ലണ്ടനിൽ കാൽനടയാത്രക്കാർക്കിടയിലേക്ക് കാർ പാഞ്ഞുകയറി; യുവാവിനെതിരെ അഞ്ച് കൊലപാതകശ്രമക്കേസ്

ലണ്ടൻ : വെസ്റ്റ് ലണ്ടനിലെ ഈലിങ് ബ്രോഡ്‌വേയിൽ കാൽനടയാത്രക്കാർക്കിടയിലേക്ക് കാർ പാഞ്ഞുകയറിയ സംഭവത്തിൽ മുപ്പത്തിനാലുകാരനെതിരെ അഞ്ച് കൊലപാതകശ്രമക്കേസ് ചുമത്തി. ഗ്രേഞ്ച് പാർക്ക് സ്വദേശിയായ തിമിർ അഹമ്മദ് മുഹമ്മദ് എന്നയാളെയാണ് മെട്രോപൊളിറ്റൻ പൊലീസ് പ്രതിചേർത്തത്. കഴിഞ്ഞ ശനിയാഴ്ച ഉച്ചയ്ക്ക് 2.29ഓടെ മാർക്സ് ആൻഡ് സ്പെൻസറിന് സമീപമുള്ള തിരക്കേറിയ പ്രദേശത്തായിരുന്നു നാടിനെ നടുക്കിയ സംഭവം ഉണ്ടായത്.

സംഭവത്തിൽ കാൽനടയാത്രക്കാരായ അഞ്ചുപേർക്കാണ് പരിക്കേറ്റത്. വിവരമറിഞ്ഞ് ലണ്ടൻ ആംബുലൻസ് സർവീസ്, പാരാമെഡിക്കുകൾ, അടിയന്തര പ്രതികരണ സംഘം എന്നിവർക്കൊപ്പം ലണ്ടൻ എയർ ആംബുലൻസും സംഭവസ്ഥലത്തേക്ക് എത്തി. പരിക്കേറ്റവരിൽ മൂന്നുപേരെ ചികിത്സയ്ക്കായി ആശുപത്രിയിലേക്ക് മാറ്റുകയും രണ്ടുപേർക്ക് സംഭവസ്ഥലത്ത് തന്നെ പ്രാഥമിക ശുശ്രൂഷ നൽകുകയും ചെയ്തു. ആശുപത്രിയിൽ പ്രവേശിപ്പിച്ചവരുടെ പരിക്കുകൾ ജീവന് ഭീഷണിയുള്ളതല്ലെന്നും ജീവിതത്തെ ഗുരുതരമായി ബാധിക്കുന്ന തരത്തിലുള്ളതല്ലെന്നും പൊലീസ് വ്യക്തമാക്കി.

കൊലപാതകശ്രമത്തിന് പുറമെ പൊതുസ്വത്ത് നശിപ്പിക്കൽ, അപകടകരമായ രീതിയിൽ വാഹനമോടിക്കൽ, അപകടത്തിന് ശേഷം വാഹനം നിർത്താതെ പോയത്, ശ്വാസപരിശോധനയ്ക്ക് സാമ്പിൾ നൽകാൻ വിസമ്മതിച്ചത് തുടങ്ങിയ കുറ്റങ്ങളും പ്രതിക്കെതിരെ ചുമത്തിയിട്ടുണ്ട്. നിലവിൽ റിമാൻഡിലുള്ള പ്രതിയെ തിങ്കളാഴ്ച വിൽസ്ഡൻ മജിസ്‌ട്രേറ്റ്സ് കോടതിയിൽ ഹാജരാക്കും. പ്രാഥമിക അന്വേഷണത്തിൽ കൗണ്ടർ ടെററിസം വിഭാഗവും പങ്കെടുത്തിരുന്നെങ്കിലും, ഇത് തീവ്രവാദ ആക്രമണമായി പരിഗണിക്കുന്നില്ലെന്ന് അധികൃതർ സ്ഥിരീകരിച്ചിട്ടുണ്ട്.

English Summary: A 34-year-old man has been charged with five counts of attempted murder after a car hit pedestrians in Ealing Broadway, West London.