എന്നാൽ, റാണിയുടെ സ്വകാര്യതയ്ക്ക് ഭംഗം വരുമെന്ന് ഭയന്ന് ചാൾസ് ആ സ്ഥലം സ്വന്തമാക്കുകയായിരുന്നു.

ചാൾസും കാമിലയും സ്വന്തം സ്വാതന്ത്ര്യവും ഏകാന്തതയും ആഗ്രഹിക്കുന്നവരാണെന്ന് ജീവനക്കാരൻ വെളിപ്പെടുത്തുന്നു. ഈ താൽപര്യങ്ങളെ ഇരുവരും പരസ്പരം മാനിക്കുകയും അംഗീകരിക്കുകയും ചെയ്യുന്നു. ഇവർക്ക് സ്വന്തമായ സുഹൃത്തുക്കളും സാമൂഹിക പരിപാടികളുമുണ്ട്. എല്ലായിടത്തും ഇവർ ഒന്നിച്ചല്ല പോകുന്നത്. പരസ്പരം സ്വാതന്ത്ര്യം നൽകുന്നതിൽ ഇരുവരും ശ്രദ്ധാലുക്കളാണെന്നാണ് വിലയിരുത്തൽ.

ഏപ്രിൽ 9നാണ് ചാൾസിന്റെയും കാമിലയുടെയും 20-ാം വിവാഹവാർഷികം. 2005ലാണ് ഇരുവരും വിവാഹിതരായത്. ചാൾസിന്റെ ആദ്യ വിവാഹം 1981 മുതൽ 1996 വരെ ലോകപ്രശസ്തയായ ഡയാന രാജകുമാരിയുമായി നീണ്ടുനിന്നിരുന്നു. കാമിലയാകട്ടെ, മിലിറ്ററി ഓഫിസറായ ആൻഡ്രൂ പാർക്കർ ബൗൾസിനെ വിവാഹം കഴിച്ച് 22 വർഷം ഒന്നിച്ചു ജീവിച്ചിരുന്നു. ആ വിവാഹത്തിൽ അവർക്ക് രണ്ട് മക്കളുമുണ്ട്. ഇപ്പോൾ, രണ്ട് പതിറ്റാണ്ടിന്റെ ഒത്തൊരുമയോടെ ചാൾസും കാമിലയും ബ്രിട്ടന്റെ രാജകീയ ചരിത്രത്തിൽ തങ്ങളുടേതായ ഇടം ഉറപ്പിക്കുകയാണ്.