ഒറ്റ ചെറുബോട്ടിൽ 230 കുടിയേറ്റക്കാർ ഇംഗ്ലീഷ് ചാനൽ കടന്നു; പുതിയ റെക്കോർഡ്

ലണ്ടൻ : ഒറ്റ ചെറുബോട്ടിൽ 230 കുടിയേറ്റക്കാർ ഇംഗ്ലീഷ് ചാനൽ കടന്ന് യുകെയിലെത്തിയതായി ഫ്രഞ്ച് രക്ഷാസേനയും ബ്രിട്ടീഷ് മാധ്യമങ്ങളും റിപ്പോർട്ട് ചെയ്തു. 20ലധികം കുട്ടികൾ ഉൾപ്പെട്ട സംഘം ഞായറാഴ്ച വൈകിട്ട് വടക്കുകിഴക്കൻ ഫ്രാൻസ് തീരത്തുനിന്നാണ് യാത്ര തിരിച്ചത്. കഴിഞ്ഞ മാസം ഒറ്റ ബോട്ടിൽ 165 പേർ ചാനൽ കടന്നതായിരുന്നു ഇതുവരെയുള്ള റെക്കോർഡ്. ഏകദേശം 15 മീറ്റർ നീളമുള്ള റബർ ഡിംഗിയിലായിരുന്നു 230 പേരെയും കയറ്റിയിരുന്നതെന്ന് ഫ്രഞ്ച് SNSM lifeboat service അറിയിച്ചു.

ഫ്രഞ്ച് രക്ഷാബോട്ടുകൾ ഡിംഗിയെ ബ്രിട്ടീഷ് ജലപരിധിവരെ അനുഗമിച്ച ശേഷം യുകെ അധികൃതർക്ക് കൈമാറിയതായി റിപ്പോർട്ടുണ്ട്. കഴിഞ്ഞ മൂന്ന് മാസമായി കൂടുതൽ ആളുകളെ കയറ്റാൻ കഴിയുന്ന 15 മീറ്റർ നീളമുള്ള ഇത്തരം ബോട്ടുകളുടെ ഉപയോഗം വർധിച്ചുവരുന്നതായി ഫ്രഞ്ച് രക്ഷാപ്രവർത്തകർ അറിയിച്ചു. കഴിഞ്ഞ ആഴ്ച 150ലധികം ആളുകളുമായി യുകെയിലേക്ക് വരികയായിരുന്ന മറ്റൊരു ഡിംഗിയുടെ എൻജിനിൽ തീപിടിച്ച് ബോട്ട് മറിഞ്ഞതിനെ തുടർന്ന് വലിയ രക്ഷാപ്രവർത്തനം നടത്തേണ്ടിവന്നിരുന്നു.

ആളുകളുടെ ജീവൻ പണയംവച്ച് ലാഭം നേടുന്ന മനുഷ്യക്കടത്ത് സംഘങ്ങളുടെ അപകടകരമായ പ്രവർത്തനങ്ങളാണ് ഇത്തരം സംഭവങ്ങൾക്ക് പിന്നിലെന്ന് Home Office വിമർശിച്ചു. 2026ന്റെ ആദ്യ പകുതിയിൽ ചെറുബോട്ടുകളിലെ കുടിയേറ്റ വരവ് മുൻവർഷത്തേക്കാൾ 42 ശതമാനത്തിലധികം കുറഞ്ഞ് 14,000ലേറെ ആയി താഴ്ന്നതായി സർക്കാർ അവകാശപ്പെടുന്നുണ്ടെങ്കിലും അടുത്ത ആഴ്ചകളിൽ വീണ്ടും വർധന രേഖപ്പെടുത്തിയിട്ടുണ്ട്. ജൂലൈ 29ന് മാത്രം 752 പേർ ഇംഗ്ലീഷ് ചാനൽ കടന്നത് ഈ വർഷത്തെ ഏറ്റവും ഉയർന്ന പ്രതിദിന കണക്കായിരുന്നു.

English summary: A record 230 migrants, including more than 20 children, crossed the English Channel to the UK in a single small boat.