ബ്രൈറ്റണിൽ കത്തി കാട്ടി ഭീഷണി; അക്രമിയെ നാട്ടുകാർ കീഴ്പ്പെടുത്തി

ലണ്ടൻ : ബ്രിട്ടനിലെ വിനോദസഞ്ചാര നഗരമായ ബ്രൈറ്റണിൽ പൊതുനിരത്തിൽ കത്തി കാട്ടി ജനങ്ങളെ ഭീഷണിപ്പെടുത്തിയ അക്രമിയെ നാട്ടുകാർ ചേർന്ന് കീഴ്പ്പെടുത്തി. ആക്രമണത്തിൽ രണ്ട് പേർക്ക് പരിക്കേറ്റു. ശനിയാഴ്ച വൈകുന്നേരം ആറ് മണിയോടെ സിൽവുഡ് റോഡിലാണ് സംഭവം നടന്നത്. പ്രദേശത്ത് ഭീതി വിതച്ച അക്രമിയെ അവിടെയുണ്ടായിരുന്നവർ ചേർന്നാണ് തറയിൽ വീഴ്ത്തി പിടികൂടിയത്.

പരിക്കേറ്റ ഒരാളെ ഗുരുതരമായ പരിക്കുകളോടെ ആശുപത്രിയിൽ പ്രവേശിപ്പിച്ചു. ഇയാളുടെ പരിക്കുകൾ ജീവന് ഭീഷണിയുള്ളതല്ലെന്നും പ്രാഥമിക ചികിത്സയ്ക്ക് ശേഷം ആശുപത്രി വിട്ടതായും പൊലീസ് വ്യക്തമാക്കി. ആക്രമണത്തിൽ പരിക്കേറ്റ രണ്ടാമത്തെയാളുടെ ആരോഗ്യനിലയെക്കുറിച്ചുള്ള കൂടുതൽ വിവരങ്ങൾ അധികൃതർ പുറത്തുവിട്ടിട്ടില്ല.

സംഭവവുമായി ബന്ധപ്പെട്ട് 33 വയസുകാരനായ പ്രാദേശിക താമസക്കാരനെ വധശ്രമത്തിന് പൊലീസ് അറസ്റ്റ് ചെയ്തു. ആക്രമണത്തിന് ഉപയോഗിച്ച കത്തി സംഭവസ്ഥലത്തുനിന്ന് പൊലീസ് കണ്ടുകെട്ടി. ഏറെ ആശങ്കയുണ്ടാക്കുന്ന സംഭവമാണിതെന്നും ദൃക്സാക്ഷികൾ വിവരങ്ങൾ പങ്കുവെക്കാൻ മുന്നോട്ട് വരണമെന്നും അന്വേഷണ ഉദ്യോഗസ്ഥർ അഭ്യർത്ഥിച്ചു.

English Summary: Two people were injured in Brighton after a knifeman threatening the public was tackled to the ground by bystanders.