ബർമിംഗ്ഹാമിൽ മലയാളി വിദ്യാർത്ഥിയുടെ ആർട്ട് എക്സിബിഷൻ ജൂലൈ 1 മുതൽ

ലണ്ടൻ : യുകെയിലെ ബർമിംഗ്ഹാമിൽ മലയാളി വിദ്യാർത്ഥിയുടെ സോളോ ആർട്ട് എക്സിബിഷൻ ജൂലൈ 1 മുതൽ നടക്കും. തൃശ്ശൂർ ജില്ലയിലെ വലപ്പാട് ഗ്രാമപഞ്ചായത്ത് സ്വദേശിയും ബർമിംഗ്ഹാമിലെ ആസ്റ്റൺ യൂണിവേഴ്സിറ്റി വിദ്യാർത്ഥിയുമായ ശ്രീരാഗ് മോഹന്റെ ‘ദി ലൈഫ് ചേഞ്ചിംഗ് മൊമെന്റ്’ എന്ന ചിത്രപ്രദർശനമാണ് ജൂലൈ 1 മുതൽ 11 വരെ ബർമിംഗ്ഹാമിലെ ദി ഹൈവ് ഗാലറിയിൽ നടക്കുന്നത്. ജീവിതത്തിലെ വെല്ലുവിളികളെയും പ്രതീക്ഷയെയും തന്റെ ചിത്രങ്ങളിലൂടെ അവതരിപ്പിക്കുന്നതാണ് ഈ പ്രദർശനം.
ജനനസമയത്ത് കൈയിലെ നാഡികൾക്ക് സംഭവിച്ച പരിക്കിനെയും ശരീരചലനത്തെയും പേശികളുടെ നിയന്ത്രണത്തെയും ബാധിക്കുന്ന ചെറിയ തോതിലുള്ള ആരോഗ്യപ്രശ്നത്തെയും അതിജീവിച്ച അനുഭവങ്ങളാണ് ശ്രീരാഗിന്റെ ചിത്രങ്ങൾക്ക് പിന്നിലെ പ്രധാന പ്രചോദനം. കേരളത്തിലെ ക്ഷേത്ര ചുമർചിത്ര ശൈലിയും സ്വന്തം ജീവിതാനുഭവങ്ങളും കൂട്ടിച്ചേർത്താണ് അദ്ദേഹം ചിത്രങ്ങൾ ഒരുക്കിയിരിക്കുന്നത്. കേരളത്തിലും ഗ്രൂപ്പ് എക്സിബിഷനുകളിലും സോളോ എക്സിബിഷനുകളിലും പങ്കെടുത്തിട്ടുള്ള ശ്രീരാഗ്, എറണാകുളം ദർബാർ ഹാളിലും തന്റെ സോളോ പ്രദർശനം നടത്തിയിട്ടുണ്ട്. 2016-ൽ മാതൃഭൂമി പത്രത്തിലും അദ്ദേഹത്തിന്റെ കലാജീവിതത്തെക്കുറിച്ച് ഫീച്ചർ വന്നിരുന്നു.
പ്രദർശനം നടക്കുന്ന വിലാസം: The Hive Gallery, 43-47 Vittoria Street, Jewellery Quarter, Birmingham B1 3PE. ജൂലൈ 1 മുതൽ 11 വരെ പ്രദർശനം നടക്കും. സന്ദർശന സമയം രാവിലെ 10 മണി മുതൽ വൈകിട്ട് 3.30 വരെയാണ്. വൈകിട്ട് 3 മണിവരെയാണ് അവസാന പ്രവേശനം. പ്രവേശനം സൗജന്യമാണ്. കൂടുതൽ വിവരങ്ങൾക്ക് ശ്രീരാഗ് മോഹന്റെ Instagram profile @cancerian_phoenix സന്ദർശിക്കാം. പ്രതിസന്ധികളെ മറികടന്ന് മുന്നോട്ട് പോകാനും ജീവിതത്തിൽ പ്രതീക്ഷ കൈവിടാതിരിക്കാനും കലക്ക് വലിയ ശക്തിയുണ്ടെന്ന സന്ദേശമാണ് ഈ പ്രദർശനം പങ്കുവെക്കുന്നത്.
English Summary: Malayali student and artist Sreerag Mohan will host his solo art exhibition ‘The Life Changing Moment’ at The Hive Gallery in Birmingham from July 1 to 11.