തടവുകാരുടെ മോചനത്തെക്കുറിച്ചുള്ള തമാശ; മഹ്മൂദിനും സ്ട്രീറ്റിങ്ങിനും വിമർശനം

ലണ്ടൻ : തടവുകാരുടെ നേരത്തെയുള്ള മോചനപദ്ധതിയെക്കുറിച്ച് തമാശ പറഞ്ഞതിന് ഷബാന മഹ്മൂദിനും വെസ് സ്ട്രീറ്റിങ്ങിനും എതിരെ വിമർശനം ശക്തമായി. പൊതുസുരക്ഷയെയും കുറ്റകൃത്യങ്ങളുടെ ഇരകളെയും ബാധിക്കുന്ന ഗൗരവമുള്ള വിഷയത്തെ ലഘൂകരിച്ചുവെന്നാണ് പ്രതിപക്ഷവും ഇരകളുടെ സംഘടനകളും ആരോപിച്ചത്.

ജയിലുകളിലെ തിരക്ക് നിയന്ത്രിക്കാൻ ആയിരക്കണക്കിന് തടവുകാരെ ശിക്ഷാകാലാവധി പൂർത്തിയാകുന്നതിന് മുമ്പ് മോചിപ്പിച്ചതിനെതിരെ നേരത്തെ തന്നെ പ്രതിഷേധമുണ്ടായിരുന്നു. മോചിതരായ ചിലർ വീണ്ടും കുറ്റകൃത്യങ്ങളിൽ ഏർപ്പെട്ടുവെന്ന റിപ്പോർട്ടുകൾ ആശങ്ക വർധിപ്പിക്കുകയും ചെയ്തു.

പരാമർശങ്ങൾ ഉദ്ദേശപൂർവം ആരെയും വേദനിപ്പിക്കാൻ നടത്തിയതല്ലെന്ന വിശദീകരണം ഉയർന്നിട്ടുണ്ടെങ്കിലും ഇരകളോട് മാപ്പുപറയണമെന്ന് വിമർശകർ ആവശ്യപ്പെട്ടു. നേരത്തെയുള്ള മോചനപദ്ധതി സർക്കാർ പുനഃപരിശോധിക്കുന്ന സാഹചര്യത്തിൽ മന്ത്രിമാരുടെ പരാമർശം കൂടുതൽ രാഷ്ട്രീയ വിവാദമായി മാറിയിരിക്കുകയാണ്.

English Summary: Shabana Mahmood and Wes Streeting face criticism over jokes about the prisoner release scheme.