യുകെയിലേക്ക് പോകാനിരുന്ന 300 കുടിയേറ്റക്കാരെ ലിബിയയിൽ തട്ടിക്കൊണ്ടുപോയി; വൃക്ക നീക്കം ചെയ്യുമെന്ന് ഭീഷണി

യുകെയിലേക്കുള്ള അനധികൃത കുടിയേറ്റ യാത്രയ്ക്കിടെ ഇറാഖി കുർദിസ്ഥാനിൽ നിന്നുള്ള 300-ലധികം യുവാക്കളെ ലിബിയയിൽ ആയുധധാരികളായ മനുഷ്യക്കടത്ത് സംഘം തട്ടിക്കൊണ്ടുപോയി തടവിലാക്കി പീഡിപ്പിച്ചതായി ഞെട്ടിക്കുന്ന റിപ്പോർട്ട്. മനുഷ്യക്കടത്ത് സംഘത്തിന് വൻ തുക നൽകി യുകെ ലക്ഷ്യമാക്കി കഴിഞ്ഞ വേനൽക്കാലത്ത് യാത്ര തിരിച്ചവരാണ് ക്രൂരമായ കെണിയിൽ അകപ്പെട്ടത്. മെഡിറ്ററേനിയൻ തീരം വഴി ഇവരെ ലക്ഷ്യസ്ഥാനത്ത് എത്തിക്കേണ്ടതിന് പകരം തടവിലാക്കിയ സംഘം, ഇവരുടെ കുടുംബങ്ങളിൽ നിന്ന് 5,000 ഡോളർ വീതം മോചനദ്രവ്യം ആവശ്യപ്പെടുകയായിരുന്നു. പണം നൽകിയില്ലെങ്കിൽ യുവാക്കളുടെ വൃക്കകൾ നീക്കം ചെയ്ത് വിൽക്കുമെന്നായിരുന്നു തട്ടിക്കൊണ്ടുപോയവരുടെ ഭീഷണി.

മാസങ്ങളോളം നീണ്ട നരകയാതനയ്ക്കൊടുവിൽ തടവിൽ നിന്ന് മോചിതരായ ചിലർ നൽകിയ വിവരങ്ങൾ കേട്ട് അന്താരാഷ്ട്ര സമൂഹം ഒന്നടങ്കം ഞെട്ടിയിരിക്കുകയാണ്. നൂറ്റിഎൺപതോളം പേരെ വായുസഞ്ചാരമില്ലാത്ത ഒരു ചെറിയ മുറിയിലാണ് ഒരുമിച്ച് അടച്ചിട്ടിരുന്നതെന്നും മാസങ്ങളോളം ഇവർക്ക് സൂര്യപ്രകാശം പോലും കാണാൻ കഴിഞ്ഞില്ലെന്നും മോചിതരായവർ വെളിപ്പെടുത്തി. ദിവസത്തിൽ ഒരു കഷണം അപ്പം മാത്രമാണ് ഇവർക്ക് ഭക്ഷണമായി നൽകിയിരുന്നത്. ശുചിമുറി ഉപയോഗിക്കാൻ വൈകിയാൽ പോലും ക്രൂരമായ മർദനമാണ് നേരിടേണ്ടി വന്നത്. പീഡനത്തിനിടയിൽ ഒരാൾ മരിച്ചതായി സ്ഥിരീകരിച്ചിട്ടുണ്ടെങ്കിലും എത്രപേർ ഇപ്പോഴും തടവിൽ തുടരുന്നു എന്ന കാര്യത്തിൽ വ്യക്തതയില്ല. ചിലരുടെ വൃക്കകൾ ഇതിനകം നീക്കം ചെയ്തതായി സംശയിക്കുന്ന ചിത്രങ്ങൾ പുറത്തുവന്നിട്ടുണ്ടെങ്കിലും ഇത് ഔദ്യോഗികമായി സ്ഥിരീകരിച്ചിട്ടില്ല.

അതിനിടെ, ഇറാഖി സർക്കാരിന്റെ ശക്തമായ ഇടപെടലിനെ തുടർന്ന് മോചിതരായ നൂറിലധികം പേരെ ജനുവരിയിൽ ജന്മനാട്ടിലേക്ക് തിരിച്ചയച്ചു. മനുഷ്യക്കടത്ത് സംഘങ്ങളുടെ നിയന്ത്രണത്തിലുള്ള ലിബിയൻ യാത്രാമാർഗങ്ങൾ അതീവ അപകടകരമാണെന്ന് അന്താരാഷ്ട്ര സുരക്ഷാ വിദഗ്ധർ ആവർത്തിച്ച് മുന്നറിയിപ്പ് നൽകുന്നുണ്ട്. എന്നിട്ടും യുകെയിലേക്കും യൂറോപ്യൻ രാജ്യങ്ങളിലേക്കും കടക്കാനുള്ള ഇത്തരം അനധികൃത ശ്രമങ്ങൾ തുടരുന്നത് കുർദിസ്ഥാൻ അധികൃതരെ വല്ലാതെ ആശങ്കപ്പെടുത്തുന്നുണ്ട്. വലിയ തുക കടം വാങ്ങിയും ജീവിതസമ്പാദ്യം മുഴുവൻ നൽകിയും യുവാക്കൾ സ്വന്തം ജീവൻ പണയം വെക്കുന്ന ഇത്തരം അപകടകരമായ യാത്രകൾ അവസാനിപ്പിക്കാൻ കർശനമായ ബോധവത്കരണം ആവശ്യമാണെന്ന് അധികൃതർ വ്യക്തമാക്കി.

More than 300 Iraqi Kurdistan migrants bound for the UK were abducted and tortured by human traffickers in Libya, who threatened to harvest their organs if a ransom was not paid.