ഇംഗ്ലണ്ടിൽ 55,000 നഴ്‌സുമാരുടെ കുറവ്; രോഗികളുടെ സുരക്ഷ ഗുരുതര ഭീഷണിയിലെന്ന് RCN

ലണ്ടൻ : ഇംഗ്ലണ്ടിലെ എൻഎച്ച്എസിൽ നഴ്‌സുമാരുടെ രൂക്ഷമായ ക്ഷാമം രോഗികളുടെ സുരക്ഷയ്ക്ക് ഗുരുതര ഭീഷണി സൃഷ്ടിക്കുന്നതായി റോയൽ കോളജ് ഓഫ് നഴ്‌സിങ്ങിന്റെ (RCN) പുതിയ റിപ്പോർട്ട്. മതിയായ നഴ്‌സുമാർ ഡ്യൂട്ടിയിലില്ലാത്തതിനാൽ രോഗികൾക്ക് വേദനസംഹാരികളും ജീവൻരക്ഷാ മരുന്നുകളും ലഭിക്കാൻ മണിക്കൂറുകൾ കാത്തിരിക്കേണ്ടിവരുന്നതായും ചിലർ ആവശ്യമായ പരിചരണം ലഭിക്കാതെ ഗുരുതരാവസ്ഥയിലാകുന്നതായും റിപ്പോർട്ടിൽ പറയുന്നു. ആശുപത്രിക്കിടക്കയിൽനിന്ന് വീണ് എല്ലൊടിയുകയും മസ്തിഷ്‌കത്തിൽ രക്തസ്രാവമുണ്ടാകുകയും ചെയ്ത സംഭവങ്ങളും രേഖപ്പെടുത്തിയിട്ടുണ്ട്.

എൻഎച്ച്എസ് ആശുപത്രി ട്രസ്റ്റുകളുടെ ബോർഡ് രേഖകളിലെ ‘നഴ്‌സിങ് റെഡ് ഫ്ലാഗ്’ റിപ്പോർട്ടുകൾ വിശകലനം ചെയ്താണ് കണ്ടെത്തലുകൾ പുറത്തുവിട്ടത്. വേദനസംഹാരികളും അത്യാവശ്യ മരുന്നുകളും നൽകുന്നതിലെ കാലതാമസം, രോഗീപരിചരണം മുടങ്ങൽ, കിടക്കയിൽനിന്നുള്ള വീഴ്ചകൾ എന്നിവ ഉൾപ്പെടെ ചില ട്രസ്റ്റുകളിൽ പ്രതിമാസം നൂറുകണക്കിന് സുരക്ഷാ സംഭവങ്ങൾ റിപ്പോർട്ട് ചെയ്യപ്പെടുന്നുണ്ട്. ഈസ്റ്റ് ഓഫ് ഇംഗ്ലണ്ടിലെ ഒരു ആശുപത്രിയിൽ രാത്രി ജീവനക്കാരുടെ കുറവിനെ തുടർന്ന് കിടക്കയിൽനിന്ന് വീണ വയോധികയ്ക്ക് മസ്തിഷ്‌ക രക്തസ്രാവവും ഇടുപ്പ് ഒടിയലും സംഭവിച്ചതായും സഹായം ലഭിക്കാൻ പത്തുമിനിറ്റെടുത്തതായും ഒരു നഴ്‌സ് വെളിപ്പെടുത്തി.

ഇംഗ്ലണ്ടിൽ ഔദ്യോഗികമായി ഏകദേശം 23,000 നഴ്‌സിങ് ഒഴിവുകളാണ് രേഖപ്പെടുത്തിയിട്ടുള്ളതെങ്കിലും യഥാർഥ കുറവ് ഇതിന്റെ ഇരട്ടിയിലേറെയാണെന്ന് RCN വിലയിരുത്തുന്നു. ആശുപത്രികളുടെ പ്രവർത്തനവർധനയ്ക്ക് അനുസരിച്ച് നഴ്‌സുമാരുടെ എണ്ണം ഉയർന്നിരുന്നെങ്കിൽ നിലവിൽ 55,000 പേർ കൂടി ആവശ്യമായിരുന്നുവെന്നാണ് കണക്ക്. 2009 മുതൽ ഡോക്ടർമാരുടെ എണ്ണം 60 ശതമാനം വർധിച്ചപ്പോൾ നഴ്‌സുമാരുടെ വർധന 33 ശതമാനം മാത്രമാണ്; ഡോക്ടർമാരുടെ വളർച്ചാനിരക്കിനൊപ്പം നഴ്‌സിങ് മേഖലയിലും നിക്ഷേപം നടത്തിയിരുന്നെങ്കിൽ 77,000-ത്തിലധികം നഴ്‌സുമാർ അധികമായി ഉണ്ടായേനെയെന്നും റിപ്പോർട്ട് ചൂണ്ടിക്കാട്ടുന്നു. മതിയായ നിക്ഷേപവും ദീർഘകാല തൊഴിൽശക്തി പദ്ധതിയും ഇല്ലെങ്കിൽ രോഗിസുരക്ഷാ പ്രതിസന്ധി കൂടുതൽ രൂക്ഷമാകുമെന്ന് RCN ജനറൽ സെക്രട്ടറിയും ചീഫ് എക്സിക്യൂട്ടീവുമായ പ്രഫ. നിക്കോള റേഞ്ചർ മുന്നറിയിപ്പ് നൽകി.