യുകെയിലെ പ്രമുഖ ആശുപത്രിയിൽ വൻ അനാസ്ഥ; മൃതദേഹങ്ങൾ അഴുകിയ നിലയിൽ.

യുകെയിലെ പ്രശസ്തമായ നോട്ടിംഗ്ഹാം യൂണിവേഴ്‌സിറ്റി ഹോസ്പിറ്റൽസ് എൻഎച്ച്എസ് ട്രസ്റ്റിന് കീഴിലുള്ള ക്വീൻസ് മെഡിക്കൽ സെന്റർ മോർച്ചറിയിൽ അതീവ ഗുരുതരമായ സുരക്ഷാവീഴ്ചകളും അനാസ്ഥയും കണ്ടെത്തി. മോർച്ചറിയിലെ ഫ്രീസറുകളിൽ ആവശ്യത്തിന് സ്ഥലമില്ലാതായതിനെ തുടർന്ന് എട്ടോളം മൃതദേഹങ്ങൾ അഴുകിയ നിലയിലാണ് കണ്ടെത്തിയത്. ഹ്യൂമൻ ടിഷ്യൂ അതോറിറ്റി നടത്തിയ അപ്രതീക്ഷിത പരിശോധനയിലാണ് ഈ ഞെട്ടിക്കുന്ന വിവരങ്ങൾ പുറത്തുവന്നത്. കൃത്യമായ ഐഡന്റിറ്റി പരിശോധനകൾ നടത്താത്തതിനാൽ ബന്ധുക്കൾക്ക് മാറി മൃതദേഹം വിട്ടുനൽകാൻ വരെ സാധ്യതയുള്ള വലിയ വീഴ്ചയാണ് ഇവിടെ നിലനിന്നിരുന്നതെന്നും പരിശോധനാ റിപ്പോർട്ടിൽ വ്യക്തമാക്കുന്നുണ്ട്.
ഈ ആശുപത്രിയിലെ മോശം അവസ്ഥയെക്കുറിച്ച് അന്വേഷിച്ച ഇൻഡിപെൻഡന്റ് മെറ്റേണിറ്റി റിവ്യൂ ചെയർമാൻ ഡോണ ഒക്കെൻഡൻ മോർച്ചറിയിലെ ക്രമക്കേടുകളെ രൂക്ഷമായി വിമർശിച്ചു. മുൻപ് ഒരു കുഞ്ഞിന്റെ മൃതദേഹം മെഡിക്കൽ മാലിന്യമായി തള്ളിയതും മൃതദേഹങ്ങൾ മാറി നൽകിയതുമുൾപ്പെടെ അതീവ ഗുരുതരമായ നിരവധി വീഴ്ചകളാണ് മുൻകാലങ്ങളിൽ ഇവിടെ സംഭവിച്ചിട്ടുള്ളത്. മരിച്ചവരോട് ഒട്ടും ആദരവ് കാണിക്കാത്ത രീതിയിലുള്ള ഇത്തരം നിരന്തരമായ അനാസ്ഥകൾ യുകെയിലെ മലയാളി സമൂഹം ഉൾപ്പെടെയുള്ള പ്രവാസികൾക്കിടയിലും വലിയ ചർച്ചയായിട്ടുണ്ട്.
സംഭവവുമായി ബന്ധപ്പെട്ട് ഔദ്യോഗിക പദവി ദുരുപയോഗം ചെയ്തെന്ന കുറ്റത്തിന് രണ്ട് ജീവനക്കാരെ പോലീസ് അറസ്റ്റ് ചെയ്ത് ജാമ്യത്തിൽ വിട്ടു. 2023 മുതൽ ഈ ആശുപത്രിയിലെ കുഞ്ഞുങ്ങളുടെ മരണങ്ങളുമായി ബന്ധപ്പെട്ട് 'ഓപ്പറേഷൻ പെർത്ത്' എന്ന പേരിൽ പോലീസ് വിപുലമായ അന്വേഷണം നടത്തിവരികയായിരുന്നു. അതേസമയം, തങ്ങളുടെ ഭാഗത്തുനിന്നുണ്ടായ വലിയ തെറ്റുകൾക്ക് ആശുപത്രി അധികൃതർ പരസ്യമായി മാപ്പ് അപേക്ഷിക്കുകയും നിലവിൽ മോർച്ചറിയിലെ സൗകര്യങ്ങൾ മെച്ചപ്പെടുത്താൻ അടിയന്തര ആക്ഷൻ പ്ലാൻ നടപ്പിലാക്കി തുടങ്ങിയതായും അറിയിച്ചു.