റിഫോം യുകെയുടെ ഫണ്ടിലേക്ക് വൻ തുക; £36 മില്യൺ നൽകി ബെൻ ഡെലോ

ലണ്ടൻ : ബ്രിട്ടീഷ് ക്രിപ്റ്റോകറൻസി കോടീശ്വരൻ ബെൻ ഡെലോ റിഫോം യുകെ പാർട്ടിക്ക് £36 മില്യൺ സംഭാവന നൽകി. ബ്രിട്ടീഷ് രാഷ്ട്രീയ പാർട്ടിക്ക് ലഭിക്കുന്ന ഏറ്റവും വലിയ ഒറ്റത്തവണ സംഭാവനയാണിത്. അടുത്ത പൊതുതെരഞ്ഞെടുപ്പിൽ മറ്റ് പാർട്ടികളുമായി “തുല്യമായ പോരാട്ടത്തിനും അവസരത്തിനും” വേണ്ടിയാണ് പണം നൽകുന്നതെന്ന് ഡെലോ പറഞ്ഞു. 

2029ൽ നടക്കാനിടയുള്ള അടുത്ത പൊതുതെരഞ്ഞെടുപ്പ് വരെ പ്രതിമാസം £1 മില്യൺ വീതം നൽകാനായിരുന്നു ഡെലോയുടെ പദ്ധതി. എന്നാൽ ഭാവിയിൽ വൻ രാഷ്ട്രീയ സംഭാവനകൾക്ക് നിയന്ത്രണം ഏർപ്പെടുത്താനുള്ള സാധ്യത കണക്കിലെടുത്ത് മുഴുവൻ തുകയും ഒരുമിച്ച് നൽകുകയായിരുന്നു. ക്രിപ്റ്റോ ട്രേഡിങ് പ്ലാറ്റ്‌ഫോമായ BitMEX-ന്റെ സഹസ്ഥാപകനായ ഡെലോ ഈ വർഷം നേരത്തെ തന്നെ റിഫോമിന് £8 മില്യൺ നൽകിയിരുന്നു. 

അതേസമയം, റിഫോം യുകെയുടെ സാമ്പത്തിക ഇടപാടുകൾ ഇതിനകം തന്നെ അന്വേഷണത്തിന്റെ പരിധിയിലാണ്. വിദേശ ധനസഹായവുമായി ബന്ധപ്പെട്ട നിയമങ്ങൾ പാർട്ടി ലംഘിച്ചെന്ന ആരോപണത്തിൽ പൊലീസ് അന്വേഷണം നടക്കുകയാണ്; പാർട്ടി ആരോപണം നിഷേധിക്കുകയും അന്വേഷണവുമായി സഹകരിക്കുമെന്ന് വ്യക്തമാക്കുകയും ചെയ്തിട്ടുണ്ട്. റിഫോം നേതാവ് നൈജൽ ഫറേജ് ഡെലോയുടെ സംഭാവനയെ സ്വാഗതം ചെയ്തപ്പോൾ, വൻ രാഷ്ട്രീയ സംഭാവനകൾ ജനാധിപത്യത്തിൽ ചെലുത്തുന്ന സ്വാധീനത്തെക്കുറിച്ച് മറ്റ് പാർട്ടികളിൽ നിന്ന് വിമർശനവും ഉയർന്നിട്ടുണ്ട്.