യുകെ–ഇന്ത്യ ബന്ധം കൂടുതൽ ശക്തമാക്കും; ആദ്യ ഫോൺ സംഭാഷണത്തിൽ ബേൺഹാമും മോദിയും

ലണ്ടൻ : യുകെ പ്രധാനമന്ത്രിയായി ചുമതലയേറ്റ ശേഷം ആൻഡി ബേൺഹാമും ഇന്ത്യൻ പ്രധാനമന്ത്രി നരേന്ദ്ര മോദിയും നടത്തിയ ആദ്യ ഔദ്യോഗിക ഫോൺ സംഭാഷണത്തിൽ ഇരുരാജ്യങ്ങളും തമ്മിലുള്ള ബന്ധം കൂടുതൽ ശക്തമാക്കാൻ ധാരണയായി. വ്യാപാരം, ആർട്ടിഫിഷ്യൽ ഇന്റലിജൻസ്, സാങ്കേതികവിദ്യ, പ്രതിരോധം, സുരക്ഷ, വിദ്യാഭ്യാസം, ശുദ്ധ ഊർജം തുടങ്ങിയ മേഖലകളിലെ സഹകരണം വികസിപ്പിക്കാനാണ് ഇരുനേതാക്കളും തീരുമാനിച്ചത്. യുകെ–ഇന്ത്യ വിഷൻ 2035 പദ്ധതിയും പുതിയ വ്യാപാര കരാറും ഉഭയകക്ഷി ബന്ധത്തിന് കൂടുതൽ കരുത്തേകുമെന്ന് നേതാക്കൾ വിലയിരുത്തി.

പുതിയ യുകെ–ഇന്ത്യ സ്വതന്ത്ര വ്യാപാര കരാർ ഇരുരാജ്യങ്ങളിലെയും ജനങ്ങൾക്കും ബിസിനസുകൾക്കും കൂടുതൽ അവസരങ്ങൾ സൃഷ്ടിക്കുമെന്ന് ബേൺഹാം പറഞ്ഞു. ബ്രിട്ടന്റെ സാമൂഹികവും സാമ്പത്തികവുമായ വളർച്ചയിൽ ഇന്ത്യൻ സമൂഹം നൽകുന്ന സംഭാവനകളെയും അദ്ദേഹം പ്രശംസിച്ചു. മാഞ്ചസ്റ്ററും അഹമ്മദാബാദും തമ്മിലുള്ള ചരിത്രപരമായ ബന്ധം ചൂണ്ടിക്കാട്ടിയ മോദി, അഹമ്മദാബാദിനെ ‘ഇന്ത്യയുടെ മാഞ്ചസ്റ്റർ’ എന്നാണ് വിശേഷിപ്പിച്ചത്. ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള അത്യാധുനിക സാങ്കേതിക മേഖലകളിൽ സഹകരണം വർധിപ്പിക്കാനും ഇരുനേതാക്കളും താൽപര്യം പ്രകടിപ്പിച്ചു.

മിഡിൽ ഈസ്റ്റിലെ സംഘർഷാവസ്ഥയും സംഭാഷണത്തിൽ ചർച്ചയായി. സംഘർഷം കുറയ്ക്കുന്നതിനും ഹോർമുസ് കടലിടുക്ക് വീണ്ടും തുറക്കുന്നതിനുമായി യുകെയും ഇന്ത്യയും അടുത്ത് പ്രവർത്തിക്കുമെന്ന് ഇരുനേതാക്കളും അറിയിച്ചു. ബേൺഹാമിനെ പ്രധാനമന്ത്രിയായതിൽ അഭിനന്ദിച്ച മോദി, വ്യാപാരം, നിക്ഷേപം, പ്രതിരോധം, സുരക്ഷ, നവീകരണം, ജനങ്ങൾ തമ്മിലുള്ള ബന്ധം എന്നിവയിൽ സഹകരണം പുതിയ ഉയരത്തിലെത്തിക്കുമെന്ന് വ്യക്തമാക്കി. ഇരുനേതാക്കളും ഉടൻ വീണ്ടും സംസാരിക്കാനും സാധ്യമായ ഏറ്റവും വേഗത്തിൽ നേരിൽ കൂടിക്കാഴ്ച നടത്താനും ആഗ്രഹം പ്രകടിപ്പിച്ചു.

English Summary: Andy Burnham and Narendra Modi agreed to deepen UK-India cooperation in trade, technology, defence and security.