കടുത്ത ചൂടിൽ എൻഎച്ച്എസിന് ‘സമ്മർ ക്രൈസിസ്’; ശൈത്യകാലത്തേതുപോലെ മുന്നൊരുക്കം വേണമെന്ന് ആരോഗ്യ സെക്രട്ടറി

ലണ്ടൻ : കാലാവസ്ഥാ വ്യതിയാനത്തെ തുടർന്ന് കടുത്ത ചൂടും ഉഷ്ണതരംഗങ്ങളും യുകെയിൽ പതിവാകുന്ന സാഹചര്യത്തിൽ, ശൈത്യകാലത്തെ തിരക്കിനായി തയ്യാറെടുക്കുന്നതുപോലെ വേനൽക്കാല സമ്മർദങ്ങൾ നേരിടാനും എൻഎച്ച്എസ് തയ്യാറാകണമെന്ന് ആരോഗ്യ സെക്രട്ടറി യെവറ്റ് കൂപ്പർ മുന്നറിയിപ്പ് നൽകി. സാധാരണയായി ഫ്ലൂ സീസണിൽ മാത്രം അനുഭവപ്പെടുന്ന തരത്തിലുള്ള തിരക്കും രോഗികളുടെ വർധനയും വേനൽക്കാലത്ത് എ ആൻഡ് ഇ വിഭാഗങ്ങളിൽ അനുഭവപ്പെടുന്നതായി അവർ പറഞ്ഞു. മേയ്, ജൂൺ മാസങ്ങളിലെ ഉഷ്ണതരംഗങ്ങളിൽ ഇംഗ്ലണ്ടിൽ ഏകദേശം 2,877 പേർ ചൂടുമായി ബന്ധപ്പെട്ട കാരണങ്ങളാൽ മരിച്ചതായാണ് കണക്ക്.

ആശുപത്രി വാർഡുകൾ അമിതമായി ചൂടാകുക, കൂളിങ് സംവിധാനങ്ങൾ തകരാറിലാകുക, റേഡിയോതെറാപ്പി യന്ത്രങ്ങളും എംആർഐ സ്കാനറുകളും പ്രവർത്തനം നിർത്തുക തുടങ്ങിയ പ്രശ്നങ്ങൾ ആവർത്തിക്കുന്നതായി ഡോക്ടർമാർ മുന്നറിയിപ്പ് നൽകിയിട്ടുണ്ട്. കടുത്ത ചൂടുള്ള ദിവസങ്ങളിൽ ചില ജിപി സർജറികൾ റദ്ദാക്കേണ്ട സാഹചര്യമുണ്ടാകാമെന്നും റോയൽ കോളജ് ഓഫ് ജിപീസ് ചൂണ്ടിക്കാട്ടി. വയോധികർ, ചെറുകുട്ടികൾ, കുഞ്ഞുങ്ങളുള്ള കുടുംബങ്ങൾ എന്നിവരെ ചൂടുകാലത്ത് പ്രത്യേകം ശ്രദ്ധിക്കേണ്ടതിന്റെ ആവശ്യകത വ്യക്തമാക്കുന്ന പൊതുജന ബോധവൽക്കരണ ക്യാമ്പയിൻ ആരംഭിക്കുന്നതും സർക്കാർ പരിഗണിക്കുന്നു.

ആശുപത്രികളിലും മറ്റു ആരോഗ്യ സ്ഥാപനങ്ങളിലും മികച്ച ശീതീകരണ സൗകര്യങ്ങൾ ഒരുക്കുന്നത് എൻഎച്ച്എസ് അടിസ്ഥാന സൗകര്യ വികസന പദ്ധതിയുടെ പ്രധാന ഭാഗമാക്കുമെന്ന് കൂപ്പർ അറിയിച്ചു. അടുത്ത പത്ത് വർഷത്തിനുള്ളിൽ എല്ലാ ആശുപത്രികളിലും കെയർ ഹോമുകളിലും എയർ കണ്ടീഷനിങ് സംവിധാനം ഒരുക്കണമെന്ന് ക്ലൈമറ്റ് ചെയ്ഞ്ച് കമ്മിറ്റി നേരത്തെ ശുപാർശ ചെയ്തിരുന്നു. ഭാവിയിൽ 40 ഡിഗ്രി സെൽഷ്യസിന് മുകളിലുള്ള താപനില കൂടുതൽ പതിവാകാമെന്ന മുന്നറിയിപ്പിനിടെ, വേനൽക്കാല സമ്മർദങ്ങൾ കൈകാര്യം ചെയ്യാൻ വ്യക്തമായ പദ്ധതിയും കൂടുതൽ ജീവനക്കാരും മെച്ചപ്പെട്ട അടിസ്ഥാന സൗകര്യങ്ങളും അനിവാര്യമാണെന്ന് ആരോഗ്യ വിദഗ്ധർ വ്യക്തമാക്കി.

English summary: The NHS has been told to prepare for annual summer heat pressures as extreme temperatures place growing strain on hospitals and patients.