യുകെയിൽ ലണ്ടന് പുറത്ത് ശരാശരി വാടക ആദ്യമായി £1,400 കടന്നു; തലസ്ഥാനത്ത് £2,825

ലണ്ടൻ : ലണ്ടന് പുറത്തുള്ള വീടുകളുടെ പരസ്യങ്ങളിൽ ആവശ്യപ്പെടുന്ന ശരാശരി പ്രതിമാസ വാടക ആദ്യമായി 1,400 പൗണ്ട് കടന്നു. പ്രോപ്പർട്ടി പോർട്ടലായ റൈറ്റ്മൂവിന്റെ പുതിയ കണക്കുപ്രകാരം ശരാശരി വാടക 1,418 പൗണ്ടിലെത്തി. മുൻപാദത്തെക്കാൾ 1.5 ശതമാനവും ഒരുവർഷത്തിനിടെ 2.4 ശതമാനവുമാണ് വർധന. എന്നാൽ, 2021 മുതൽ 2023 വരെ പ്രതിവർഷം ഏകദേശം പത്തുശതമാനം വർധന രേഖപ്പെടുത്തിയ സാഹചര്യവുമായി താരതമ്യം ചെയ്യുമ്പോൾ വാടക ഉയരുന്നതിന്റെ വേഗം കുറഞ്ഞിട്ടുണ്ട്. ദേശീയതലത്തിൽ ലഭ്യമായ വാടകവീടുകളുടെ എണ്ണം മുൻവർഷത്തെക്കാൾ രണ്ടുശതമാനം കുറഞ്ഞപ്പോൾ ആവശ്യക്കാരുടെ എണ്ണത്തിലും ഏകദേശം സമാനമായ കുറവുണ്ടായി. വിപണിയിലെ സമ്മർദം മുൻവർഷങ്ങളേക്കാൾ കുറഞ്ഞെങ്കിലും വീടുകളുടെ പരിമിതമായ ലഭ്യത വാടക ഉയരാൻ കാരണമാകുന്നുവെന്നാണ് വിലയിരുത്തൽ.

ലണ്ടനിൽ ശരാശരി പ്രതിമാസ വാടക റെക്കോർഡ് നിരക്കായ 2,825 പൗണ്ടിലെത്തി. വാർഷിക വർധന 3.2 ശതമാനമാണ്. തലസ്ഥാനത്ത് വാടകയ്ക്ക് ലഭ്യമായ വീടുകളുടെ എണ്ണം ഒൻപതുശതമാനവും പുതുതായി പരസ്യപ്പെടുത്തുന്ന വാടകവീടുകൾ ഏഴുശതമാനവും കുറഞ്ഞു. അതേസമയം, ആവശ്യക്കാരുടെ എണ്ണം ആറുശതമാനം വർധിച്ചതോടെ വീടുകൾക്കായുള്ള മത്സരം ശക്തമായി. തൊഴിലവസരങ്ങളും ഓഫീസിൽ നേരിട്ട് ഹാജരാകണമെന്ന നിബന്ധനകളും കൂടുതൽ പേരെ ലണ്ടനിലേക്ക് ആകർഷിക്കുന്നുണ്ടാകാമെന്നാണ് റൈറ്റ്മൂവിന്റെ വിലയിരുത്തൽ. ഉയർന്ന ഭവനവായ്പാ പലിശനിരക്കുകൾ വീടുവാങ്ങാൻ ഉദ്ദേശിക്കുന്ന ചിലരെ കൂടുതൽ കാലം വാടകവീടുകളിൽ തുടരാനും പ്രേരിപ്പിക്കുന്നു. താരതമ്യേന വാടക കുറഞ്ഞ ബ്രിട്ടനിലെ മറ്റു പ്രദേശങ്ങളിലും നിരക്കുകൾ ഉയരാനുള്ള പ്രവണത തുടരുന്നുണ്ട്.

വീട്ടുടമകളുടെ വായ്പാച്ചെലവ് ഉയരുന്നതും വാടകവീടുകളുടെ ലഭ്യതയെ ബാധിക്കുന്നു. വാടകയ്ക്ക് നൽകാനായി വാങ്ങുന്ന വീടുകൾക്കുള്ള രണ്ടുവർഷ സ്ഥിരപലിശ വായ്പയുടെ ശരാശരി നിരക്ക്, ഇറാൻ യുദ്ധം തുടങ്ങുന്നതിനുമുമ്പുണ്ടായിരുന്ന 4.16 ശതമാനത്തിൽനിന്ന് ഏകദേശം 5.34 ശതമാനമായി ഉയർന്നു. കുറഞ്ഞ പലിശയിലുള്ള പഴയ കരാറുകൾ അവസാനിച്ച് പുതിയ വായ്പാക്രമീകരണത്തിലേക്ക് മാറുന്ന വീട്ടുടമകൾക്ക് ഇത് അധികബാധ്യതയാകുന്നു. വിൽപ്പനയ്ക്കുള്ള വീടുകളിൽ മുമ്പ് വാടകയ്ക്ക് നൽകിയിരുന്നവയുടെ വിഹിതം കഴിഞ്ഞവർഷത്തെ 12 ശതമാനത്തിൽനിന്ന് ഈ വർഷം ഏകദേശം 13 ശതമാനമായി മാത്രമാണ് ഉയർന്നത്. അതിനാൽ വീട്ടുടമകൾ കൂട്ടത്തോടെ വിപണി വിടുന്നതായി കണക്കുകൾ സൂചിപ്പിക്കുന്നില്ലെങ്കിലും പുതിയ നിക്ഷേപം മന്ദഗതിയിലാണ്. വാടകവർധനയുടെ വേഗം കുറയുന്നതുകൊണ്ടുമാത്രം താമസച്ചെലവിലെ പ്രതിസന്ധി പരിഹരിക്കാനാകില്ലെന്നും വിവിധ നിരക്കുകളിൽ ഗുണനിലവാരമുള്ള കൂടുതൽ വാടകവീടുകൾ ലഭ്യമാക്കണമെന്നും മേഖലയിലെ വിദഗ്ധർ ചൂണ്ടിക്കാട്ടി.

English Summary: Average advertised monthly rents reached £1,418 outside London and £2,825 in the capital as limited supply continued to pressure tenants.