വിദേശ ജീവനക്കാർക്ക് അധിക ലെവി: റിഫോം യുകെ പദ്ധതി എൻഎച്ച്എസിനും സോഷ്യൽ കെയറിനും തിരിച്ചടിയാകുമെന്ന് മുന്നറിയിപ്പ്

ലണ്ടൻ : വിദേശ പൗരന്മാരെ ജോലിക്ക് നിയമിക്കുന്ന സ്ഥാപനങ്ങളിൽ നിന്ന് വാർഷിക അധിക ലെവി ഈടാക്കാനുള്ള റിഫോം യുകെയുടെ പദ്ധതി എൻഎച്ച്എസിനെയും സോഷ്യൽ കെയർ മേഖലയെയും ഗുരുതരമായി ബാധിക്കുമെന്ന് ആരോഗ്യ, വിദ്യാഭ്യാസ മേഖലകളിലെ വിദഗ്ധർ മുന്നറിയിപ്പ് നൽകി. ബ്രിട്ടീഷ് പാസ്പോർട്ടില്ലാത്ത ജീവനക്കാർക്കായി ഉയർന്ന നിരക്കിലുള്ള തൊഴിലുടമ നാഷണൽ ഇൻഷുറൻസ് സംഭാവനയും പ്രത്യേക വാർഷിക ചാർജും ഈടാക്കുന്നതാണ് ‘മൈഗ്രന്റ് വർക്കർ സർചാർജ്’ പദ്ധതി. സെറ്റിൽഡ് സ്റ്റാറ്റസുള്ള യൂറോപ്യൻ യൂണിയൻ പൗരന്മാർക്കും ഇത് ബാധകമാകുമെങ്കിലും ഐറിഷ് പാസ്പോർട്ട് ഉടമകളെ ഒഴിവാക്കുമെന്നാണ് റിപ്പോർട്ട്.

എൻഎച്ച്എസ്, വിദ്യാഭ്യാസം തുടങ്ങിയ വിദേശ ജീവനക്കാരെ വലിയ തോതിൽ ആശ്രയിക്കുന്ന മേഖലകൾക്കും പദ്ധതിയിൽ ഇളവ് നൽകില്ലെന്നാണ് സൂചന. എൻഎച്ച്എസ് ഇംഗ്ലണ്ടിലെ ജീവനക്കാരിൽ ഏകദേശം 20 ശതമാനം പേരും ബ്രിട്ടീഷ് പൗരന്മാരല്ലാത്തതിനാൽ പുതിയ ലെവി ഇതിനകം സാമ്പത്തിക സമ്മർദത്തിലായ ആരോഗ്യ സംവിധാനത്തിന്റെ ചെലവ് വർധിപ്പിക്കുമെന്ന് കിങ്സ് ഫണ്ട് വ്യക്തമാക്കി. വിദേശ ഡോക്ടർമാരെയും ജനറൽ പ്രാക്ടീഷണർമാരെയും നിയമിക്കുന്നതിനുള്ള ചെലവ് ഉയർന്നാൽ രോഗികൾക്ക് ചികിത്സ ലഭിക്കുന്നതിൽ കാലതാമസമുണ്ടാകാമെന്നും സോഷ്യൽ കെയർ സ്ഥാപനങ്ങൾ അടച്ചുപൂട്ടൽ ഭീഷണി നേരിടാമെന്നും വിദഗ്ധർ ചൂണ്ടിക്കാട്ടി. കുറഞ്ഞ വേതനക്കാരിൽ കൂടുതൽ ലെവി ഈടാക്കിയാൽ ഹോം കെയർ സേവനങ്ങൾക്കാകും ഏറ്റവും വലിയ തിരിച്ചടി.

സ്കൂളുകളിലും സർവകലാശാലകളിലും പദ്ധതി ജീവനക്കാരുടെ ക്ഷാമം രൂക്ഷമാക്കുമെന്നാണ് വിദ്യാഭ്യാസ വിദഗ്ധരുടെ വിലയിരുത്തൽ. ഇംഗ്ലണ്ടിലെ അധ്യാപകരിൽ ആറു ശതമാനത്തോളം വിദേശ പൗരന്മാരാണ്; ഭാഷ, ഫിസിക്സ് തുടങ്ങിയ അധ്യാപക ക്ഷാമമുള്ള വിഷയങ്ങളിൽ ഇവരുടെ പങ്ക് കൂടുതലാണ്. ശമ്പളത്തിനായി ബജറ്റിന്റെ 60 ശതമാനം വരെ ചെലവഴിക്കുന്ന സർവകലാശാലകളിൽ അധിക ലെവി സാമ്പത്തിക പ്രതിസന്ധി കൂടുതൽ ഗുരുതരമാക്കുകയും ചില സ്ഥാപനങ്ങളെ പാപ്പരത്തത്തിലേക്ക് തള്ളുകയും ചെയ്യാമെന്നും മുന്നറിയിപ്പുണ്ട്. ബ്രിട്ടീഷ് ജീവനക്കാരെ കൂടുതൽ നിയമിക്കാൻ സ്ഥാപനങ്ങളെ പ്രേരിപ്പിക്കുകയാണ് പദ്ധതിയുടെ ലക്ഷ്യമെന്ന് റിഫോം യുകെ പറയുമ്പോഴും, ആവശ്യമായ യോഗ്യതയുള്ള ആഭ്യന്തര തൊഴിലാളികൾ ലഭ്യമല്ലാത്തതാണ് പല മേഖലകളുടെയും യാഥാർഥ്യമെന്ന് വിദഗ്ധർ വ്യക്തമാക്കി.

Experts warn Reform UK’s proposed levy on overseas workers could harm the NHS, social care, schools and universities.