സിജെപി സമരത്തിന് പിന്തുണ; യുകെയിലെ നഗരങ്ങളിൽ ഇന്ത്യൻ വിദ്യാർഥികളുടെ പ്രതിഷേധം

ലണ്ടൻ : ഇന്ത്യയിലെ നീറ്റ് പരീക്ഷാ ക്രമക്കേടുകൾക്കെതിരെ കോക്‌റോച്ച് ജനത പാർട്ടി നടത്തുന്ന സമരത്തിന് പിന്തുണ പ്രഖ്യാപിച്ച് ലണ്ടൻ ഉൾപ്പെടെ യുകെയിലെ വിവിധ നഗരങ്ങളിൽ ഇന്ത്യൻ വിദ്യാർഥികളും പ്രവാസികളും പ്രതിഷേധം സംഘടിപ്പിച്ചു. സ്റ്റുഡന്റ്സ് ഫെഡറേഷൻ ഓഫ് ഇന്ത്യ യുകെയുടെ നേതൃത്വത്തിൽ ലണ്ടനിലെ ഇന്ത്യൻ ഹൈക്കമ്മീഷന് മുന്നിലും മാഞ്ചസ്റ്റർ, ലീഡ്സ് എന്നിവിടങ്ങളിലും പ്രതിഷേധം നടന്നു.

നീറ്റ് പരീക്ഷാ ചോദ്യപേപ്പർ ചോർച്ച ആരോപണത്തിൽ ഉത്തരവാദികളായവർക്കെതിരെ നടപടി വേണമെന്നും കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്നും പ്രതിഷേധക്കാർ ആവശ്യപ്പെട്ടു. പരീക്ഷാ ക്രമക്കേടുകൾ വിദ്യാർഥികളുടെ ഭാവിയെ ബാധിക്കുന്നുവെന്നും വിദ്യാഭ്യാസ സംവിധാനത്തിൽ കൂടുതൽ സുതാര്യതയും ഉത്തരവാദിത്തവും ഉറപ്പാക്കണമെന്നും അവർ പറഞ്ഞു.

ഡൽഹിയിൽ ആരംഭിച്ച സമരം രാജ്യത്തിന്റെ വിവിധ ഭാഗങ്ങളിലേക്ക് വ്യാപിച്ചതിന് പിന്നാലെയാണ് യുകെയിലും ഐക്യദാർഢ്യ പരിപാടികൾ നടന്നത്. ലീഡ്സിൽ ജൂലൈ 26ന് വീണ്ടും പ്രതിഷേധം സംഘടിപ്പിക്കുമെന്നും ഇന്ത്യയിലെ വിദ്യാർഥികളുടെ ആവശ്യങ്ങൾ അന്താരാഷ്ട്രതലത്തിൽ ഉയർത്തിക്കാട്ടുകയാണ് ലക്ഷ്യമെന്നും സംഘാടകർ അറിയിച്ചു.