യുകെ കറൻസി നോട്ടുകളിൽ ഇനി വന്യജീവികളുടെ ചിത്രങ്ങൾ; വിൻസ്റ്റൺ ചർച്ചിലിനെ ഒഴിവാക്കുന്നതിനെതിരെ വിമർശനം
The Bank of England has announced that native British wildlife—including the European Hedgehog, Barn Owl, Bumblebee, and Atlantic Puffin—will replace historical figures like Sir Winston Churchill on future banknotes, sparking mixed public reactions.
ലണ്ടൻ : യുകെയുടെ പുതിയ തലമുറ ബാങ്ക് നോട്ടുകളിൽ ചരിത്രപുരുഷന്മാർക്ക് പകരം ബ്രിട്ടനിലെ തനത് വന്യജീവികളുടെ ചിത്രങ്ങൾ ഉൾപ്പെടുത്താൻ ബാങ്ക് ഓഫ് ഇംഗ്ലണ്ട് തീരുമാനിച്ചു. യൂറോപ്യൻ മുള്ളൻപന്നി (Hedgehog), വെള്ളിമൂങ്ങ (Barn Owl), ബഫ്ടെയിൽഡ് വണ്ട് (Buff-Tailed Bumblebee), അറ്റ്ലാന്റിക് പഫിൻ പക്ഷി എന്നിവയാണ് പുതുതായി നോട്ടുകളിൽ ഇടംപിടിക്കുന്നത്. അഞ്ച് ലക്ഷത്തോളം ആളുകൾ പങ്കെടുത്ത പൊതു വോട്ടെടുപ്പിലൂടെയും പ്രകൃതിസംരക്ഷണ വിദഗ്ദ്ധരുടെയും ജീവശാസ്ത്രജ്ഞരുടെയും സമിതിയുടെ നിർദ്ദേശപ്രകാരവുമാണ് ഈ ജീവികളെ തിരഞ്ഞെടുത്തത്.
ഇതോടെ നോട്ടുകളുടെ പിൻവശത്ത് നിലവിലുള്ള ചരിത്ര വ്യക്തിത്വങ്ങൾ പൂർണ്ണമായും ഒഴിവാക്കപ്പെടും. 5 പൗണ്ട് നോട്ടിൽ നിന്ന് മുൻ പ്രധാനമന്ത്രി സർ വിൻസ്റ്റൺ ചർച്ചിലിനെയും 10 പൗണ്ടിൽ നിന്ന് എഴുത്തുകാരി ജെയ്ൻ ഓസ്റ്റനെയും ഒഴിവാക്കും. കൂടാതെ 20 പൗണ്ട് നോട്ടിൽ നിന്ന് വിഖ്യാത ചിത്രകാരൻ ജെ.എം.ഡബ്ല്യു. ടർണറും 50 പൗണ്ട് നോട്ടിൽ നിന്ന് പ്രമുഖ ഗണിതശാസ്ത്രജ്ഞൻ അലൻ ട്യൂറിംഗും മാറും. അതേസമയം, നോട്ടുകളുടെ മുൻവശത്ത് ചാൾസ് മൂന്നാമൻ രാജാവിന്റെ ചിത്രം തുടർന്നും മാറ്റമില്ലാതെ നിലനിൽക്കും.
രണ്ടാം ലോകമഹായുദ്ധത്തിൽ ബ്രിട്ടനെ വിജയത്തിലേക്ക് നയിച്ച ചർച്ചിലിനെപ്പോലുള്ള ചരിത്ര നായകരെ മാറ്റി മൃഗങ്ങളുടെ ചിത്രങ്ങൾ നൽകുന്നത് രാജ്യത്തിന്റെ ചരിത്രത്തെ മായ്ച്ചുകളയുന്നതിന് തുല്യമാണെന്ന് ഒരു വിഭാഗം രൂക്ഷമായി വിമർശിച്ചു. എന്നാൽ പൊതുജനാഭിപ്രായം മാനിച്ചാണ് ഈ മാറ്റമെന്നും പ്രകൃതിയെയും ജൈവവൈവിധ്യത്തെയും ആഘോഷിക്കുന്നത് സ്വാഗതാർഹമാണെന്നും മറുവിഭാഗം വാദിക്കുന്നു. സുരക്ഷാ പരിശോധനകളും പുതിയ പോളിമർ നോട്ടുകളുടെ അച്ചടിയും പൂർത്തിയാക്കി വരും വർഷങ്ങളിൽ ഘട്ടംഘട്ടമായി പുതിയ നോട്ടുകൾ പുറത്തിറക്കാനാണ് കേന്ദ്ര ബാങ്കിന്റെ തീരുമാനം.
