ഓപ്പൺഎഐ ആസ്ഥാനത്ത് രഹസ്യ റെക്കോർഡിംഗ് ഉപകരണം; സൗദി പൗരനായ ജീവനക്കാരൻ അറസ്റ്റിൽ

ലണ്ടൻ : പ്രമുഖ ആർട്ടിഫിഷ്യൽ ഇന്റലിജൻസ് കമ്പനിയായ ഓപ്പൺഎഐയുടെ സാൻ ഫ്രാൻസിസ്കോയിലെ ആസ്ഥാനത്ത് രഹസ്യ റെക്കോർഡിംഗ് ഉപകരണം സ്ഥാപിച്ച ജീവനക്കാരൻ അറസ്റ്റിലായി. സ്ഥാപനത്തിൽ എഞ്ചിനീയറായി ജോലി ചെയ്തിരുന്ന 35-കാരനായ സൗദി പൗരൻ അബ്ദുറഹ്മാൻ അൽഫോസാനെയാണ് ഒക്ടോബർ 9-ന് എഫ്.ബി.ഐ അറസ്റ്റ് ചെയ്തത്. രഹസ്യ സ്വഭാവമുള്ള യോഗങ്ങൾ സ്ഥിരമായി നടക്കുന്ന കോൺഫറൻസ് മുറിയിലെ ടിവിക്ക് പിന്നിലാണ് ഇയാൾ എൻക്രിപ്റ്റ് ചെയ്ത റെക്കോർഡിംഗ് ഉപകരണം ഒളിപ്പിച്ചിരുന്നതെന്ന് യുഎസ് നീതിന്യായ വകുപ്പ് വ്യക്തമാക്കി. സംഭവത്തെ തുടർന്ന് ഇയാളെ കമ്പനി ജോലിയിൽ നിന്ന് പിരിച്ചുവിട്ടു.

ഓഫീസിൽ നടത്തിയ സുരക്ഷാ പരിശോധനയിലാണ് ഈ ഉപകരണം കണ്ടെത്തിയത്. സ്വന്തം എഐ മോഡൽ ഉപയോഗിച്ച് നടത്തിയ പരിശോധനയിലൂടെയാണ് ഉപകരണം സ്ഥാപിച്ചത് അൽഫോസാനാണെന്ന് കമ്പനി തിരിച്ചറിഞ്ഞതും അന്വേഷണം എഫ്.ബി.ഐക്ക് കൈമാറിയതും. ഇയാളുടെ ബാഗിൽ നിന്ന് സമാനമായ മറ്റൊരു റെക്കോർഡിംഗ് ഉപകരണം കൂടി അന്വേഷണ ഏജൻസി കണ്ടെടുത്തു. കൂടാതെ, റെക്കോർഡിംഗ് ഉപകരണം നിർമിക്കുന്നതിനെക്കുറിച്ചും കമ്പനിയുടെ ആഭ്യന്തര വിവരങ്ങളെക്കുറിച്ചും ഇയാളും ഭാര്യയും എഐ ചാറ്റ്ബോട്ടുകളിലൂടെ വിശദമായി വിവരങ്ങൾ തിരഞ്ഞതായും അന്വേഷണത്തിൽ വ്യക്തമായിട്ടുണ്ട്.

കമ്പനിയുടെ സോഴ്സ് കോഡുകളോ സാങ്കേതിക വിവരങ്ങളോ ഉപഭോക്തൃ ഡാറ്റയോ ചോർന്നതായി ഇതുവരെ സൂചനകളില്ലെന്ന് ഓപ്പൺഎഐ അറിയിച്ചു. കുറ്റം തെളിയിക്കപ്പെട്ടാൽ അൽഫോസാന് അഞ്ച് വർഷം വരെ തടവും 2.5 ലക്ഷം ഡോളർ വരെ പിഴയും ലഭിച്ചേക്കാം. അടുത്തിടെ ഓപ്പൺഎഐ നേരിടുന്ന വിവിധ സുരക്ഷാ വീഴ്ചകളുടെയും ആഭ്യന്തര വിവാദങ്ങളുടെയും തുടർച്ചയായാണ് ഈ സംഭവം ഉണ്ടായിരിക്കുന്നത്. സാങ്കേതികവിദ്യയുടെയും കമ്പനിയുടെയും സുരക്ഷ കൂടുതൽ ശക്തമാക്കുമെന്നും എഫ്.ബി.ഐയുടെ വേഗത്തിലുള്ള ഇടപെടലിന് നന്ദി അറിയിക്കുന്നതായും ഓപ്പൺഎഐ വ്യക്തമാക്കി.