ഫ്ലൈദുബായ് വിമാനം റാഞ്ചാൻ ശ്രമിച്ച കോ-പൈലറ്റിന്റെ ഓസ്‌ട്രേലിയൻ ബന്ധത്തിൽ അന്വേഷണം
Australian security agencies have launched a probe into the background and links of the flydubai co-pilot who attempted to hijack an Israel-bound flight after it emerged he previously lived in Australia on a student visa.
ലണ്ടൻ : ടെൽ അവീവിലേക്ക് പറന്ന ഫ്ലൈദുബായ് വിമാനത്തിന്റെ നിയന്ത്രണം ഏറ്റെടുക്കാൻ ശ്രമിച്ച ഒമാൻ സ്വദേശിയായ കോ-പൈലറ്റ് ഹമ്മാം അൽ ഹമ്മാമി ഓസ്‌ട്രേലിയയിൽ കഴിഞ്ഞിരുന്ന വിവരങ്ങൾ പുറത്തുവന്നതോടെ അന്വേഷണം ആരംഭിച്ച് ഓസ്‌ട്രേലിയൻ സുരക്ഷാ ഏജൻസികൾ. മുൻപ് വിദ്യാർഥി വിസയിൽ രണ്ടു വർഷത്തോളം ഇയാൾ ഓസ്‌ട്രേലിയയിൽ ഉണ്ടായിരുന്നു എന്ന റിപ്പോർട്ടുകളുടെ അടിസ്ഥാനത്തിലാണ് ഓസ്‌ട്രേലിയൻ ഫെഡറൽ പൊലീസും (AFP) സുരക്ഷാ ഏജൻസിയായ 'ആസിയോ'യും (ASIO) ഉൾപ്പെടുന്ന സംയുക്ത ഭീകരവിരുദ്ധ സേന അന്വേഷണം നടത്തുന്നത്. 2014-ൽ സ്റ്റുഡന്റ് വിസ ലഭിച്ച് അടുത്ത വർഷം എത്തിയ ഇയാൾ പഠനം പൂർത്തിയാക്കാതെ 2017-ൽ രാജ്യം വിടുകയും 2019-ൽ വിസ റദ്ദാക്കപ്പെടുകയും ചെയ്തിരുന്നു.
182 യാത്രക്കാരുമായി പറന്ന വിമാനത്തിലെ ഇന്ത്യൻ വംശജനായ ക്യാപ്റ്റൻ സ്മിത് മച്ചാറിനെ കോക്ക്പിറ്റിലെ കോടാലി ഉപയോഗിച്ച് വെട്ടിപ്പരിക്കേൽപ്പിച്ചാണ് കോ-പൈലറ്റ് വിമാനം നിയന്ത്രിക്കാൻ ശ്രമിച്ചതെന്ന് യുഎഇ പ്രോസിക്യൂട്ടർ ജനറൽ വ്യക്തമാക്കി. അക്രമത്തിനിടെ മുപ്പത് സെക്കൻഡിനുള്ളിൽ വിമാനം 16,625 അടി താഴേക്ക് പതിച്ചെങ്കിലും, യാത്രക്കാരും വിമാന ജീവനക്കാരും ചേർന്ന് ഇയാളെ ബലമായി കീഴടക്കിയതിനാലാണ് വൻ ദുരന്തം ഒഴിവായത്. തീവ്രവാദ ആശയങ്ങൾ പുലർത്തിയതിന് ഇയാളെ മുൻപ് ഒമാനിൽ വിമാനം പറത്തുന്നതിൽനിന്ന് വിലക്കിയിരുന്നുവെന്നും റിപ്പോർട്ടുകളുണ്ട്.
സംഭവത്തെ തുടർന്ന് ദുബായ്ക്കും ടെൽ അവീവിനും ഇടയിലുള്ള സർവീസുകൾ ഫ്ലൈദുബായ് താൽക്കാലികമായി നിർത്തിവെച്ചു. നിലവിൽ യുഎഇയുടെ നേതൃത്വത്തിൽ ഇസ്രയേൽ അടക്കമുള്ള വിവിധ രാജ്യങ്ങളുടെ സഹകരണത്തോടെ സംഭവത്തിൽ വിപുലമായ അന്വേഷണം പുരോഗമിക്കുകയാണ്. യുകെയിലെ ബക്കിങ്ഹാംഷെയർ ന്യൂ യൂണിവേഴ്സിറ്റിയിൽ ഇയാൾ ഏവിയേഷൻ മാനേജ്മെന്റിൽ വിദൂര വിദ്യാഭ്യാസം നേടിയിരുന്നുവെങ്കിലും അവിടെ പൈലറ്റ് പരിശീലനം ലഭിച്ചിരുന്നില്ലെന്നും അധികൃതർ അറിയിച്ചു.
