യുകെ പ്രവേശനവിലക്ക് മുന്നറിയിപ്പുമായി ഷബാന മഹ്മൂദ്; ‘രാഷ്ട്രീയ തന്ത്രം’ എന്ന് തിരിച്ചടിച്ച് എറിത്രിയ

ലണ്ടൻ : അഭയാർഥി അപേക്ഷ നിരസിക്കപ്പെട്ടവരെയും കുറ്റകൃത്യങ്ങളിൽ ശിക്ഷിക്കപ്പെട്ട സ്വന്തം പൗരന്മാരെയും തിരിച്ചെടുക്കാൻ സഹകരിച്ചില്ലെങ്കിൽ എറിത്രിയക്കാർക്ക് യുകെയിൽ സമ്പൂർണ പ്രവേശനവിലക്ക് ഏർപ്പെടുത്തുമെന്ന് ആഭ്യന്തര സെക്രട്ടറി ഷബാന മഹ്മൂദ്. തിരിച്ചയയ്ക്കൽ നടപടികളിൽ ഈ വർഷമാദ്യം എറിത്രിയ സഹകരണം നിർത്തിയെന്നാണ് ഹോം ഓഫീസിന്റെ ആരോപണം. സമ്മർദനടപടികളുടെ ഭാഗമായി എറിത്രിയൻ നയതന്ത്ര ഉദ്യോഗസ്ഥർക്ക് ലണ്ടന് പുറത്തേക്കുള്ള യാത്രയിൽ നിയന്ത്രണം ഏർപ്പെടുത്തി. പ്രമുഖ വ്യക്തികൾക്കുള്ള അതിവേഗ വിസാ പരിഗണനയും പിൻവലിച്ചു. എന്നാൽ, ബ്രിട്ടന്റെ ആരോപണങ്ങൾ തള്ളിയ എറിത്രിയൻ എംബസി, പൗരന്മാരെ മാന്യമായി തിരിച്ചെത്തിക്കുന്നതിനെക്കുറിച്ച് ചർച്ചയ്ക്ക് ആവർത്തിച്ച് ആവശ്യപ്പെട്ടിട്ടും യുകെ താൽപര്യം കാട്ടിയില്ലെന്ന് പ്രതികരിച്ചു. മഹ്മൂദിന്റെ നടപടി വെറും രാഷ്ട്രീയ തന്ത്രമാണെന്നും എംബസി കുറ്റപ്പെടുത്തി. ഈ പ്രസ്താവനയിൽ വസ്തുതാപരമായ നിരവധി തെറ്റുകളുണ്ടെന്നാണ് ഹോം ഓഫീസിന്റെ മറുപടി.

കഴിഞ്ഞ നാലുവർഷത്തിനിടെ 2,626 എറിത്രിയക്കാരുടെ അഭയാർഥി അപേക്ഷകൾ നിരസിച്ചെങ്കിലും നൂറിലധികം പേരെ മാത്രമാണ് തിരിച്ചയച്ചത്; ഇത് നാലുശതമാനത്തിൽ താഴെയാണ്. 2026 ജൂൺ വരെയുള്ള ഒരുവർഷത്തിനിടെ ഏകദേശം ആറായിരം എറിത്രിയക്കാർ ചെറുബോട്ടുകളിൽ ചാനൽ കടന്ന് യുകെയിലെത്തി. ഇക്കാലയളവിൽ ബോട്ടുകളിലെത്തിയവരിൽ ഏറ്റവും കൂടുതലും എറിത്രിയക്കാരായിരുന്നു. അതേസമയം, എറിത്രിയക്കാരുടെ അഭയാർഥി അപേക്ഷകളിൽ ഏകദേശം 84 ശതമാനത്തിനും ആദ്യഘട്ടത്തിൽതന്നെ അംഗീകാരം ലഭിക്കുന്നതായി ഓക്സ്ഫഡ് സർവകലാശാലയിലെ മൈഗ്രേഷൻ ഒബ്സർവേറ്ററി ഡയറക്ടർ മാഡലിൻ സംപ്ഷൻ ചൂണ്ടിക്കാട്ടി. നേരത്തെ അംഗോള, നമീബിയ, കോംഗോ ജനാധിപത്യ റിപ്പബ്ലിക് എന്നിവയ്ക്കെതിരെയും യുകെ വിസാ നിയന്ത്രണ മുന്നറിയിപ്പ് നൽകിയിരുന്നു; പിന്നീട് ഈ രാജ്യങ്ങൾ തിരിച്ചയയ്ക്കൽ നടപടികളിൽ സഹകരിക്കാൻ ധാരണയിലെത്തി. ഇന്ത്യ, പാകിസ്ഥാൻ, നൈജീരിയ, ബംഗ്ലാദേശ്, സൊമാലിയ, ഈജിപ്ത്, ഗാബോൺ എന്നീ രാജ്യങ്ങളും സഹകരണം മെച്ചപ്പെടുത്തിയില്ലെങ്കിൽ സമാന നടപടികൾ നേരിട്ടേക്കാമെന്നാണ് റിപ്പോർട്ട്. ഈ രാജ്യങ്ങൾക്കെതിരെ പുതിയ വിലക്ക് പ്രഖ്യാപിച്ചിട്ടില്ല.

എറിത്രിയയിലെ ഗുരുതരമായ മനുഷ്യാവകാശ ലംഘനങ്ങൾ കണക്കിലെടുക്കാതെ തിരിച്ചയയ്ക്കൽ നടപടികൾ മുന്നോട്ടുകൊണ്ടുപോകരുതെന്ന് മനുഷ്യാവകാശ സംഘടനകൾ മുന്നറിയിപ്പ് നൽകി. അനിശ്ചിതകാല നിർബന്ധിത ദേശീയസേവനം, വിചാരണയില്ലാത്ത തടങ്കൽ, പീഡനം എന്നിവയിൽനിന്ന് രക്ഷപ്പെട്ടാണ് പലരും രാജ്യം വിടുന്നതെന്ന് ജസ്റ്റിസ് ഫോർ എറിത്രിയൻസ് ചൂണ്ടിക്കാട്ടി. രാജ്യത്ത് മനുഷ്യരാശിക്കെതിരായ കുറ്റകൃത്യങ്ങൾ തുടരുന്നതായി വിശ്വസിക്കാൻ ന്യായമായ കാരണങ്ങളുണ്ടെന്ന് യുഎൻ പ്രത്യേക റിപ്പോർട്ടർ മുഹമ്മദ് അബ്ദുൽസലാം ബാബിക്കറും വ്യക്തമാക്കിയിട്ടുണ്ട്. എറിത്രിയ സുരക്ഷിതമായ രാജ്യമായി മാറിയിട്ടില്ലെന്ന് ആംനെസ്റ്റി ഇന്റർനാഷണൽ പ്രതികരിച്ചു. സർക്കാർ നടപടി എറിത്രിയൻ ഭരണകൂടത്തെ ലക്ഷ്യമിടുന്നതാകണമെന്നും സംരക്ഷണം ആവശ്യമുള്ളവർക്ക് അഭയം നൽകാനുള്ള യുകെയുടെ നിയമപരമായ ബാധ്യതയെ ദുർബലപ്പെടുത്തരുതെന്നും റെഫ്യൂജി കൗൺസിൽ ആവശ്യപ്പെട്ടു.

English Summary: Eritrea has rejected the UK’s threat of an entry ban over migrant returns, while rights groups warn against endangering people fleeing persecution.