ലണ്ടനിൽ ഡ്രൈവറില്ലാ ടാക്സികളുടെ എണ്ണം നിയന്ത്രിക്കണം; തൊഴിലും ഗതാഗതക്കുരുക്കും ചൂണ്ടിക്കാട്ടി സാദിഖ് ഖാൻ
ഡ്രൈവറില്ലാ ടാക്സികളുടെ എണ്ണം നിയന്ത്രിക്കണമെന്നും തൊഴിൽ, ഗതാഗതക്കുരുക്ക്, വായുഗുണനിലവാരം എന്നിവയിലെ സ്വാധീനം പരിശോധിക്കണമെന്നും ലണ്ടൻ മേയർ സാദിഖ് ഖാൻ.
ലണ്ടൻ : നഗരത്തിൽ സർവീസ് നടത്താനൊരുങ്ങുന്ന ഡ്രൈവറില്ലാ ടാക്സികളുടെ എണ്ണത്തിന് പരിധി നിശ്ചയിക്കണമെന്ന് ലണ്ടൻ മേയർ സാദിഖ് ഖാൻ. പൂർണമായും സ്വയം ഓടുന്ന വാഹനങ്ങൾക്ക് പ്രവർത്തനാനുമതി നൽകാൻ യുകെ സർക്കാർ തയ്യാറെടുക്കുന്നതിനിടെയാണ് മേയറുടെ ആവശ്യം. ഇത്തരം വാഹനങ്ങൾ ഗതാഗതക്കുരുക്ക്, വായുവിന്റെ ഗുണനിലവാരം, ടാക്സി ഡ്രൈവർമാരുടെ തൊഴിൽ എന്നിവയെ എങ്ങനെ ബാധിക്കുമെന്നതിൽ വ്യക്തത വേണമെന്ന് അദ്ദേഹം പറഞ്ഞു. മതിയായ നിയന്ത്രണങ്ങൾ ഉറപ്പാക്കിയശേഷം ഘട്ടംഘട്ടമായി മാത്രമേ സർവീസ് വ്യാപിപ്പിക്കാവൂ എന്നും ട്രാൻസ്പോർട്ട് ഫോർ ലണ്ടന് കൂടുതൽ നിയന്ത്രണാധികാരം നൽകണമെന്നും ഖാൻ ആവശ്യപ്പെട്ടു.
ലിഫ്റ്റിന്റെ ഉടമസ്ഥതയിലുള്ള ഫ്രീനൗ, ചൈനീസ് കമ്പനിയായ ബൈഡുവിന്റെ ‘അപ്പോളോ ഗോ’ വാഹനങ്ങൾ ഉപയോഗിച്ച് അടുത്തവർഷംതന്നെ പൂർണമായും ഡ്രൈവറില്ലാത്ത ടാക്സി സർവീസ് ആരംഭിക്കാനാണ് ലക്ഷ്യമിടുന്നത്. ലണ്ടനിലെ ബ്രെന്റിൽ ഏകദേശം 24 വാഹനങ്ങൾ പരീക്ഷിച്ചുവരികയാണ്. അതേസമയം, സുരക്ഷയ്ക്കായി മുൻസീറ്റിൽ ഡ്രൈവറെ ഇരുത്തി വേവ് കമ്പനിയുടെ സ്വയം ഓടുന്ന കാറുകളിൽ യൂബർ സെപ്റ്റംബറിൽ പരിമിതമായ യാത്രാസേവനം ആരംഭിച്ചിരുന്നു. അമേരിക്കയിൽ റോബോടാക്സി സർവീസ് നടത്തുന്ന വേമോയും ലണ്ടനിൽ പ്രവർത്തനം ആരംഭിക്കാൻ താൽപര്യം പ്രകടിപ്പിച്ചിട്ടുണ്ട്. തൊഴിൽ നഷ്ടപ്പെടുമെന്ന ആശങ്കയിൽ ഡ്രൈവർ സംഘടനകൾ സമീപകാലത്ത് പ്രതിഷേധങ്ങളും സംഘടിപ്പിച്ചു.
നിലവിലെ സംവിധാനത്തിൽ ഇത്തരം വാഹനങ്ങൾ ലണ്ടനിൽ ഉപയോഗിക്കുന്നതിന് അനുമതി നൽകാനോ നിരസിക്കാനോ മാത്രമാണ് ട്രാൻസ്പോർട്ട് ഫോർ ലണ്ടന് അധികാരമുള്ളത്; റോബോടാക്സി സർവീസുകൾക്ക് ലൈസൻസ് നൽകാനും അവയുടെ പ്രവർത്തനം നിയന്ത്രിക്കാനുമുള്ള അധികാരമില്ല.
English Summary: London mayor Sadiq Khan has called for limits on driverless taxis and stronger regulatory powers amid concerns over jobs, congestion and air quality.
