ഭക്ഷ്യവ്യാപാരത്തിലെ ബ്രെക്സിറ്റ് തടസ്സങ്ങൾ നീക്കാൻ യുകെ–ഇയു കരട് കരാർ
ഭക്ഷ്യ–കാർഷിക വ്യാപാര പരിശോധനകളും രേഖാനടപടികളും ഒഴിവാക്കാനുള്ള യുകെ–ഇയു കരട് കരാർ അംഗരാജ്യങ്ങളുടെ പരിഗണനയിൽ; അന്തിമ അംഗീകാരം ലഭിച്ചിട്ടില്ല.
ലണ്ടൻ : ബ്രെക്സിറ്റിനുശേഷം ഭക്ഷ്യ–കാർഷിക ഉൽപന്നങ്ങളുടെ വ്യാപാരത്തിൽ ഏർപ്പെടുത്തിയ പരിശോധനകളും രേഖാനടപടികളും ഒഴിവാക്കാനുള്ള കരട് കരാറിൽ യുകെയും യൂറോപ്യൻ യൂണിയനും ധാരണയിലെത്തി. ഈ മാസം നടക്കുന്ന യുകെ–ഇയു ഉച്ചകോടിക്ക് മുന്നോടിയായി തയ്യാറാക്കിയ ഇരുനൂറോളം പേജുള്ള കരട് അംഗരാജ്യങ്ങളുടെ പരിഗണനയ്ക്കായി കൈമാറിയിട്ടുണ്ട്. ഭക്ഷ്യസുരക്ഷയും മൃഗ–സസ്യാരോഗ്യ മാനദണ്ഡങ്ങളും സംബന്ധിച്ച ‘എസ്പിഎസ്’ കരാർ പ്രാബല്യത്തിലായാൽ ഇറക്കുമതി–കയറ്റുമതിക്കാർ നേരിടുന്ന ചെലവും അതിർത്തിയിലെ കാലതാമസവും കുറയുമെന്നാണ് പ്രതീക്ഷ. പ്രതിവർഷം 510 കോടി പൗണ്ടിന്റെ സാമ്പത്തിക നേട്ടം ക്രമേണ ലഭിക്കുമെന്നാണ് സർക്കാരിന്റെ കണക്ക്. എന്നാൽ കരാറിന് അന്തിമ അംഗീകാരം ലഭിച്ചിട്ടില്ല.
കരാറിലൂടെ 200 പൗണ്ട് ചെലവുള്ള കയറ്റുമതി ആരോഗ്യ സർട്ടിഫിക്കറ്റ്, 25 പൗണ്ടിന്റെ സസ്യാരോഗ്യ സർട്ടിഫിക്കറ്റ്, പരിശോധനാ–സാമ്പിൾ ഫീസുകൾ, ചില തുറമുഖ ഫീസുകൾ തുടങ്ങിയവ ഒഴിവാക്കാനാകും. സോസേജുകൾ, ബർഗറുകൾ, ബ്രിട്ടീഷ് ജലാശയങ്ങളിൽനിന്നുള്ള കക്കവർഗങ്ങൾ, വിത്തുരുളക്കിഴങ്ങ് എന്നിവയുടെ ഇയു കയറ്റുമതി പുനരാരംഭിക്കാനും വഴിയൊരുങ്ങും. വളർത്തുമൃഗങ്ങളെ ഇയുവിലേക്ക് കൊണ്ടുപോകുന്നതിനുള്ള പെറ്റ് പാസ്പോർട്ട് സംവിധാനവും കരാറിൽ ഉൾപ്പെടുന്നു. പകരമായി ഭക്ഷ്യ–കാർഷിക വ്യാപാരവുമായി ബന്ധപ്പെട്ട നിലവിലുള്ള ഇയു മാനദണ്ഡങ്ങളും ഭാവിയിലെ മാറ്റങ്ങളും യുകെ പിന്തുടരേണ്ടിവരും. ഇതിന് നിയമപരമായ സംവിധാനം ഒരുക്കുന്ന യൂറോപ്യൻ പാർട്ണർഷിപ്സ് ബിൽ സർക്കാർ നേരത്തേ പ്രഖ്യാപിച്ചിട്ടുണ്ട്.
കാർബൺ പുറന്തള്ളൽ വ്യാപാരസംവിധാനങ്ങൾ ബന്ധിപ്പിക്കുന്നതിനും യുവാക്കളുടെ യാത്ര–തൊഴിൽ പദ്ധതിക്കുമുള്ള കരടുകളും അംഗരാജ്യങ്ങൾക്ക് കൈമാറിയിട്ടുണ്ട്. ഇവ നവംബർ നാലിന് ഇയു അംബാസഡർമാരുടെ യോഗത്തിൽ ചർച്ച ചെയ്യും. യുവജന പദ്ധതിയിലെ അംഗസംഖ്യ ഉൾപ്പെടെയുള്ള കാര്യങ്ങളിൽ രാഷ്ട്രീയതലത്തിൽ തീരുമാനമെടുക്കാനുണ്ട്. കാർബൺ വ്യാപാരസംവിധാനങ്ങൾ ബന്ധിപ്പിക്കുന്നത് യുകെ കയറ്റുമതിക്കാർക്ക് ഇയുവിന്റെ പുതിയ കാർബൺ അതിർത്തിനികുതി ഒഴിവാക്കാൻ സഹായിക്കും. ഭക്ഷ്യവ്യാപാര കരാറിനെ കർഷക–സൂപ്പർമാർക്കറ്റ് പ്രതിനിധികൾ സ്വാഗതം ചെയ്തപ്പോൾ ഇയു ചട്ടങ്ങൾ വീണ്ടും പിന്തുടരുന്നതിനെ ബ്രെക്സിറ്റ് അനുകൂലികൾ വിമർശിച്ചു. നിലവിലെ വ്യാപാരബന്ധം പ്രതീക്ഷിച്ച ഫലം നൽകുന്നില്ലെന്ന് വ്യക്തമാക്കിയ ബ്രിട്ടീഷ് ചേംബർസ് ഓഫ് കൊമേഴ്സ്, കസ്റ്റംസ് യൂണിയൻ മുതൽ ഏകവിപണി ബന്ധംവരെയുള്ള സാധ്യതകൾ സർക്കാർ വിലയിരുത്തണമെന്ന് ആവശ്യപ്പെട്ടു.
English Summary: The UK and EU have agreed a draft food-trade deal to remove Brexit checks, pending final approval.
