യുകെയിൽ യുവാക്കൾക്കായി ഒരു ലക്ഷം തൊഴിലവസരങ്ങൾ ലക്ഷ്യമിട്ട് ഹോട്ടൽ–റസ്റ്ററന്റ് മേഖല

ലണ്ടൻ : യുകെയിൽ ജോലിയിലോ പഠനത്തിലോ തൊഴിൽപരിശീലനത്തിലോ ഇല്ലാത്ത യുവാക്കൾക്കായി ഒരു ലക്ഷം വരെ തൊഴിലവസരങ്ങൾ ഒരുക്കാൻ ഹോട്ടൽ–റസ്റ്ററന്റ് മേഖല. 18 മുതൽ 24 വയസ്സുവരെയുള്ളവരെ ലക്ഷ്യമിട്ട് അടുത്ത മൂന്നുവർഷത്തിനുള്ളിൽ നടപ്പാക്കുന്ന പദ്ധതിയിൽ വാഗമാമ, നാൻഡോസ്, ബർഗർ കിങ്, പ്രീമിയർ ഇൻ തുടങ്ങിയ പ്രമുഖ സ്ഥാപനങ്ങൾ പങ്കെടുക്കും. തൊഴിൽ–പെൻഷൻ വകുപ്പുമായി സഹകരിച്ചാണ് പദ്ധതി നടപ്പാക്കുന്നത്. തൊഴിൽവിപണിയിൽ പ്രവേശിക്കാൻ പ്രയാസപ്പെടുന്ന യുവാക്കൾക്ക് അവസരങ്ങൾ തുറന്നുകൊടുക്കുകയാണ് ലക്ഷ്യം.

പദ്ധതിയുടെ ഭാഗമായി നാലാഴ്ച വരെ പ്രവൃത്തിപരിചയ പരിശീലനം നൽകും. ജോലി നേടാൻ ആവശ്യമായ കഴിവുകളും ആത്മവിശ്വാസവും വളർത്തുന്നതിനാണ് പരിശീലനത്തിൽ മുൻഗണന നൽകുന്നത്. എന്നാൽ പരിശീലനത്തിൽ പങ്കെടുക്കുന്ന എല്ലാവർക്കും സ്ഥിരം ജോലി ഉറപ്പുനൽകുന്നതായി പ്രഖ്യാപനത്തിൽ പറയുന്നില്ല. സർക്കാർ ഇടപെടലുണ്ടായില്ലെങ്കിൽ ജോലിയിലും പഠനത്തിലും പരിശീലനത്തിലും ഇല്ലാത്ത യുവാക്കളുടെ എണ്ണം അടുത്ത അഞ്ചുവർഷത്തിനുള്ളിൽ 12.5 ലക്ഷമായി ഉയർന്നേക്കാമെന്ന് മുൻ ആരോഗ്യമന്ത്രി അലൻ മിൽബേൺ മുന്നറിയിപ്പ് നൽകിയിട്ടുണ്ട്.

യുവാക്കളുടെ തൊഴിലില്ലായ്മ പരിഹരിക്കുന്നതിനെക്കുറിച്ചുള്ള മിൽബേണിന്റെ വിശദമായ റിപ്പോർട്ട് ഒക്ടോബർ 28ലെ ബജറ്റിനുശേഷം പുറത്തുവരുമെന്നാണ് പ്രതീക്ഷ. സ്കൂളിലെ തുടർച്ചയായ ഹാജരില്ലായ്മയും പഠനത്തിൽനിന്നുള്ള പുറത്താകലും പരിഹരിക്കാനുള്ള നടപടികളും സർക്കാർ പരിഗണിക്കുന്നുണ്ട്. തൊഴിൽപരിശീലനവും അപ്രന്റിസ്ഷിപ്പുകളും ശക്തിപ്പെടുത്തുന്നതിനൊപ്പം ക്ഷേമാനുകൂല്യ സംവിധാനത്തിൽ മാറ്റങ്ങൾ വരുത്തുന്നതും ചർച്ചയിലാണ്. ഈ മാറ്റങ്ങളിൽ അന്തിമ തീരുമാനമായിട്ടില്ല.

English Summary: UK hospitality businesses aim to offer up to 100,000 jobs over three years to 18–24-year-olds who are not in education, employment or training.