യുകെയിൽ അഞ്ച് ദിവസത്തിലൊരിക്കൽ മുസ്ലിം പള്ളികൾക്ക് നേരെ ആക്രമണമെന്ന് റിപ്പോർട്ട്

ലണ്ടൻ : യുകെയിൽ ശരാശരി അഞ്ച് ദിവസത്തിലൊരിക്കൽ മുസ്ലിം പള്ളികൾക്ക് നേരെ ആക്രമണമോ നശീകരണശ്രമമോ നടക്കുന്നതായി പുതിയ റിപ്പോർട്ട്. കെട്ടിടങ്ങൾക്ക് കേടുപാടുകൾ വരുത്തൽ, ഭീഷണി സന്ദേശങ്ങൾ, വിദ്വേഷ മുദ്രാവാക്യങ്ങൾ എഴുതൽ, ആരാധകരെ ലക്ഷ്യമിട്ടുള്ള ആക്രമണങ്ങൾ എന്നിവയാണ് പ്രധാനമായും രേഖപ്പെടുത്തിയിരിക്കുന്നത്.

മുസ്ലിം സമൂഹത്തിനെതിരായ വിദ്വേഷ സംഭവങ്ങൾ വർധിക്കുന്നതിൽ മതനേതാക്കളും മനുഷ്യാവകാശ സംഘടനകളും ആശങ്ക പ്രകടിപ്പിച്ചു. പല സംഭവങ്ങളും പോലീസിൽ റിപ്പോർട്ട് ചെയ്യപ്പെടാതെ പോകുന്നതിനാൽ യഥാർത്ഥ കണക്ക് ഇതിലും കൂടുതലാകാമെന്നും അവർ ചൂണ്ടിക്കാട്ടുന്നു.

ആരാധനാലയങ്ങൾക്ക് കൂടുതൽ സുരക്ഷ നൽകുകയും വിദ്വേഷ കുറ്റകൃത്യങ്ങളെ നേരിടാൻ ശക്തമായ നടപടികൾ സ്വീകരിക്കുകയും വേണമെന്ന് സംഘടനകൾ സർക്കാരിനോട് ആവശ്യപ്പെട്ടു. സമൂഹങ്ങൾ തമ്മിലുള്ള ഐക്യം സംരക്ഷിക്കാൻ രാഷ്ട്രീയ നേതാക്കളും സാമൂഹിക മാധ്യമ സ്ഥാപനങ്ങളും ഉത്തരവാദിത്തത്തോടെ പ്രവർത്തിക്കണമെന്നും റിപ്പോർട്ട് നിർദേശിക്കുന്നു.

English Summary: A new report says mosques in the UK are attacked on average once every five days.