തലച്ചോറിലെ ട്യൂമർ പരിശോധനാഫലം ഇനി മണിക്കൂറുകൾക്കകം; യുകെയിൽ എൻഎച്ച്എസിന് ചരിത്രനേട്ടം
The UK's NHS has introduced a breakthrough genetic testing technology that cuts brain tumour diagnostic times from weeks to just hours, enabling faster and more precise treatment planning during surgery.
ലണ്ടൻ : തലച്ചോറിലെ ട്യൂമർ (Brain Tumour) ഏത് വിഭാഗത്തിൽപ്പെട്ടതാണെന്ന് മണിക്കൂറുകൾക്കകം കൃത്യമായി തിരിച്ചറിയാൻ സഹായിക്കുന്ന പുതിയ സാങ്കേതികവിദ്യ അവതരിപ്പിച്ച് യുകെയിലെ നാഷണൽ ഹെൽത്ത് സർവീസ് (NHS). രോഗനിർണയ ഫലങ്ങൾക്കായി ആഴ്ചകളോളം നീളുന്ന കാത്തിരിപ്പ് ഒഴിവാക്കുന്നതാണ് ഈ മുന്നേറ്റം. ഓക്സ്ഫോർഡ് നാനോപോർ സാങ്കേതികവിദ്യയും അത്യാധുനിക സോഫ്റ്റ്‌വെയറും ഉപയോഗിച്ച് ട്യൂമറിന്റെ ജനിതക ഘടന അതിവേഗം വിശകലനം ചെയ്താണ് ഈ പരിശോധന സാധ്യമാക്കുന്നത്.
മുൻപ് ആറ് മുതൽ എട്ട് ആഴ്ച വരെ സമയമെടുത്തിരുന്ന രോഗനിർണയമാണ് ഇതോടെ കേവലം രണ്ട് മണിക്കൂറിലേക്ക് ചുരുങ്ങിയത്. ശസ്ത്രക്രിയ നടന്നുകൊണ്ടിരിക്കുമ്പോൾ തന്നെ ട്യൂമറിന്റെ കൃത്യമായ സ്വഭാവം തിരിച്ചറിയാൻ സർജന്മാർക്ക് സാധിക്കുമെന്നതാണ് ഇതിന്റെ പ്രധാന നേട്ടം. നോട്ടിങ്ഹാമിലെ ക്വീൻസ് മെഡിക്കൽ സെന്ററിൽ നടത്തിയ ശസ്ത്രക്രിയയ്ക്കിടെ രോഗി ഓപ്പറേഷൻ തിയേറ്ററിൽ ആയിരിക്കുമ്പോൾ തന്നെ പരിശോധനാഫലം ലഭ്യമാക്കാൻ ഡോക്ടർമാർക്ക് സാധിച്ചു.
യുകെയിൽ പ്രതിവർഷം 12,000-ത്തിലധികം ആളുകൾക്ക് പ്രാഥമിക തലച്ചോറിലെ ട്യൂമർ സ്ഥിരീകരിക്കുന്നുണ്ടെന്നും 40 വയസ്സിന് താഴെയുള്ളവരിലെ കാൻസർ മരണങ്ങൾക്ക് പ്രധാന കാരണമാണിതെന്നും കണക്കുകൾ വ്യക്തമാക്കുന്നു. പരിശോധനാഫലം വേഗത്തിൽ ലഭിക്കുന്നത് രോഗികളുടെ മാനസിക സംഘർഷം കുറയ്ക്കുന്നതിനൊപ്പം റേഡിയോ തെറാപ്പി, കീമോതെറാപ്പി തുടങ്ങിയ തുടർചികിത്സകൾ കാലതാമസമില്ലാതെ ആരംഭിക്കാനും ഏറെ സഹായകരമാകും.
