യുകെയിൽ എഡിഎച്ച്ഡി, ഓട്ടിസം പരിശോധനകൾക്ക് രണ്ടു വർഷത്തെ കാത്തിരിപ്പ്; എൻഎച്ച്എസ് നടപടിക്കെതിരെ പ്രതിഷേധം
NHS care boards in England have imposed a minimum two-year waiting time for ADHD and autism assessments to curb soaring costs amid rising demand, sparking strong criticism from patient advocacy groups.
ലണ്ടൻ : ഇംഗ്ലണ്ടിൽ എഡിഎച്ച്ഡി (ADHD), ഓട്ടിസം പരിശോധനകൾക്കായി രോഗികൾ കുറഞ്ഞത് രണ്ടു വർഷമെങ്കിലും കാത്തിരിക്കണമെന്ന് ആരോഗ്യ ഏജൻസികൾ നിബന്ധന ഏർപ്പെടുത്തി. രോഗനിർണയത്തിനായുള്ള ആവശ്യക്കാരുടെ എണ്ണം വൻതോതിൽ വർധിച്ചതും ചെലവ് താങ്ങാനാവാത്തതുമാണ് ഇംഗ്ലണ്ടിലെ നാല് എൻഎച്ച്എസ് ഇന്റഗ്രേറ്റഡ് കെയർ ബോർഡുകളെ (ICB) ഇത്തരമൊരു കടുത്ത തീരുമാനമെടുക്കാൻ പ്രേരിപ്പിച്ചത്. വെസ്റ്റ് യോർക്ക്‌ഷെയർ ഉൾപ്പെടെയുള്ള മേഖലകളിൽ ഈ നിയന്ത്രണം നിലവിൽ വന്നതോടെ രോഗികൾക്ക് സ്വകാര്യ ക്ലിനിക്കുകൾ വഴിയുള്ള പരിശോധനയും ഉടനടി ലഭ്യമാകില്ല.
ചെലവ് ചുരുക്കലിന്റെ ഭാഗമായി ആകെ 15 കെയർ ബോർഡുകളാണ് പരിശോധനകൾക്ക് പലവിധ നിയന്ത്രണങ്ങൾ ഏർപ്പെടുത്തിയിട്ടുള്ളത്. നിലവിൽ ഇംഗ്ലണ്ടിൽ എഡിഎച്ച്ഡി പരിശോധനയ്ക്കായി 9.6 ലക്ഷം പേരും ഓട്ടിസം നിർണയത്തിനായി 2.95 ലക്ഷത്തോളം പേരും കാത്തിരിപ്പ് പട്ടികയിലുണ്ട്. കെയർ ബോർഡുകളുടെ ചെലവ് മുൻവർഷങ്ങളേക്കാൾ മൂന്നിരട്ടിയോളം ഉയർന്ന സാഹചര്യത്തിലാണ് പരിശോധനകളുടെ എണ്ണം പരിമിതപ്പെടുത്താനും മുൻഗണനാ മാനദണ്ഡങ്ങൾ കൊണ്ടുവരാനും അധികൃതർ നിർബന്ധിതരായത്.
എന്നാൽ, രണ്ടു വർഷത്തെ കാത്തിരിപ്പ് സമയം രോഗികളോടുള്ള കടുത്ത അനീതിയാണെന്ന് ചൂണ്ടിക്കാട്ടി വിവിധ ആരോഗ്യ സംഘടനകൾ രംഗത്തെത്തി. കുട്ടികളുടെ പഠനത്തെയും ഭാവിയെയും ഈ കാലതാമസം സാരമായി ബാധിക്കുമെന്നും മാനസികാരോഗ്യ പ്രതിസന്ധികൾക്കും ആത്മഹത്യാ സാധ്യതകൾക്കും ഇത് കാരണമായേക്കാമെന്നും എഡിഎച്ച്ഡി യുകെ, നാഷണൽ ഓട്ടിസ്റ്റിക് സൊസൈറ്റി തുടങ്ങിയ സന്നദ്ധ സംഘടനകൾ മുന്നറിയിപ്പ് നൽകി.
