യുകെ ഐഎൽആർ ചട്ടങ്ങളിൽ അന്തിമ പ്രഖ്യാപനം അടുത്തയാഴ്ച; നിലവിലെ കെയർ ജീവനക്കാർക്ക് ഇളവിന് സാധ്യത
പുതിയ ഐഎൽആർ ചട്ടങ്ങളിൽ അടുത്തയാഴ്ച പ്രഖ്യാപനമുണ്ടായേക്കും; നിലവിലെ സാമൂഹിക പരിചരണ ജീവനക്കാർക്ക് നീണ്ട കാത്തിരിപ്പിൽനിന്ന് ഇളവിന് സാധ്യതയുണ്ടെങ്കിലും നിബന്ധനകൾ പ്രഖ്യാപിച്ചിട്ടില്ല.
ലണ്ടൻ : യുകെയിൽ നിയമപരമായി എത്തിയ കുടിയേറ്റക്കാരുടെ സ്ഥിരതാമസാനുമതിയായ ഇൻഡെഫിനിറ്റ് ലീവ് ടു റിമെയ്ൻ (ILR) സംബന്ധിച്ച പുതിയ ചട്ടങ്ങളിൽ ആഭ്യന്തര സെക്രട്ടറി ഷബാന മഹ്മൂദ് അടുത്തയാഴ്ച അന്തിമ തീരുമാനം പ്രഖ്യാപിച്ചേക്കും. സാധാരണ യോഗ്യതാകാലം അഞ്ചുവർഷത്തിൽനിന്ന് പത്തുവർഷമാക്കാനും കുറഞ്ഞ വരുമാനമുള്ള ചില വിഭാഗങ്ങൾക്ക് 15 വർഷത്തെ കാത്തിരിപ്പ് ഏർപ്പെടുത്താനുമായിരുന്നു നിർദേശം. എന്നാൽ, നിലവിൽ യുകെയിലെ സാമൂഹിക പരിചരണമേഖലയിൽ ജോലി ചെയ്യുന്ന ഭൂരിഭാഗം ജീവനക്കാർക്കും ദീർഘമായ കാത്തിരിപ്പിൽനിന്ന് ഒഴിവ് ലഭിക്കാനാണ് സാധ്യതയെന്ന് റിപ്പോർട്ട്. ഇളവിന്റെ പരിധിയും നിബന്ധനകളും ഔദ്യോഗികമായി പ്രഖ്യാപിച്ചിട്ടില്ല.
ഇതിനകം രാജ്യത്തെത്തി ജോലി ചെയ്യുന്നവർക്കും പുതിയ വ്യവസ്ഥകൾ ബാധകമാക്കാനുള്ള നീക്കത്തിനെതിരെ ലേബർ പാർട്ടിക്കുള്ളിലും സർക്കാരിനുള്ളിലും ശക്തമായ എതിർപ്പുയർന്നിരുന്നു. നിലവിലെ ചട്ടങ്ങൾ വിശ്വസിച്ച് യുകെയിലെത്തിയവരുടെ നിബന്ധനകൾ പിന്നീട് മാറ്റുന്നത് നീതിയല്ലെന്നായിരുന്നു വിമർശനം. മന്ത്രിസഭയിൽ തിരിച്ചെത്തുന്നതിനുമുമ്പ് ആഞ്ചല റെയ്നറും നിർദേശങ്ങളെ പരസ്യമായി എതിർത്തിരുന്നു. പ്രത്യേകിച്ച് കുറഞ്ഞ വേതനത്തിൽ ജോലി ചെയ്യുന്ന കെയർ ജീവനക്കാർക്ക് അഞ്ചുവർഷത്തിനുപകരം 15 വർഷം കാത്തിരിക്കേണ്ടിവരുമെന്നത് ആശങ്കയ്ക്ക് കാരണമായി. പരിഷ്കാരങ്ങളെക്കുറിച്ചുള്ള പൊതുജനാഭിപ്രായ ശേഖരണത്തിൽ ഏകദേശം രണ്ടുലക്ഷം പ്രതികരണങ്ങളാണ് ലഭിച്ചത്.
അതേസമയം, മറ്റു ഭൂരിഭാഗം തൊഴിലാളികൾക്കും സ്ഥിരതാമസത്തിന് അപേക്ഷിക്കാൻ പത്തുവർഷം യുകെയിൽ താമസിക്കുകയും ജോലി ചെയ്യുകയും വേണമെന്ന നിർദേശം തുടർന്നേക്കുമെന്നാണ് വിവരം. ഉയർന്ന വരുമാനമോ പ്രാദേശിക സമൂഹത്തിനുള്ള സംഭാവനകളോ പരിഗണിച്ച് ഈ കാലയളവ് കുറയ്ക്കാനുള്ള വ്യവസ്ഥകളും പ്രതീക്ഷിക്കുന്നു. ഉയർന്ന കുടിയേറ്റത്തിനുശേഷം കൂടുതൽ പേർ സ്ഥിരതാമസത്തിന് അർഹരാകുന്നതിലെ ആശങ്കയാണ് പരിഷ്കാരത്തിന് കാരണമായി സർക്കാർ ചൂണ്ടിക്കാട്ടുന്നത്. എന്നാൽ, പാർലമെന്റിൽ അവതരിപ്പിക്കുന്നതുവരെ അന്തിമ തീരുമാനങ്ങളെക്കുറിച്ച് പ്രതികരിക്കില്ലെന്ന് ഹോം ഓഫീസ് അറിയിച്ചു. ഐഎൽആർ ലഭിക്കുന്നവർക്ക് കാലപരിധിയില്ലാതെ യുകെയിൽ താമസിക്കാനും ജോലി ചെയ്യാനും പഠിക്കാനും കഴിയും; ക്ഷേമാനുകൂല്യങ്ങൾ ലഭിക്കുന്നത് അതത് അർഹതാനിബന്ധനകൾക്ക് വിധേയമാണ്.
English Summary: Shabana Mahmood is expected to announce final UK settlement reforms next week, with most existing social care workers likely to be exempt from longer waits.
