യുകെയിൽ നഴ്സിങ് കെയർ അസിസ്റ്റന്റായിരുന്ന മലയാളി യുവാവ് ജെബിൻ കെ. ബാബു അന്തരിച്ചു

ലണ്ടൻ : മാഞ്ചസ്റ്ററിൽ നഴ്സിങ് കെയർ അസിസ്റ്റന്റായി ജോലി ചെയ്തിരുന്ന പത്തനംതിട്ട കിഴവള്ളൂർ കൈപ്പകശ്ശേരിൽ ജെബിൻ കെ. ബാബു (34) അന്തരിച്ചു. സ്റ്റോക്ക്പോർട്ട് എൻഎച്ച്എസ് ഫൗണ്ടേഷൻ ട്രസ്റ്റിലെ ജീവനക്കാരനായിരുന്ന ജെബിൻ ഇന്ന് രാവിലെ അഞ്ചുമണിയോടെയാണ് അന്തരിച്ചത്.

കഴിഞ്ഞ രണ്ടുവർഷമായി അസുഖബാധിതനായി ചികിത്സയിലായിരുന്ന ജെബിൻ ഒരു മാസത്തോളം യുകെയിൽ ചികിത്സ നേടിയിരുന്നു. തുടർന്ന് തുടർചികിത്സയ്ക്കായി നാട്ടിലേക്ക് മടങ്ങിയ അദ്ദേഹം അവിടെ ചികിത്സയിൽ കഴിയുന്നതിനിടെയാണ് മരണം സംഭവിച്ചത്. ജെബിന്റെ നിര്യാണം യുകെയിലെയും നാട്ടിലെയും സുഹൃത്തുക്കളെയും സഹപ്രവർത്തകരെയും മലയാളി സമൂഹത്തെയും ദുഃഖത്തിലാഴ്ത്തി.

യുകെയിലെ മലയാളികളുടെ വാട്സാപ്പ് കൂട്ടായ്മയായ ‘England Malayalees’ ഗ്രൂപ്പിന്റെ സഹസ്ഥാപകനും മുൻ അഡ്മിനുമായിരുന്നു ജെബിൻ. ജെബിന്റെ മരണവിവരമറിഞ്ഞതിനെ തുടർന്ന് ഭാര്യ യുകെയിൽനിന്ന് നാട്ടിലേക്ക് യാത്ര തിരിച്ചതായി സുഹൃത്തുക്കൾ അറിയിച്ചു. ദമ്പതികൾക്ക് ഒരു മകളുണ്ട്. ജന്മദിനത്തിന് തലേദിവസമാണ് ജെബിൻ വിടപറഞ്ഞത്. സംസ്കാര ചടങ്ങുകളുമായി ബന്ധപ്പെട്ട കൂടുതൽ വിവരങ്ങൾ ഇതുവരെ ലഭ്യമായിട്ടില്ല.

English Summary: Manchester-based nursing care assistant Jebin K. Babu (34) passed away in Kerala after a prolonged illness.