എച്ച്‌എംആർസിയിൽ വൻ അഴിച്ചുപണി; പഴയ ഔട്ട്‌സോഴ്സിങ് മാതൃക അവസാനിപ്പിച്ച് പ്രതിവർഷം 10 ലക്ഷം പൗണ്ട് ലാഭം

ലണ്ടൻ : ബ്രിട്ടനിലെ നികുതി വകുപ്പായ എച്ച്‌എംആർസി പഴയ ഔട്ട്‌സോഴ്സിങ് മാതൃക മാറ്റിയതിലൂടെ പ്രതിവർഷം 10 ലക്ഷം പൗണ്ട് ലാഭിച്ചതായി റിപ്പോർട്ട്. മൂന്ന് പതിറ്റാണ്ടിലേറെയായി നിർണായക അതിർത്തി-വ്യാപാര ഡിജിറ്റൽ സേവനങ്ങൾക്കായി പുറത്തുനിന്നുള്ള കരാർ ജീവനക്കാരെ ആശ്രയിച്ചിരുന്ന സംവിധാനമാണ് ഇപ്പോൾ മാറ്റിയത്. ബ്രിട്ടീഷ് സാങ്കേതിക സ്ഥാപനമായ ടെക്നുവോവോയുമായി ചേർന്നാണ് എച്ച്‌എംആർസി പുതിയ സേവനാധിഷ്ഠിത മാതൃകയിലേക്ക് മാറിയത്.

പുതിയ സംവിധാനത്തിന്റെ ഭാഗമായി നൂറിലധികം കരാർ ജീവനക്കാരെ ആശ്രയിച്ചിരുന്ന രീതിക്ക് പകരം, യുകെയിലേക്കും യുകെയിൽ നിന്നുമുള്ള ചരക്കുനീക്കവുമായി ബന്ധപ്പെട്ട എട്ട് പ്രധാന ഡിജിറ്റൽ സേവനങ്ങൾക്ക് കൂടുതൽ നിയന്ത്രിതവും സ്ഥിരതയുള്ളതുമായ പിന്തുണ ഒരുക്കി. മാറ്റം മൂന്ന് ആഴ്ചയ്ക്കുള്ളിൽ പൂർത്തിയാക്കിയെന്നും പ്രവർത്തനസേവനങ്ങൾക്ക് തടസ്സമുണ്ടായില്ലെന്നും മാറ്റത്തിനായി അധിക ചെലവ് വന്നില്ലെന്നും റിപ്പോർട്ടിൽ പറയുന്നു. ഇതിലൂടെ പ്രവർത്തനച്ചെലവ് 18 ശതമാനം കുറഞ്ഞു. പുതിയ ജീവനക്കാരെ സംവിധാനത്തിലേക്ക് ഉൾപ്പെടുത്തുന്നതിനുള്ള സമയം 86 ശതമാനം കുറഞ്ഞതും നിർണായക അറിവുകൾ വ്യക്തിഗത കരാർ ജീവനക്കാരുടെ കൈകളിൽ നിന്ന് സ്ഥാപനത്തിനകത്തേക്ക് കൊണ്ടുവരാനായതും പ്രധാന നേട്ടങ്ങളായി വിലയിരുത്തപ്പെടുന്നു.

വൈറ്റ്‌ഹോളിലുടനീളം 1400 കോടി പൗണ്ടിന്റെ കാര്യക്ഷമതാ ലാഭം കണ്ടെത്താൻ സർക്കാർ സമ്മർദ്ദത്തിലായിരിക്കുന്ന സാഹചര്യത്തിലാണ് എച്ച്‌എംആർസിയുടെ ഈ മാറ്റം ശ്രദ്ധേയമാകുന്നത്. സർക്കാർ വകുപ്പുകൾ ആവർത്തിച്ച് പുറത്തുനിന്ന് ഒരേ ഡിജിറ്റൽ വിദഗ്ധത വാങ്ങുന്ന രീതി അവസാനിപ്പിക്കാതെ സ്ഥിരമായ ലാഭം സാധ്യമാകില്ലെന്നാണ് മേഖലയിലെ വിദഗ്ധരുടെ മുന്നറിയിപ്പ്. പുറത്തുനിന്നുള്ള പങ്കാളിത്തത്തിന് സ്ഥാനം ഉണ്ടെങ്കിലും അതിന്മേലുള്ള ആശ്രിതത്വമാണ് പ്രശ്നമെന്നും, പദ്ധതികൾ അവസാനിക്കുമ്പോൾ അറിവും കഴിവും വകുപ്പിനകത്ത് തന്നെ ശേഷിക്കുന്ന രീതിയിലായിരിക്കണം സാങ്കേതിക മാറ്റങ്ങൾ നടപ്പാക്കേണ്ടതെന്നും വിദഗ്ധർ ചൂണ്ടിക്കാട്ടുന്നു. കൃത്രിമ ബുദ്ധി ഉൾപ്പെടെയുള്ള പുതിയ സാങ്കേതികവിദ്യകൾ ഉപയോഗിക്കുമ്പോഴും സർക്കാർ വകുപ്പുകൾക്കുള്ളിൽ ആവശ്യമായ കഴിവും അറിവും വളർത്തിയില്ലെങ്കിൽ പുതിയൊരു ആശ്രിതത്വം കൂടി ഉണ്ടാകാമെന്ന മുന്നറിയിപ്പും ഉയരുന്നു.

English Summary: HMRC has saved £1 million a year by replacing an old contractor-based outsourcing model with a service-based digital support system.