രാഷ്ട്രീയ സംഭാവനകൾക്ക് കടുത്ത നിബന്ധനകൾ: പ്രവാസി ദാതാക്കൾക്ക് നിയന്ത്രണമേർപ്പെടുത്താൻ ബ്രിട്ടീഷ് സർക്കാർ
The UK government is planning to tighten residency rules and introduce a cap on political donations from overseas British donors to curb the influence of massive foreign wealth in domestic politics.
ലണ്ടൻ : രാഷ്ട്രീയ പാർട്ടികൾക്ക് ലഭിക്കുന്ന വൻതുകകളുടെ സംഭാവനകൾക്ക് കടിഞ്ഞാണിടാൻ വിദേശത്ത് താമസിക്കുന്ന ബ്രിട്ടീഷ് പൗരന്മാരുടെ ഫണ്ടിങ്ങിന് പുതിയ നിബന്ധനകൾ ഏർപ്പെടുത്താൻ യുകെ സർക്കാർ ഒരുങ്ങുന്നു. രാഷ്ട്രീയ പാർട്ടികൾക്ക് ഭീമമായ തുക സംഭാവനയായി നൽകുന്നവർ യുകെയിൽത്തന്നെ താമസിക്കുന്നവരാണെന്ന് ഉറപ്പാക്കാൻ ‘റെസിഡൻസി നിയമങ്ങൾ’ കൂടുതൽ കർശനമാക്കാനാണ് ഭരണകൂടത്തിന്റെ നീക്കം. വിദേശത്തു ജീവിക്കുന്ന ബ്രിട്ടീഷുകാർക്ക് രാഷ്ട്രീയ പാർട്ടികൾക്ക് നൽകാവുന്ന സംഭാവന തുകയിൽ ലക്ഷം പൗണ്ടിന്റെ (£100,000) പരിധി നിശ്ചയിക്കാനും നിർദേശമുണ്ട്.
നൈജൽ ഫെറാജിന്റെ നേതൃത്വത്തിലുള്ള റിഫോം യുകെ പാർട്ടിക്ക് ക്രിപ്റ്റോ കോടീശ്വരനിൽനിന്ന് 72 മില്യൺ പൗണ്ട് സംഭാവനയായി ലഭിക്കുമെന്ന റിപ്പോർട്ടുകൾ പുറത്തുവന്നതിനു പിന്നാലെയാണ് സർക്കാർ നീക്കം വേഗത്തിലാക്കിയത്. പുതിയ നിയമപ്രകാരം, വിദേശത്തുനിന്ന് യുകെയിലേക്ക് മടങ്ങിയെത്തുന്നവർക്ക് പോലും വലിയ തുകകൾ രാഷ്ട്രീയ സംഭാവനയായി നൽകാൻ 12 മാസത്തെ നിരീക്ഷണ കാലയളവ് (Cooling-off period) നിർബന്ധമാക്കാൻ ആലോചനയുണ്ട്. രാഷ്ട്രീയത്തിൽ പണത്തിന്റെ സ്വാധീനം കുറയ്ക്കാനും ജനാധിപത്യ പ്രക്രിയയുടെ സുതാര്യത ഉറപ്പാക്കാനുമാണ് ഈ നടപടിയെന്ന് സർക്കാർ വൃത്തങ്ങൾ വ്യക്തമാക്കുന്നു.
എന്നാൽ, റിഫോം യുകെ പാർട്ടിയുടെ ഫണ്ടിങ്ങിനെ തടയിടാനാണ് ലേബർ സർക്കാർ പെട്ടെന്ന് ഈ നിയമം കൊണ്ടുവരുന്നതെന്ന് പ്രതിപക്ഷ നിരയിൽനിന്ന് ആക്ഷേപം ഉയർന്നിട്ടുണ്ട്. രാഷ്ട്രീയ പാർട്ടികൾക്ക് ലഭിക്കുന്ന മൊത്തം സംഭാവനകൾക്ക് ഒരു പൊതു പരിധി നിശ്ചയിക്കണമെന്ന് ലിബറൽ ഡെമോക്രാറ്റുകൾ ഉൾപ്പെടെയുള്ള മറ്റ് രാഷ്ട്രീയ പാർട്ടികളും ആവശ്യപ്പെട്ടു വരുന്നു. ഈ ബിൽ ജനപ്രതിനിധി സഭയുടെ (House of Commons) പരിഗണനയ്ക്ക് ശേഷം കൂടുതൽ ചർച്ചകൾക്കായി പ്രഭുസഭയുടെ (House of Lords) മുന്നിലെത്തിയിരിക്കുകയാണ്.
