പ്രാദേശിക വികസനത്തിന് കൂടുതൽ അധികാരം; ബ്രിട്ടനിൽ പുതിയ ഭരണരീതി മാറ്റ വാഗ്ദാനവുമായി ആൻഡി ബേൺഹാം

ലണ്ടൻ : ബ്രിട്ടനിലെ എല്ലാ പ്രദേശങ്ങൾക്കും വികസനത്തിന്റെ ഗുണഫലങ്ങൾ ലഭ്യമാക്കുക എന്ന ലക്ഷ്യത്തോടെ പുതിയ അധികാരവികേന്ദ്രീകരണ പദ്ധതി അവതരിപ്പിക്കാൻ ഒരുങ്ങി പ്രമുഖ ലേബർ പാർട്ടി നേതാവ് ആൻഡി ബേൺഹാം. മേക്കർഫീൽഡ് ഉപതിരഞ്ഞെടുപ്പിൽ വിജയിച്ച് പാർലമെന്റിലേക്ക് മടങ്ങിയെത്തിയ ശേഷമുള്ള തന്റെ ആദ്യ പ്രധാന പ്രസംഗത്തിലാണ് അദ്ദേഹം ഈ നിർണായക ഭരണകാഴ്ചപ്പാട് വ്യക്തമാക്കുന്നത്. രാജ്യത്തിന്റെ തീരുമാനാധികാരങ്ങൾ ലണ്ടനിലെ വൈറ്റ്‌ഹാളിൽ മാത്രം കേന്ദ്രീകരിക്കുന്നതിന് പകരം പ്രാദേശിക സമൂഹങ്ങളിലേക്ക് മാറ്റണമെന്നും, താഴെത്തട്ടിൽ നിന്നുള്ള സാമ്പത്തിക വളർച്ചയാണ് ബ്രിട്ടന് ആവശ്യമെന്നുമാണ് അദ്ദേഹത്തിന്റെ പ്രധാന നിലപാട്.

കിയർ സ്റ്റാർമറിന് ശേഷം ബ്രിട്ടന്റെ പ്രധാനമന്ത്രി പദത്തിലേക്ക് ആൻഡി ബേൺഹാം എത്തിയേക്കുമെന്ന ചർച്ചകൾ ശക്തമാകുന്ന പശ്ചാത്തലത്തിലാണ് ഈ പുതിയ പ്രഖ്യാപനം വരുന്നത്. പ്രാദേശിക ഭരണകൂടങ്ങൾക്ക് ബിസിനസ് റേറ്റുകൾ ഉൾപ്പെടെയുള്ള ചില നികുതികൾ നിശ്ചയിക്കാനുള്ള അധികാരം നൽകുന്നത് അടക്കമുള്ള നിർദേശങ്ങൾ ഈ പദ്ധതിയുടെ ഭാഗമാണ്. ബ്രിട്ടനിലെ വിവിധ പ്രദേശങ്ങൾ തമ്മിലുള്ള സാമ്പത്തിക അസമത്വം പരിഹരിക്കാൻ നിലവിലെ ഭരണരീതി മാറണമെന്നും, ഓരോ പ്രദേശത്തിനും സ്വന്തം വികസന മുൻഗണനകൾ നിശ്ചയിക്കാൻ കൂടുതൽ സ്വാതന്ത്ര്യം വേണമെന്നും ഗ്രേറ്റർ മാഞ്ചസ്റ്റർ മേയറായിരുന്ന കാലത്തെ തന്റെ മാതൃക മുൻനിർത്തി ബേൺഹാം വാദിക്കുന്നു.

അടുത്ത പത്ത് വർഷത്തെ വികസന പദ്ധതിയുടെ ഭാഗമായി ജനങ്ങളുടെ ജീവിതനിലവാരം ഉയർത്തൽ, വ്യവസായവൽക്കരണം, ഭവനനിർമാണം, ജലവിതരണം ഉൾപ്പെടെയുള്ള അത്യാവശ്യ സേവനങ്ങളുടെ മെച്ചപ്പെടുത്തൽ എന്നിവയ്ക്കാണ് അദ്ദേഹം മുൻഗണന നൽകുന്നത്. ബ്രിട്ടീഷ് വ്യവസായങ്ങൾക്കും തൊഴിലവസരങ്ങൾക്കും കൂടുതൽ പിന്തുണ നൽകുന്നതിനായി സർക്കാർ വാങ്ങൽ നിയമങ്ങളിൽ മാറ്റം വരുത്തുമെന്നും, പ്രധാനമന്ത്രിയുടെ ഓഫീസിന്റെ ചില പ്രവർത്തനങ്ങൾ മാഞ്ചസ്റ്ററിലേക്ക് മാറ്റി അധികാരവികേന്ദ്രീകരണം വേഗത്തിലാക്കുമെന്നും റിപ്പോർട്ടുകളുണ്ട്. അതേസമയം ലേബർ പാർട്ടിയുടെ ധനകാര്യ ചട്ടങ്ങളും നികുതി വാഗ്ദാനങ്ങളും പൂർണ്ണമായി പാലിച്ചുകൊണ്ടായിരിക്കും ഈ മാറ്റങ്ങളെന്നും അദ്ദേഹം ഉറപ്പുനൽകുമെന്നാണ് സൂചന.

English Summary: Andy Burnham is expected to outline a major devolution plan aimed at spreading economic growth across all parts of Britain.