വയോജന സൗഹൃദ സർക്കാർ ഓഫീസുകൾക്ക് സർട്ടിഫിക്കേഷൻ; രാജ്യത്ത് ആദ്യമായി കേരളത്തിൽ

സംസ്ഥാനത്തെ സർക്കാർ ഓഫീസുകൾ വയോജന സൗഹൃദമാക്കുന്നതിനുള്ള സർട്ടിഫിക്കേഷൻ പദ്ധതിക്ക് കേരളത്തിൽ തുടക്കമാകുന്നു. വയോജന ക്ഷേമ വകുപ്പ് നടപ്പാക്കുന്ന പദ്ധതി രാജ്യത്ത് ആദ്യമായാണ് സർക്കാർ ഓഫീസുകൾക്കായി ഇത്തരത്തിൽ സമഗ്രമായി നടപ്പാക്കുന്നത്. വില്ലേജ്, താലൂക്ക് ഓഫീസുകൾ മുതൽ ആശുപത്രികൾ, ബാങ്കുകൾ, ഗതാഗത കൗണ്ടറുകൾ എന്നിവിടങ്ങളിലേക്കും പദ്ധതി ഘട്ടംഘട്ടമായി വ്യാപിപ്പിക്കും.

സർക്കാർ ഓഫീസുകളിലെത്തുന്ന മുതിർന്നവർ നേരിടുന്ന നീണ്ട ക്യൂ, പടികൾ മാത്രമുള്ള പ്രവേശന സംവിധാനം, ചെറിയ അക്ഷരത്തിലുള്ള ഫോമുകൾ, മുകളിലെ നിലകളിലുള്ള കൗണ്ടറുകൾ തുടങ്ങിയ ബുദ്ധിമുട്ടുകൾ പരിഹരിക്കുകയാണ് ലക്ഷ്യം. കെട്ടിടത്തിന്റെ പ്രവേശനക്ഷമത, സേവനരീതി, ജീവനക്കാരുടെ പരിശീലനവും പെരുമാറ്റവും, വിവരവിനിമയം, പൊതുപങ്കാളിത്തം എന്നീ അഞ്ച് മേഖലകൾ അടിസ്ഥാനമാക്കിയാണ് ഓഫീസുകളെ വിലയിരുത്തുക.

പടികളില്ലാത്ത പ്രവേശനം, താഴത്തെ നിലയിൽ ശൗചാലയം, മുതിർന്നവർക്ക് മുൻഗണനാ ക്യൂ, അവരുടെ ആവശ്യങ്ങൾക്കായി പ്രത്യേക ചുമതലയുള്ള ഉദ്യോഗസ്ഥൻ എന്നിവ നിർബന്ധമായിരിക്കും. പരിശോധനയിൽ ലഭിക്കുന്ന സ്‌കോറിന്റെ അടിസ്ഥാനത്തിൽ ഗോൾഡ്, സിൽവർ, ബ്രോൺസ് സർട്ടിഫിക്കറ്റുകൾ നൽകും. സർട്ടിഫിക്കറ്റ് നേടിയ ഓഫീസുകളിൽ മുന്നറിയിപ്പില്ലാതെയും പരിശോധന നടത്തുമെന്നും നിശ്ചിത കാലയളവിനുശേഷം സർട്ടിഫിക്കേഷൻ പുതുക്കണമെന്നും അധികൃതർ അറിയിച്ചു.

English summary: Kerala has launched India’s first certification scheme to make government offices more senior-citizen-friendly.