മാഞ്ചസ്റ്ററിൽ ‘നമ്പർ 10 നോർത്ത്’ തുറന്നു; ജീവിതത്തിലെ ഏറ്റവും മികച്ച ദിവസമെന്ന് ആൻഡി ബേൺഹാം

ലണ്ടൻ : മാഞ്ചസ്റ്റർ നഗരമധ്യത്തിലെ ഹെറോൺ ഹൗസിൽ ആരംഭിച്ച പുതിയ സർക്കാർ കേന്ദ്രമായ ‘നമ്പർ 10 നോർത്ത്’ പ്രധാനമന്ത്രി ആൻഡി ബേൺഹാം ഔദ്യോഗികമായി ഉദ്ഘാടനം ചെയ്തു. കേന്ദ്രത്തിലെ ജീവനക്കാരെയും മന്ത്രിമാരെയും അഭിസംബോധന ചെയ്ത ബേൺഹാം, തന്റെ ജീവിതത്തിലെ ഏറ്റവും അഭിമാനകരവും മികച്ചതുമായ ദിവസമാണിതെന്ന് പറഞ്ഞു. രാജ്യത്തിന്റെ ഭരണാധികാരം ലണ്ടനിൽ മാത്രം കേന്ദ്രീകരിക്കാതെ എല്ലാ പ്രദേശങ്ങളിലേക്കും എത്തിക്കുകയാണ് പുതിയ കേന്ദ്രത്തിന്റെ പ്രധാന ലക്ഷ്യമെന്നും അദ്ദേഹം വ്യക്തമാക്കി.

ഏകദേശം 35 വർഷങ്ങൾക്ക് മുമ്പ് ബിരുദപഠനം പൂർത്തിയാക്കിയിട്ടും മാഞ്ചസ്റ്ററിൽ ജോലി കണ്ടെത്താനാകാതെ നഗരം വിട്ടുപോകേണ്ടിവന്ന അനുഭവം ബേൺഹാം പ്രസംഗത്തിൽ ഓർത്തെടുത്തു. അക്കാലത്ത് മാഞ്ചസ്റ്റർ ഉൾപ്പെടെ രാജ്യത്തിന്റെ പല ഭാഗങ്ങളിലും യുവാക്കൾക്ക് മുന്നേറണമെങ്കിൽ സ്വന്തം നാടുവിട്ട് മറ്റിടങ്ങളിലേക്ക് പോകേണ്ട സാഹചര്യമുണ്ടായിരുന്നുവെന്ന് അദ്ദേഹം പറഞ്ഞു. വർഷങ്ങൾക്കുശേഷം അതേ നഗരത്തിൽ സർക്കാരിന്റെ പ്രധാന കേന്ദ്രം തുറക്കാൻ കഴിഞ്ഞത് തന്റെ ജീവിതം പൂർണവൃത്തത്തിലെത്തിയ അനുഭവമാണെന്നും ബേൺഹാം കൂട്ടിച്ചേർത്തു.

അതേസമയം, ‘നമ്പർ 10 നോർത്ത്’ ആരംഭിക്കുന്നതിനുള്ള ചെലവിനെതിരായ വിമർശനങ്ങളും പ്രധാനമന്ത്രി തള്ളി. രാജ്യത്തിന്റെ തെക്കും വടക്കും തമ്മിലുള്ള അധികാര-വികസന അസമത്വം കുറയ്ക്കാൻ മാഞ്ചസ്റ്റർ കേന്ദ്രം സഹായിക്കുമെന്ന് അദ്ദേഹം പറഞ്ഞു. “ഓരോ പോസ്റ്റ്‌കോഡിലേക്കും അധികാരം എത്തിക്കുക” എന്നതാണ് പദ്ധതിയുടെ ലക്ഷ്യമെന്നും വലിയ തീരുമാനങ്ങൾ ലണ്ടനിൽ മാത്രമല്ല, വടക്കൻ ഇംഗ്ലണ്ടിൽനിന്നും കൈക്കൊള്ളാനാകുമെന്ന് പുതിയ കേന്ദ്രം തെളിയിക്കുമെന്നും ബേൺഹാം വ്യക്തമാക്കി.