രോഗികളുടെ വിവരങ്ങൾ ചോർത്തുന്ന എൻഎച്ച്എസ് ജീവനക്കാരെ ഉടനടി സസ്പെൻഡ് ചെയ്യും; കർശന നടപടിയുമായി എൻഎച്ച്എസ് ഇംഗ്ലണ്ട്

ലണ്ടൻ : രോഗികളുടെ അതീവ സ്വകാര്യമായ മെഡിക്കൽ രേഖകളിലേക്ക് അനുവാദമില്ലാതെ ഒളിഞ്ഞുനോക്കുന്ന ജീവനക്കാരെ സംശയത്തിന്റെ നിഴലിൽത്തന്നെ ഉടനടി സസ്പെൻഡ് ചെയ്യാനും എൻഎച്ച്എസ് കമ്പ്യൂട്ടർ സംവിധാനങ്ങളിൽ നിന്നുള്ള അവരുടെ പ്രവേശനം റദ്ദാക്കാനും എൻഎച്ച്എസ് ഇംഗ്ലണ്ട് (NHS England) തീരുമാനിച്ചു. രോഗികളുടെ വിശ്വാസ്യത ചൂഷണം ചെയ്യുന്ന പ്രവണത ഇനി വെച്ചുപൊറുപ്പിക്കില്ലെന്നും കർശന നടപടികൾ അനിവാര്യമാണെന്നും എൻഎച്ച്എസ് ഇംഗ്ലണ്ട് മേധാവി സർ ജിം മാക്കി വ്യക്തമാക്കി. അന്വേഷണം പൂർത്തിയാകുന്നതുവരെ കാത്തിരിക്കാതെ, വിവരങ്ങൾ ചോർത്തിയതായി പരാതി ഉയർന്ന ഉടൻ തന്നെ അച്ചടക്ക നടപടിയെടുക്കാനാണ് എല്ലാ എൻഎച്ച്എസ് ട്രസ്റ്റുകൾക്കും ആശുപത്രികൾക്കും പുതിയ കർശന മാർഗ്ഗനിർദ്ദേശം നൽകിയിരിക്കുന്നത്.

നോട്ടിങ്ഹാം ആക്രമണക്കേസിലെ ഇരകളുടെയും സൗത്ത്‌പോർട്ട് കുത്തേറ്റ് ചികിത്സയിലായിരുന്ന കുട്ടികളുടെയും രേഖകൾ ജീവനക്കാർ അനധികൃതമായി പരിശോധിച്ച സംഭവങ്ങൾ വലിയ വിവാദമായിരുന്നു. ഇതിനു പിന്നാലെ നടത്തിയ അന്വേഷണങ്ങളിൽ കഴിഞ്ഞ അഞ്ച് വർഷത്തിനിടെ രോഗികളുടെ രേഖകൾ അനുമതിയില്ലാതെ പരിശോധിച്ചതിന് ഇരുന്നൂറിലധികം ജീവനക്കാരെ പിരിച്ചുവിടുകയും രണ്ടായിരത്തിലധികം പേർക്കെതിരെ അച്ചടക്ക നടപടി സ്വീകരിക്കുകയും ചെയ്തതായി കണ്ടെത്തിയിരുന്നു. ഡോക്ടർമാർ, നഴ്സുമാർ ഉൾപ്പെടെയുള്ള ആരോഗ്യപ്രവർത്തകർ തങ്ങളുടെ കൗതുകത്തിനായോ വ്യക്തിപരമായ ആവശ്യങ്ങൾക്കോ രോഗികളുടെ രേഖകൾ തുറന്നുനോക്കുന്നത് നിയമവിരുദ്ധമാണെന്നും ക്രിമിനൽ കുറ്റമായി കണക്കാക്കുമെന്നും അധികൃതർ മുന്നറിയിപ്പ് നൽകി.

വിവരങ്ങൾ ചോർത്തുന്നതായി കണ്ടെത്തുന്ന രജിസ്റ്റേർഡ് ആരോഗ്യപ്രവർത്തകരെ മെഡിക്കൽ റെഗുലേറ്റർമാർക്ക് റിപ്പോർട്ട് ചെയ്യുമെന്നും ഇവർക്ക് പ്രാക്ടീസ് ചെയ്യാനുള്ള ലൈസൻസ് വരെ റദ്ദാക്കപ്പെടുമെന്നും സർ ജിം മാക്കി ഓർമ്മിപ്പിച്ചു. ഇതിനുപുറമെ, ഡാറ്റാ ലംഘനങ്ങൾക്കെതിരെ ഇൻഫർമേഷൻ കമ്മീഷണേഴ്സ് ഓഫീസും (ICO) പോലീസും അന്വേഷണം നടത്തി കുറ്റക്കാർക്കെതിരെ ക്രിമിനൽ പ്രോസിക്യൂഷൻ നടപടികൾ സ്വീകരിക്കുമെന്നും എൻഎച്ച്എസ് വ്യക്തമാക്കി. ഡിജിറ്റൽ സംവിധാനങ്ങളിൽ സുരക്ഷ ശക്തമാക്കുന്നതിനൊപ്പം, ഓരോ ജീവനക്കാരനും തങ്ങളുടെ ഡ്യൂട്ടിയുമായി ബന്ധപ്പെട്ട വിവരങ്ങൾ മാത്രം ലഭ്യമാകുന്ന തരത്തിലുള്ള 'റോൾ-ബേസ്ഡ്' നിയന്ത്രണങ്ങൾ ഏർപ്പെടുത്താൻ ട്രസ്റ്റുകളോട് നിർദ്ദേശിച്ചിട്ടുണ്ട്.