യുകെ മലയാളി സമൂഹത്തെ ദുഃഖത്തിലാഴ്ത്തി കുഞ്ഞുമാലാഖയുടെ വേർപാട്; നാലുവയസ്സുകാരി ഹെലൻ റോസിന് വിട

ലണ്ടൻ : യുകെയിലെ മലയാളി സമൂഹത്തെ ദുഃഖത്തിലാഴ്ത്തി നാലുവയസുകാരി ഹെലൻ റോസിന്റെ വിയോഗം. കണ്ണൂർ കാക്കയങ്ങാട് സ്വദേശികളായ അബിൻ ടോം–ക്ലാരിറ്റ് ജോർജ് ദമ്പതികളുടെ ഇളയ മകളായ ഹെലൻ ചികിത്സയിലിരിക്കെയാണ് മരണത്തിന് കീഴടങ്ങിയത്. ഒരു വർഷം മുമ്പാണ് ഹെലനും ഏഴുവയസ്സുകാരനായ സഹോദരൻ ജുവാനും മാതാപിതാക്കൾക്കൊപ്പം യുകെയിലെത്തിയത്.

കഴിഞ്ഞ ബുധനാഴ്ച രാത്രി കട്ടിലിൽ നിന്ന് വീണതിനെ തുടർന്ന് അസ്വസ്ഥത അനുഭവപ്പെട്ട ഹെലനെ ആദ്യം നോർവിച്ചിലെ ആശുപത്രിയിലും പിന്നീട് വിദഗ്ധ ചികിത്സയ്ക്കായി കേംബ്രിഡ്ജിലെ ആശുപത്രിയിലുമാണ് പ്രവേശിപ്പിച്ചത്. ചികിത്സയ്ക്കിടെ കുട്ടി മരണത്തിന് കീഴടങ്ങുകയായിരുന്നു. മരണാനന്തര നടപടികൾ പൂർത്തിയാക്കിയ ശേഷം മൃതദേഹം നാട്ടിലെത്തിച്ച് സംസ്കരിക്കാനുള്ള ഒരുക്കങ്ങൾ കുടുംബത്തിന്റെയും യുകെയിലെ മലയാളി സമൂഹത്തിന്റെയും നേതൃത്വത്തിൽ പുരോഗമിക്കുകയാണ്.

English Summary: Four-year-old Malayali girl Helen Rose died while undergoing treatment in the UK.