മാഞ്ചസ്റ്ററിലെ ജൂതസമൂഹത്തിന് നേരെ ഭീകരാക്രമണ പദ്ധതി: രണ്ട് ഇറാൻ സ്വദേശികൾ യുകെയിൽ അറസ്റ്റിൽ

ലണ്ടൻ : യുകെയിലെ മാഞ്ചസ്റ്ററിലുള്ള ജൂതസമൂഹത്തെ ലക്ഷ്യമിട്ട് ഭീകരാക്രമണം നടത്താൻ പദ്ധതിയിട്ട രണ്ട് ഇറാൻ പൗരന്മാർക്കെതിരെ ബ്രിട്ടിഷ് പോലീസ് ഭീകരവിരുദ്ധ നിയമപ്രകാരം കേസെടുത്തു. സാൽഫോർഡിൽ നിന്നുള്ള റഹ്മാൻ സലേഹി (34), ലിവർപൂളിൽ നിന്നുള്ള സലാം അഹമ്മദ്യാൻ (36) എന്നിവരാണ് പിടിയിലായത്. തീവ്രവാദ വിരുദ്ധ വിഭാഗവും ബ്രിട്ടിഷ് രഹസ്യാന്വേഷണ ഏജൻസിയായ എംഐ5-ഉം സംയുക്തമായി നടത്തിയ അന്വേഷണത്തെത്തുടർന്ന്, ജൂതന്മാരുടെ വിശുദ്ധ ദിനമായ യോം കിപ്പൂറിന് തൊട്ടുമുമ്പ് മാഞ്ചസ്റ്റർ നഗരമധ്യത്തിൽ നിന്നാണ് ഇവരെ കസ്റ്റഡിയിലെടുത്തത്.

പ്രതികൾ ആക്രമണം നടത്താനായി ബോംബ് നിർമാണ വിവരങ്ങളും സാമഗ്രികളും ശേഖരിക്കുകയും ആക്രമണ ലക്ഷ്യങ്ങൾ നിരീക്ഷിച്ച് വിവരങ്ങൾ കൈക്കലാക്കുകയും ചെയ്തതായി പോലീസ് വ്യക്തമാക്കി. എൻക്രിപ്റ്റഡ് ആപ്പുകൾ വഴി ഇറാനിലുള്ള ഒരാളുമായി ഇവർ നിരന്തരം ബന്ധപ്പെട്ടിരുന്നതായും അന്വേഷണത്തിൽ കണ്ടെത്തിയിട്ടുണ്ട്. ലിവർപൂളിലെയും സാൽഫോർഡിലെയും ഇവരുടെ താമസസ്ഥലങ്ങളിൽ പോലീസ് വിപുലമായ പരിശോധന നടത്തി. പ്രതികളെ ഒക്ടോബർ മൂന്നിന് വെസ്റ്റ്മിൻസ്റ്റർ മജിസ്ട്രേറ്റ് കോടതിയിൽ ഹാജരാക്കും.

ചെറിയ ബോട്ടുകളിൽ അനധികൃതമായി യുകെയിലെത്തിയവരാണ് പ്രതികളെന്ന് ആഭ്യന്തര സെക്രട്ടറി ഷബാന മഹ്മൂദ് വ്യക്തമാക്കി. ഒരാൾക്ക് അഭയാർഥി പദവി ലഭിച്ചിരുന്നതായും മറ്റൊരാളുടെ അപേക്ഷ പരിഗണനയിലാണെന്നും സർക്കാർ അറിയിച്ചു. രാജ്യത്തെ ജൂതസമൂഹത്തെ ലക്ഷ്യമിട്ടുള്ള ഭീഷണികളെയും വിദേശ ഗൂഢാലോചനകളെയും ശക്തമായി നേരിടുമെന്ന് സർക്കാർ അറിയിച്ചതോടെ, സംഭവത്തിൽ യു.കെയിലെ ജൂത സംഘടനകൾ കടുത്ത ആശങ്ക രേഖപ്പെടുത്തി.