ബ്രിട്ടനിലെ ആശുപത്രികളിൽ ബെഡ്ഡില്ലാതെ രോഗികൾ ദുരിതത്തിൽ; പ്രതിദിനം മൂവായിരത്തോളം പേർ ഇടനാഴികളിൽ ചികിത്സയിലെന്ന് റിപ്പോർട്ട്

ലണ്ടൻ: ബ്രിട്ടനിലെ നാഷണൽ ഹെൽത്ത് സർവീസ് നേരിടുന്ന കടുത്ത പ്രതിസന്ധികൾ വെളിപ്പെടുത്തിക്കൊണ്ട് ആശുപത്രികളിൽ നിന്നുള്ള ഞെട്ടിക്കുന്ന ഔദ്യോഗിക വിവരങ്ങൾ പുറത്ത്. ഇംഗ്ലണ്ടിലെ ആശുപത്രികളിൽ പ്രതിദിനം മൂവായിരത്തോളം രോഗികൾ വാർഡുകളിൽ ബെഡ് ലഭിക്കാതെ ഇടനാഴികളിലും കാർ പാർക്കുകളിലും ഉൾപ്പെടെയുള്ള താൽക്കാലിക കേന്ദ്രങ്ങളിലും കിടക്കേണ്ടി വരുന്നു എന്നാണ് കണക്കുകൾ വ്യക്തമാക്കുന്നത്. ചരിത്രത്തിൽ ആദ്യമായാണ് എൻഎച്ച്എസ് ഇത്തരമൊരു റിപ്പോർട്ട് പരസ്യപ്പെടുത്തുന്നത്. ഈ സാഹചര്യം അങ്ങേയറ്റം അപകടകരവും അസ്വീകാര്യവുമാണെന്ന് ഭരണാധികാരികളും ആരോഗ്യ മേഖലയിലുള്ളവരും ഒരുപോലെ സമ്മതിക്കുന്നു.

അടിയന്തിര വിഭാഗത്തിൽ എത്തുന്ന രോഗികളിൽ വലിയൊരു ശതമാനം ആളുകളും 45 മിനിറ്റിൽ കൂടുതൽ വരാന്തകളിൽ ചികിത്സയ്ക്കായി കാത്തു കിടക്കേണ്ടി വരുന്നുണ്ട്. സാധാരണഗതിയിൽ വലിയ തിരക്ക് അനുഭവപ്പെടാത്ത മേയ് മാസത്തിൽ ഇത്തവണ കടുത്ത ഉഷ്ണതരംഗം ഉണ്ടായതാണ് രോഗികളുടെ എണ്ണം വർദ്ധിക്കാൻ കാരണമായി അധികൃതർ ചൂണ്ടിക്കാണിക്കുന്നത്. എന്നാൽ രാജ്യത്തെ ഭൂരിഭാഗം കേസുകളും ഏതാനും ചില നിർദ്ദിഷ്ട ഹോസ്പിറ്റൽ ട്രസ്റ്റുകളിലാണ് കേന്ദ്രീകരിച്ചിരിക്കുന്നത്. വരും വർഷങ്ങളിൽ ഈ ദുരവസ്ഥ പൂർണ്ണമായും ഇല്ലാതാക്കുമെന്ന ശക്തമായ പ്രഖ്യാപനവുമായി ഹെൽത്ത് സെക്രട്ടറി ജെയിംസ് മറെ രംഗത്തെത്തിയിട്ടുണ്ട്.

ആശുപത്രി ഇടനാഴികൾ യുദ്ധക്കളത്തിന് സമാനമാണെന്നാണ് അവിടെ സേവനം അനുഷ്ഠിക്കുന്ന ജീവനക്കാരും രോഗികളും സാക്ഷ്യപ്പെടുത്തുന്നത്. മതിയായ പരിചരണവും സ്വകാര്യതയും ലഭിക്കാതെ മണിക്കൂറുകളോളം വരാന്തകളിൽ കഴിയേണ്ടി വരുന്ന പ്രായമായവരുടെ അവസ്ഥ അതീവ ദയനീയമാണ്. രോഗികളുടെ അന്തസ്സും സുരക്ഷിതത്വവും പൂർണ്ണമായി തകർക്കുന്ന ഈ രീതി ജീവനക്കാരുടെ മാനസികവീര്യത്തെപ്പോലും ബാധിക്കുന്നുണ്ടെന്ന് റോയൽ കോളേജ് ഓഫ് നഴ്സിങ് ഭാരവാഹികൾ വ്യക്തമാക്കി.

English Summary: Official data reveals that nearly 3,000 patients daily are forced to receive treatment in hospital corridors across England due to severe NHS bed shortages.