ഭാവിയിൽ തൊഴിൽരഹിതരാകാൻ സാധ്യതയുള്ള കുട്ടികളെ പ്രൈമറി സ്കൂൾ ഘട്ടത്തിൽ തന്നെ കണ്ടെത്താൻ നിർദേശം

ലണ്ടൻ : സ്കൂൾ വിദ്യാഭ്യാസം പൂർത്തിയാക്കിയ ശേഷം തൊഴിലും പഠനവും പരിശീലനവും ഒന്നും ഇല്ലാത്ത അവസ്ഥയിലേക്ക് പോകാൻ സാധ്യതയുള്ള കുട്ടികളെ പ്രൈമറി സ്കൂൾ ഘട്ടത്തിൽ തന്നെ കണ്ടെത്തണമെന്ന് ബ്രിട്ടനിലെ യുവജന തൊഴിൽരഹിതത്വ പ്രതിസന്ധിയെക്കുറിച്ചുള്ള സർക്കാർ അവലോകനം ശുപാർശ ചെയ്യാൻ ഒരുങ്ങുന്നു. അവലോകനത്തിന് നേതൃത്വം നൽകുന്ന മുൻ ലേബർ ഹെൽത്ത് സെക്രട്ടറി അലൻ മിൽബേൺ, കുട്ടികൾ പിന്നീട് NEET — Not in Employment, Education or Training — വിഭാഗത്തിലേക്ക് പോകാനുള്ള മുന്നറിയിപ്പുകൾ വളരെ ചെറുപ്പത്തിൽ തന്നെ പ്രകടമാകുന്നുവെന്ന് പറഞ്ഞു. പ്രൈമറി സ്കൂളുകളും സെക്കൻഡറി സ്കൂളുകളും ബന്ധപ്പെട്ട സേവനങ്ങളും അപകടസാധ്യതയുള്ള കുട്ടികളെ നേരത്തെ തിരിച്ചറിഞ്ഞ് വിദ്യാഭ്യാസം, മെന്ററിംഗ്, ആരോഗ്യ പിന്തുണ, തൊഴിൽ മാർഗനിർദേശം എന്നിവ നൽകണമെന്ന് അദ്ദേഹം അഭിപ്രായപ്പെട്ടു.

ഈ വർഷം ആദ്യം യുകെയിൽ 16 മുതൽ 24 വയസുവരെയുള്ള NEET യുവാക്കളുടെ എണ്ണം ഒരു മില്യൺ കടന്നത് ഒരു ദശകത്തിലേറെയായുള്ള ഏറ്റവും ഉയർന്ന നിരക്കാണ്. ഏകദേശം എട്ട് യുവാക്കളിൽ ഒരാൾ എന്ന തോതിലേക്കാണ് പ്രശ്നം വളർന്നിരിക്കുന്നതെന്നും മാനസികാരോഗ്യ പ്രശ്നങ്ങളും കടുത്ത തൊഴിൽ വിപണിയും ഇതിന് പ്രധാന കാരണങ്ങളാണെന്നും റിപ്പോർട്ട് ചൂണ്ടിക്കാട്ടുന്നു. യുവജന തൊഴിൽ പ്രതിസന്ധി പരിഹരിക്കുന്നത് സർക്കാരിന്റെ പ്രധാന മുൻഗണനകളിലൊന്നായി ഉയർന്നിരിക്കെ, സാങ്കേതിക വിദ്യാഭ്യാസവും അപ്രന്റിസ്‌ഷിപ്പുകളും ശക്തിപ്പെടുത്തുന്നതിനൊപ്പം ക്ഷേമ ആനുകൂല്യ സംവിധാനത്തിലും മാറ്റങ്ങൾ വരുത്താനുള്ള നീക്കങ്ങൾ നടക്കുന്നു. എന്നാൽ യുവാക്കൾക്കുള്ള ആനുകൂല്യങ്ങൾ നിയന്ത്രിക്കുകയാണെങ്കിൽ അതോടൊപ്പം കൂടുതൽ വിദ്യാഭ്യാസ, ആരോഗ്യ, തൊഴിൽ സഹായവും ഉറപ്പാക്കണമെന്ന് മിൽബേൺ മുന്നറിയിപ്പ് നൽകി.

അവസാന റിപ്പോർട്ടിൽ, പ്രൈമറി വിദ്യാഭ്യാസത്തിന്റെ അവസാനഘട്ടം മുതൽ കുട്ടികളുടെ ഹാജർ രേഖകൾ ഉൾപ്പെടെയുള്ള വിവരങ്ങളുടെ അടിസ്ഥാനത്തിൽ NEET അപകടസാധ്യത സ്കൂളുകൾ രേഖപ്പെടുത്തണമെന്ന നിർദേശം ഉൾപ്പെടുമെന്നാണ് പ്രതീക്ഷിക്കുന്നത്. കോവിഡ് മഹാമാരിക്കുശേഷം ഇംഗ്ലണ്ടിൽ സ്ഥിരമായി ക്ലാസിൽ ഹാജരാകാത്ത വിദ്യാർത്ഥികളുടെ എണ്ണം കുത്തനെ ഉയർന്നിട്ടുണ്ടെന്നും 2024-25 കാലയളവിൽ കുറഞ്ഞത് പത്ത് ശതമാനം സ്കൂൾ സമയം നഷ്ടപ്പെടുത്തിയ കുട്ടികളുടെ എണ്ണം ഏകദേശം 1.3 മില്യണായി ഉയർന്നതായും ഔദ്യോഗിക കണക്കുകൾ വ്യക്തമാക്കുന്നു. സ്ഥിരമായ സ്കൂൾ അഭാവമുള്ള കുട്ടികൾ 16 മുതൽ 18 വയസിനിടയിൽ NEET ആകാനുള്ള സാധ്യത 3.9 മടങ്ങ് കൂടുതലാണെന്നും ദീർഘകാലമായി പഠനത്തിലും തൊഴിലും നിന്ന് പുറത്താകാനുള്ള സാധ്യത 6.3 മടങ്ങ് കൂടുതലാണെന്നും മിൽബേണിന്റെ ഇടക്കാല റിപ്പോർട്ട് കണ്ടെത്തിയിരുന്നു. പിന്നാക്ക കുട്ടികൾക്കായി സ്കൂളുകൾക്ക് ലഭിക്കുന്ന pupil premium ഫണ്ട് ട്യൂഷൻ, മെന്ററിംഗ് തുടങ്ങിയ സഹായങ്ങൾക്ക് കൂടുതൽ ഉപയോഗിക്കണമെന്നും അദ്ദേഹം ആവശ്യപ്പെടുന്നു.

English summary: UK primary schools could be asked to identify children at risk of becoming NEET and provide earlier education and employment support.