ഇംഗ്ലണ്ടിലെ പബുകൾക്ക് ബിസിനസ് നിരക്കിൽ 20 ശതമാനം ഇളവ്

ലണ്ടൻ : ഇംഗ്ലണ്ടിലെ പബുകൾക്ക് നൽകുന്ന ബിസിനസ് നിരക്കിൽ 20 ശതമാനം ഇളവ് പ്രഖ്യാപിച്ച് സർക്കാർ. ഉയർന്ന പ്രവർത്തനച്ചെലവും വൈദ്യുതി നിരക്കും ശമ്പളച്ചെലവും കാരണം പ്രതിസന്ധിയിലായ പബ് മേഖലയെ പിന്തുണയ്ക്കുന്നതിനായാണ് നടപടി. നിരവധി ചെറുകിട സ്ഥാപനങ്ങൾക്ക് തീരുമാനം സാമ്പത്തിക ആശ്വാസമാകുമെന്നാണ് വിലയിരുത്തൽ.

പബുകൾ പ്രാദേശിക സമൂഹങ്ങളുടെ പ്രധാന കേന്ദ്രങ്ങളാണെന്നും അവയുടെ നിലനിൽപ്പ് സംരക്ഷിക്കേണ്ടത് അനിവാര്യമാണെന്നും സർക്കാർ വ്യക്തമാക്കി. പുതിയ ഇളവിലൂടെ സ്ഥാപനങ്ങളുടെ വാർഷിക നികുതി ബാധ്യത കുറയുകയും ജീവനക്കാരെ നിലനിർത്തുന്നതിനും സേവനങ്ങൾ തുടരുന്നതിനും സഹായമാകുകയും ചെയ്യും.

അതേസമയം, ഇളവ് സ്വാഗതാർഹമാണെങ്കിലും ഭക്ഷ്യവില, ഊർജ ചെലവ്, ശമ്പള വർധന എന്നിവ മൂലമുള്ള സമ്മർദം ഇപ്പോഴും തുടരുകയാണെന്ന് വ്യവസായ പ്രതിനിധികൾ ചൂണ്ടിക്കാട്ടി. ഹോസ്പിറ്റാലിറ്റി മേഖലയ്ക്കായി കൂടുതൽ ദീർഘകാല സഹായനടപടികൾ വേണമെന്ന ആവശ്യവും ശക്തമാണ്.

English Summary: Pubs in England are set to receive a 20% cut in business rates.